Klasi 108tọ Giliadi Tọn Yin Tudohomẹna Nado Wà Sinsẹ̀nzọn Wiwe

TO BIBLU mẹ, sinsẹ̀n-bibasi Jiwheyẹwhe tọn nọ saba yin alọdlẹndo gbọn hogbe lọ “sinsẹ̀nzọn wiwe” dali. E wá sọn hogbe Glẹki tọn de mẹ he dlẹnalọdo sinsẹ̀nzọn wiwà hlan Jiwheyẹwhe. (Lomunu lẹ 9:4) Gbẹtọ 5 562 he dotoaina tito-to-whinnu gbedewema-yíyí klasi 108tọ Wehọmẹ Biblu Pinplọn Watchtower Giliadi tọn lẹ sè bọ hodọtọ lẹ wleawuna ayinamẹ yọn-na-yizan lẹ he na gọalọna gbedewema-yitọ lẹ nado wà sinsẹ̀nzọn wiwe heyin alọkẹyi hlan Jehovah Jiwheyẹwhe.a

Theodore Jaracz, heyin dopo to Hagbẹ Anademẹtọ Kunnudetọ Jehovah tọn lẹ tọn mẹ, yinuwa taidi azinponọ. Tito-to-whinnu lọ bẹjẹeji po ohàn sọha 52 po [Flansegbe], “Le nom de notre Père” (Oyín Otọ́ Mítọn Tọn.) Hukan awetọ ohàn enẹ tọn lá dọmọ: “Mí to aliho lẹ dín na mí nido sọ klán oyín matin awetọ towe do wiwe.” Enẹ do ojlo ahundoponọ wehọmẹvi klasi he to gbedewema yí lọ lẹ tọn hia na nugbo tọn (he wá sọn otò 10 mẹ) nado yí azọ́nplọnmẹ yetọn zan to azọ́ndenamẹ mẹdehlan tọn yetọn lẹ mẹ, he na yin to aigba voovo 17 lẹ ji.

To hodidọ bẹjẹeji tọn etọn mẹ, Mẹmẹsunnu Jaracz dọ̀n ayidonugo wá osun atọ́n Biblu pinplọn sinsinyẹn wehọmẹvi lọ lẹ tọn ji he ko wleawuna yé na sinsẹ̀nzọn wiwà to otò jonọ tọn lẹ mẹ. Ehe gọalọna yé nado “dindona onú popo dagbedagbe,” enẹ wẹ, nado gbeje nuhe yé plọn wayi lẹ pọ́n ganji to hinhọ́n Ohó Jiwheyẹwhe tọn mẹ, bosọ “hẹn ehe yin dagbe go gligli.” (1 Tẹsalonikanu lẹ 5:21) E na tuli yé nado yí nugbonọ-yinyin do tẹdo Jehovah, Ohó etọn, po azọ́ndenamẹ he wutu yè do plọnazọ́n yé lẹ po go gligli. Etẹwẹ na gọalọna yé dile yé na to ehe lẹpo wà?

