LEHE MÍ GÁN GBAWHÀN WANGBẸNA TỌN DO

3 | De Wangbẹna Sẹ̀ Sọn Ayiha Towe Mẹ

Nuhe Biblu Plọn Mí:

“Mì yin adàdiọna gbọn ayiha mìtọn didiọ dali, na mì nido sọgan mọdona ojlo Jiwheyẹwhe tọn he yọ́n, bo yin alọkẹyi bosọ yin pipé lọ.”—LOMUNU LẸ 12:2.

Nuhe E Zẹẹmẹdo:

Nuhe mí nọ lẹn lẹ nọ duahunmẹna Jiwheyẹwhe. (Jelemia 17:10) Dile etlẹ yindọ mí dona nọ dapana nuhe nọ gbleawunamẹ lẹ didọ kavi wiwà, mí sọ dona wà nususu humọ. Wangbẹna nọ bẹjẹeji sọn ayiha po ahun po mẹ. Enẹwutu, mí dona nọ yawu doalọtena nulinlẹnpọn do nudepope he na zọ́n bọ mí na do numọtolanmẹ wangbẹna tọn lẹ ji. Whenẹnu kẹdẹ wẹ mí gán “yin adàdiọna” nugbonugbo, bo gbawhàn wangbẹna tọn.

Nuhe A Gán Wà:

Yí sọwhiwhe do lẹnnupọndo pọndohlan po numọtolanmẹ towe gando mẹdevo lẹ go po ji—titengbe mẹhe wá sọn akọ̀ kavi otò devo mẹ lẹ. Nọ kanse dewe dọ: ‘Nukun tẹwẹ n’do nọ pọ́n yé? Be pọndohlan ṣie nọ sinai do nuhe n’yọnẹn gando yé go lẹ ji ya? Kavi do nuvẹun ji?’ Nọ dapana nọtẹn Intẹnẹt tọn, sinima kavi aihundida he nọ do nuyiwa wangbẹna po danuwiwa po tọn hia lẹ.

Ohó Jiwheyẹwhe tọn gán gọalọna mí nado gbawhàn wangbẹna tọn to ayiha po ahun mítọn po mẹ

E ma nọ bọawu to whelẹponu nado gbeje linlẹn po numọtolanmẹ mítọn lẹ po pọ́n ganji. Amọ́, Ohó Jiwheyẹwhe tọn gán gọalọna mí nado “yọ́n linlẹn po ojlo ahun mẹ tọn lẹ po.” (Heblu lẹ 4:12) Enẹwutu, nọ gbadopọnna Biblu whẹwhẹ. Nọ yí nuplọnmẹ etọn lẹ jlẹdo linlẹn towe lẹ go, bosọ wà nuhe go a pé lẹpo nado hẹn linlẹn towe lẹ sọgbe hẹ nuhe Biblu plọnmẹ lẹ. Ohó Jiwheyẹwhe tọn gán gọalọna mí nado gbawhàn wangbẹna he ko “hẹnai” to ayiha po ahun mítọn mẹ po tọn.—2 Kọlintinu lẹ 10:4, 5.

Numimọ Jọnun—STEPHEN

E Diọ Aliho He mẹ E Nọ Lẹnnupọn Te

Stephen po hagbẹ whẹndo tọn etọn lẹ po jiya wangbẹna tọn to alọ yovo lẹ tọn me. Enẹ zọ́n bọ pipli tonudidọ tọn he nọ hoavùn na jlọjẹ gbẹtọ lẹ tọn de yinuwa deji. To nukọn mẹ, uwọ lọsu doalọ to nuyiwa wangbẹna tọn lẹ mẹ. Stephen dọmọ: “To whedelẹnu, yẹn po họntọn ṣie lẹ nọ po pọ́n sinima delẹ he do oyà he Aflikanu he yin kanlinmọ lẹ ji to États-Unis to hohowhenu hia. Nuyiwa mawadodo tọn ehelẹ hẹn homẹgble mí sọmọ bọ mí diọnukunsọ jọja yovo he to sinima pọntẹn lọ lẹ to afọdopolọji. Enẹgodo, mí nọ yì lẹdo yovo lẹ tọn he sẹpọ mí lẹ mẹ bo nọ to mẹhe mí na hò lẹ dín.”

Pọndohlan Stephen tọn diọ mlẹnmlẹn to whenue e jẹ Biblu plọn hẹ Kunnudetọ Jehovah tọn lẹ ji. E flin dọmọ: “Na n’ko doalọ to whẹho akọ̀ ṣinṣinyan tọn mẹ na ojlẹ susu wutu, n’wá mọ onú delẹ to Kunnudetọ lẹ ṣẹnṣẹn he paṣa mi taun. Di apajlẹ, to whenue Kunnudetọ yovo de jlo na yì tògodo, e bẹ ovi etọn lẹ do whẹndo mẹyuu tọn de dè nado penukundo yé go. Podọ to whenue dẹpẹ he yin mẹyuu de tindo nuhudo fie e na nọ tọn, whẹndo yovo tọn de yí i do owhé yetọn gbè.” Stephen wá kudeji dọ Kunnudetọ Jehovah tọn lẹ wẹ pipli mẹmẹsunnu lẹ tọn owanyinọ he Jesu dọ dọdai etọn lọ.—Johanu 13:35.

Etẹwẹ gọalọna Stephen nado jo nuyiwa wangbẹna tọn lẹ do? Nuhe yin didọ to Lomunu lẹ 12:2 mẹ wẹ. Stephen dọmọ: “N’wá jẹ ayidego ji dọ n’dona diọ pọndohlan ṣie. N’dona diọ aliho nulẹnpọn tọn ṣie bo ma na nọ yinuwa hẹ mẹdevo lẹ po jijọho po poun, ṣigba n’na nọ pọ́n mọwiwà hlan taidi aliho gbẹninọ tọn he yọ́n hugan lọ.” Stephen ko duvivi gbẹzan he vò sọn numọtolanmẹ wangbẹna tọn lẹ si tọn na owhe 40 linlán todin.