Dekunnu po Adọgbigbo po to Aigba-Denamẹ Ajọwiwa Tọn lẹ Ji — WESẸDOTẸN INTẸNẸT JI TỌN Watchtower Tọn

Dekunnu po Adọgbigbo po to Aigba-Denamẹ Ajọwiwa Tọn lẹ Ji

1. Naegbọn mí ma dona gbọjọ eyin mí nọ dibu nado dekunnu to ajọwatẹn lẹ?

¹ Be kunnudide to ajọwatẹn lẹ nọ dobuna we wẹ ya? Eyin mọ wẹ ma gbọjọ blo, na to ninọmẹ de mẹ, Paulu lọsu he tlẹ yin lizọnyizọnwatọ de he ma nọ dibu dona “wleawuna adọgbigbo” nado dọyẹwheho. (1 Tẹs. 2:2) To hosọ ehe mẹ, mí na dọho gando avùnnukundiọsọmẹnu paa delẹ po ayinamẹ yọ́n-na-yizan delẹ he na gọalọna mí nado duto yé ji po go.

2. Naegbọn mí ma dona dibu dọ mí na hẹn homẹgblena azọ́nwatọ lọ lẹ?

² Be Azọ́nwatọ lọ lẹ Na Gblehomẹ Eyin Mí Jlo Na Dọhona Yé Wẹ Ya? To paa mẹ, mẹhe nọ wazọ́n to ajọwatẹn lẹ nọ donukun dọ nuhọtọ lẹ sọgan wá to whedepopenu bọ emi dona yí yé. Yé nọ saba jọmẹ na yé nọ pọ́n mẹdepope he wá ajọwatẹn lọ hlan taidi ahisinọ de. Enẹwutu, eyin mí sọnú to aliho he sọgbe mẹ bosọ jọmẹ, enẹ sọgan zọ́n bọ yé na yinuwa hẹ mí po sisi po bo sèhó mítọn.

3. Eyin mí ma na hẹn homẹgblena ahisinọ lẹ, whetẹnu wẹ mí dona dekunnuna azọ́nwatọ lọ lẹ?

³ Whetẹnu Wẹ Mí Dona Dekunnuna Azọ́nwatọ lọ Lẹ? Mí sọgan dọho hẹ azọ́nwatọ lọ lẹ to whenue gbẹtọ ma sù to yé dè, di apajlẹ to whenue yé ṣẹṣẹ hùnhọ̀n. Eyin hiẹ jlo na dọho hẹ ogán lọ kavi azọ́nwatọ de, hẹn ẹn diun dọ mẹdepope ma to e dè. Nuzedonukọnnamẹ towe ni nọ glido.

4. Nawẹ mí sọgan bẹ hodọdopọ jẹeji to ajọwatẹn lẹ gbọn?

⁴ Etẹwẹ Mí Sọgan Dọ? Eyin azọ́nwatọ susu wẹ nọ wazọ́n to finẹ, dọhona ogán ajọwatẹn lọ tọn whẹ́. Hiẹ sọgan dọ dọ: “E nọ vẹawu nado mọ ajọwatọ lẹ to whégbè, nuhe zọ́n niyẹn bọ mí wá pọ́n mì to azọ́nwatẹn mìtọn. N’yọnẹn dọ mì to azọ́nwa, enẹwutu, n’ma na yí whenu mìtọn susu.” Na azọ́nwatọ lọ lẹ nikaa lẹndọ nusàtọ wẹ mí yin, e na yọ́n hugan ma nado donù whẹho nunina sọn ojlo mẹ wá tọn go, adavo yelọsu kanse lehe azọ́n mítọn nọ yin nukunpedego to akuẹzinzan-liho do. Eyin e yọnbasi, hiẹ sọgan biọgbè to ogán lọ si nado dọho hẹ azọ́nwatọ lẹ to kleun mẹ. Vọ́ nuhe a dọna ogán lọ dọna yé. Eyin hiẹ mọdọ alọnu azọ́nwatọ de tọn ján, nọ glido bo jo alọnuwe pẹvi de do na ẹn. Eyin e ma yọnbasi nado dọho hẹ azọ́nwatọ lọ lẹ, hiẹ sọgan biọgbè ogán lọ nado jo owe delẹ do na yé.

5. Whẹwhinwhẹ́n tẹlẹ wẹ mí tindo nado nọ dekunnu po adọgbigbo po to aigba-denamẹ ajọwiwa tọn lẹ ji?

⁵ Jesu po Paulu po dọyẹwheho po adọgbigbo po na gbẹtọ lẹ to ajọwatẹn yetọn lẹ, podọ hiẹ lọsu sọgan wàmọ. (Mat. 4:18-21; 9:9; Owalọ 17:17) Biọ alọgọ Jehovah tọn to odẹ̀ mẹ nado tindo jijọho ahun mẹ tọn po adọgbigbo po. (Owalọ 4:29) To whenuena e yindọ yè nọ saba mọ ajọwatọ lẹ to ajọwatẹn yetọn, naegbọn hiẹ ma na tẹ́n kunnudide to aigba-denamẹ ajọwiwa tọn lẹ ji pọ́n?