Ayinamẹ Yọn-na-Yizan lẹ na Sinsẹ̀nzọn Wiwe Wiwà

Lon Schilling, heyin dopo to hagbẹ Wedegbẹ́ Azọ́nwiwa Bẹtẹli tọn mẹ, dọho do hosọ lọ ji “Be Hiẹ Na Duto Mẹtẹnpọn Lẹnpọn Dagbenọ Yinyin Tọn Ji Ya?” E zinnudo nuhọakuẹ lẹnpọn dagbenọ yinyin tọn, he nọ do nuyọnẹn jijọ-di-Jiwheyẹwhe tọn hia ji. (Jakobu 3:17) Lẹnpọn dagbenọ yinyin bẹ yinyin mẹhe nọ jogbe, mẹnukuntamahopọntọ, jlẹkajinọtọ, mẹtọnhopọntọ, po whiwhẹ po hẹn. “Gbẹtọ lẹnpọn dagbenọ lẹ nọ tin to jlẹkaji to nuyiwa hẹ mẹdevo lẹ mẹ. Yé ma nọ joawuna wazẹjlẹgo lẹ gba,” wẹ Mẹmẹsunnu Schilling dọ. Etẹwẹ sọgan gọalọna mẹdehlan de nado yin lẹnpọn dagbenọ? Pọndohlan jlẹkaji tọn tintindo gando mẹdetiti go, yíyí dagbenu dotẹnmẹ hundote lẹ tọn zan nado dotoai bo plọnnu sọn mẹdevo lẹ dè, po ojlonọ yinyin po nado lẹnnupọndo pọndohlan mẹdevo lẹ tọn ji to whenuena e ma jẹagọdo nunọwhinnusẹ́n jijọ-di-Jiwheyẹwhe tọn lẹ.—1 Kọlintinu lẹ 9:19-23.

“Mì Wọnji Nado Dùnú Blo!” wẹ yin hosọ mẹwhantọ adà he bọdego to tito-to-whinnu lọ ji tọn, heyin zizedonukọnnamẹ gbọn Samuel Herd, heyin Hagbẹ Anademẹtọ devo dali. E zinnudo nuhọakuẹ núdùdù gbesisọmẹ tọn dagbe gbigbọmẹ tọn dùdù ji nado sọgan gbọṣi gbesisọmẹ nado wà sinsẹ̀nzọn wiwe. “Nuyiwa gbigbọmẹ tọn mìtọn,” wẹ Mẹmẹsunnu Herd dọ, “na jideji to madẹnmẹ dile mì biọ azọ́ndenamẹ yẹwhehodidọ po mẹpinplọn tọn mìtọn po mẹ. Enẹwutu, nuhudo de na tin na mì nado hẹn núdùdù gbigbọmẹ tọn mìtọn jideji nado sọgan hẹn huhlọn mìtọn lẹ do jlẹkaji po obá dagbe po mẹ.” Núdùdù dagbe gbigbọmẹ tọn to gbesisọmẹ sọgan gọalọna mẹdehlan de nado dapana ayimajai gbigbọmẹ tọn po ojlo whégbè lilẹkọyi tọn po. E nọ yidogọna pekọ po gbemima nado tẹdo azọ́ndenamẹ mẹtọn heyin sinsẹ̀nzọn wiwe tọn po go gligli.—Filippinu lẹ 4:13.

Mẹplọntọ Giliadi tọn dopo, Lawrence Bowen, na tuli wehọmẹvi he to gbedewema yí lẹ nado “Lẹkọ Yì Bẹjẹeji.” Etẹ dọ wẹ ewọ te? E dọna mẹplidopọ lẹpo nado hùn do Howhinwhẹn lẹ 1:7, fie dọmọ: “Obu Jehovah tọn wẹ bẹjẹeji oyọnẹn tọn, NW .” Hodọtọ lọ basi zẹẹmẹ dọmọ: “Nudepope he gbẹ́ whẹwhinwhẹ́n titengbe tintin Jehovah tọn dai ma sọgan pegan nugbonugbo taidi oyọnẹn nujọnu tọn kavi dekọtọn do nukunnumọjẹnumẹ he sọgbe mẹ pọ́n gbede gba.” Mẹmẹsunnu Bowen yí zẹẹmẹ gigọ́ Ohó Jiwheyẹwhe tọn, Biblu tọn jlẹdo ajikun dopodopo ajì de tọn lẹ go. To whenuena okún dopodopo lẹ yin hihopli dopọ, yẹdide de nọ wleawu. Lehe okún heyin hihopli lẹ sù sọ, mọwẹ yẹdide lọ nọ klo bosọ nọ họnwun dogọ do podọ mọwẹ pinpẹn-nutọn-yinyọnẹn he omẹ lọ nọ wleawuna nọ sù deji do. Ehe sọgan gọalọna mẹlẹpo nado wà sinsẹ̀nzọn wiwe de hlan Jiwheyẹwhe.

