LEHE MÍ GÁN GBAWHÀN WANGBẸNA TỌN DO

4 | Jiwheyẹwhe Gán Gọalọna Mí Nado Gbawhàn Wangbẹna Tọn

Nuhe Biblu Plọn Mí:

“Sinsẹ́n gbigbọ tọn wẹ owanyi, ayajẹ, jijọho, homẹfa, homẹdagbe, dagbewà, yise, walọmimiọn, mawazẹjlẹgo.”—GALATIANU LẸ 5:22, 23.

Nuhe E Zẹẹmẹdo:

Jiwheyẹwhe wẹ gán gọalọna mí nado gbawhàn wangbẹna tọn. Gbigbọ wiwe etọn gán gọalọna mí nado wleawuna jẹhẹnu delẹ he mílọsu ma gán wleawuna gbede. Enẹwutu, kakati mí ni tẹnpọn nado duto wangbẹna ji po huhlọn mídetiti tọn po, e na yọ́n dọ mí ni nọ ganjẹ alọgọ he Jiwheyẹwhe nọ namẹ go. Eyin mí wàmọ, mí gán do numọtolanmẹ apọsteli Paulu tọn nkọ, mẹhe wlan dọmọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.” (Filipinu lẹ 4:13) Podọ, mí na penugo nado dọ dọ: “Jehovah dè wẹ alọgọ ṣie nọ wá sọn.”—Salmu lẹ 121:2.

Nuhe A Gán Wà:

“Jehovah ko diọ dawe danuwatọ he n’yin lọ zun gbẹtọ jijọhonọ.”—WALDO

Nọ hodẹ̀ vivẹ́ hlan Jehovah nado biọ gbigbọ wiwe etọn. (Luku 11:13) Nọ biọ to e si dọ ni gọalọna we nado nọ do jẹhẹnu etọn nkọ lẹ hia to gbẹzan towe mẹ. Nọ plọn nuhe Biblu dọ gando jẹhẹnu he na zọ́n bọ a na duto wangbẹna ji lẹ go taidi, owanyi, jijọho, homẹfa po mawazẹjlẹgo po. Nọ dín aliho lẹ nado wleawuna jẹhẹnu enẹlẹ to gbẹzan towe mẹ. Podọ, nọ dogbẹ́ hẹ mẹhe sọ nọ dovivẹnu nado do jẹhẹnu mọnkọ hia lẹ. Omẹ ehelẹ gán gọalọna we bosọ ‘dozolanmẹna we hlan owanyi po azọ́n dagbe lẹ po kọ̀n.’—Heblu lẹ 10:24; nudọnamẹ odò tọn.

Numimọ Jọnun—WALDO

E Gbawhàn Wangbẹna Sinsinyẹn Tọn

Waldo whẹ́n to ninọmẹ sinsinyẹn de mẹ he zọ́n bọ e nọ saba yinuwa po wangbẹna po. E dọmọ: “N’nọ saba hoavùn hẹ amasin adinọ-satọ akọnka lẹ . . . To gbèdopo, jaguda-gbẹ́ de haya dawe kanylantọ de nado hù mi, amọ́ n’penugo bo họ̀n dile etlẹ yindọ e sọnú mi.”

Homẹ Waldo tọn ma hùn whenue asi etọn jẹ Biblu plọn hẹ Kunnudetọ Jehovah tọn lẹ ji. E dọmọ: “N’gbẹwanna Kunnudetọ lẹ, podọ whlasusu wẹ n’dọ danú na yé. Amọ́, whelẹponu wẹ yé nọ gblọn po ogbè fifá po.”

To godo mẹ, Waldo lọsu jẹ Biblu plọn ji. E dọmọ: “E ma bọawuna mi nado wànu sọgbe hẹ nuhe plọn n’te. N’kudeji dọ e ma gán pà mi pọ́n gbede nado jo kàndudu po danuwiwa po do.” Amọ́, e wá plọn nude to Biblu mẹ he zọ́n bọ e diọ pete.

Waldo dọmọ: “To gbèdopo, Alejandro he nọ plọn Biblu hẹ mi biọ to asi e nado hia Galatianu lẹ 5:22, 23. . . . Alejandro dọ dọ, e ma yin huhlọn ṣie titi wẹ na zọ́n bọ e na pà mi nado wleawuna jẹhẹnu enẹlẹ gba, amọ́ gbigbọ wiwe Jiwheyẹwhe tọn wẹ. Nugbo enẹ diọ pọndohlan ṣie petepete!”

Po alọgọ Jiwheyẹwhe tọn po, Waldo penugo bo gbawhàn wangbẹna tọn to gbẹzan etọn mẹ. E dọmọ: “Obá he mẹ n’diọ jẹ nọ paṣa hẹnnumẹ ṣie po họntọn ṣie dai tọn lẹ po taun. E yidogọ dọmọ: Jehovah ko diọ dawe danuwatọ he n’yin lọ zun gbẹtọ jijọhonọ.”