Wallace Liverance, kandai-hẹntọ Wehọmẹ Giliadi tọn, dotana hodidọ debọdo-dego lọ lẹ. Hosọ etọn wẹ “Mì Nọ Do Pinpẹn-Nutọn-Yinyọnẹn Hia Taidi Avọ́sinsan Mìtọn Hlan Jiwheyẹwhe.” E dọ̀n ayidonugo wá kandai lọ he gando pòtọnọ ao heyin hinhẹn jẹ gángán gbọn Jesu dali lẹ ji. (Luku 17:11-19) Dopo gee to yé mẹ wẹ lẹkọ wá nado pà Jiwheyẹwhe podọ nado dopẹna Jesu. “Matin ayihaawe, dehe pò lẹ jaya dọ yé yin hinhẹnzun wiwe. Homẹ yetọn hùn gando ninọmẹ wiwe yetọn go, ṣigba e taidi dọ nado yin didohia taidi wiwe gbọn yẹwhenọ lọ dali wẹ yin nuhe yé jlo lẹpo,” wẹ Mẹmẹsunnu Liverance dọ. Klọwé gbigbọmẹ tọn he nọ dekọtọn sọn nugbo lọ pinplọn mẹ, to pọmẹ hẹ pinpẹn-nutọn-yinyọnẹn, dona whàn mẹde nado dopẹ́ na Jiwheyẹwhe na dagbewà etọn. Wehọmẹvi klasi 108tọ Giliadi tọn lẹ yin tulina nado lẹnayihamẹpọn do nuwiwa po dagbewà Jiwheyẹwhe tọn lẹpo po ji nado sọgan hẹn sinsẹ̀nzọn po avọ́sinsan yetọn lẹpo po sọawuhia taidi dohia pinpẹn-nutọn-yinyọnẹn tọn de hlan Jiwheyẹwhe.—Psalm 50:14, 23; 116:12, 17.

Numimọ lẹ po Hokansemẹ lẹ po Do Lehe Yè Na Basi i Do Ji

Mark Noumair, yèdọ nuplọnmẹtọ Giliadi tọn devo, penukundo adà he bọdego to tito-to-whinnu lọ mẹ go. E penukundo numimọ lizọnyizọn kunnudegbe tọn klasi lọ tọn lẹ go to ojlẹ azọnpinplọn yetọn tọn whenu. To madozẹnzẹn mẹ, wehọmẹvi lọ lẹ ko yí nudi owhe 12 zan to lizọnyizọn whenu-gigọ́ tọn mẹ whẹpo do wá Giliadi. To whenuena yé tin to wehọmẹ, yé bẹ sọha susu plọnmẹ Biblu lẹ tọn jẹeji hẹ gbẹtọ he tindo dodonu voovo lẹ, he dohia dọ wehọmẹvi lọ lẹ yọ́n lehe yè nọ “lẹzun . . . onú popo hlan gbẹtọ lẹpo” do.—1 Kọlintinu lẹ 9:22.

Bọdo numimọ wehọmẹvi lọ lẹ tọn go, Charles Molohan po William Samuelson po kanhose hagbẹ whẹndo Bẹtẹli tọn po nugopọntọ tomẹyitọ he ko yì Giliadi po delẹ. Dopo to mẹmẹsunnu heyin hokanse lẹ mẹ, yèdọ Robert Pevy, wà sinsẹ̀nzọn to Philippines to gbedewema-yíyí sọn klasi 51tọ Giliadi tọn mẹ godo. E flinnu klasi lọ dọmọ: “To whedepopenu he nuhahun de tin, mẹlẹpo wẹ nọ na ayinamẹ yetọn lẹ do lehe yè na didẹ nuhahun lọ do ji. Mẹde na tin he nọ bikan hugan we janwẹ, yèdọ mẹde he na de ayinamẹ he yọ́n hugan de tọ́n. Ṣigba eyin hiẹ pọ́n Biblu mẹ bosọ tẹnpọn nado mọ pọndohlan Jiwheyẹwhe tọn do onú lẹ ji, mẹdepope tọn ma na yọ́n hugan ẹn gba. Enẹwẹ nọ saba yin gblọndo he sọgbe lọ.”

Nado dotana tito-to-whinnu dagbe gbigbọmẹ tọn lọ, John Barr, heyin dopo to Hagbẹ Anademẹtọ tọn mẹ, dọho do hosọ lọ “Wà Sinsẹ̀nzọn Wiwe Heyin Alọkẹyi Hlan Jehovah” ji. E do lehe sinsẹ̀nzọn wiwe sọgan yin didohia to lizọnyizọn kunnudegbe tọn mẹ nado gọalọna omẹ ahunjijlọnọ lẹ nado basi-sinsẹ̀n hlan Jiwheyẹwhe to aliho alọkẹyi tọn de mẹ do hia. To lilẹhlan hogbe Jesu tọn lẹ to Matiu 4:10 mẹ godo, Mẹmẹsunnu Barr dọ, “Eyin Jehovah kẹdẹ wẹ míwlẹ jlo na basi-sinsẹ̀n hlan, mí dona gbẹkọ wunmẹ boṣiọ-sinsẹ̀n oklọ tọn lẹpo go, taidi nukunkẹn, ojlo na adọkunnu lẹ, po mẹdetiti zizedaga po. Lehe e nọ hẹn mí jaya do sọ nado lẹnnupọn dọ mẹdehlan mítọn lẹ gbọn owhe lẹ gblamẹ sọn bẹjẹeji 1940 tọn lẹ gbọ́n ko tindo yinkọ dagbe to whẹho ehe mẹ! Podọ mí deji dọ mì gbedewema-yitọ klasi 108tọ Giliadi tọn lẹ na hodo apajlẹ dagbe yetọn. Mìwlẹ jlo nado wà sinsẹ̀nzọn wiwe hlan Jehovah, yèdọ omẹ dopo kẹdẹ lọ he jẹ nado mọ ẹn yí.”

Tadona nujikudo tọn de wẹ enẹ yin na tito-to-whinnu mẹjlọdote tọn de. Enẹgodo wẹ whenu tin na nudọdomẹ lẹ sisè sọn ojlo dagbenọ lẹ dè lẹdo aihọn pé, na gbedewema lẹ ninamẹ, podọ na hihia wekanhlanmẹ de sọn klasi lọ dè, he do pinpẹn-nutọn-yinyọnẹn hia na azọ́nplọnmẹ heyin mimọyi lọ. Klasi he to gbedewema yí lọ yin tudohomẹna nado do jẹhẹnu titẹdo azọ́ndenamẹ yetọn go podọ do Jehovah sinsẹ̀n go tọn hia. Mẹhe wá lẹpo, gọna jonọ lẹ sọn otò 25 lẹ mẹ, kọnawudopọ to tito-to-whinnu lọ hinhẹnwa vivọnu mẹ to ohàn po odẹ̀ po mẹ.

[Nudọnamẹ Odò Tọn]

[Apotin to weda 23]

SỌHA NULINLẸN KLASI TỌN

Sọha otò he mẹ yé wá sọn lẹ tọn: 10

Sọha otò he mẹ yè do yé hlan lẹ tọn: 17

Sọha wehọmẹvi lẹ tọn: 46

Madozẹnzẹn owhe mẹhodido tọn: 34

Madozẹnzẹn owhe to nugbo mẹ tọn: 16

Madozẹnzẹn owhe lizọnyizọn whenu-gigọ́ tọn: 12

[Yẹdide to weda 24]

Gbedewema-Yíyí Klasi 108tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhé to hukan dopodopo ji.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.