Oyọnẹn He Pegan Jiwheyẹwhe Tọn Nọ Miọnhomẹnamẹ

NUHE Biblu dọ gando owanyi po lẹblanu Jiwheyẹwhe tọn po go nọ fọ́n kanbiọ tukladomẹ tọn lẹ dote na mẹdelẹ. Yé nọ kanse dọ: Eyin Jiwheyẹwhe jlo nado de danuwiwa sẹ, bo yọ́n lehe e na wà ẹ do, bosọ tindo huhlọn nado wà ẹ, naegbọn danuwiwa do to susudeji zọnmi? Nuhahun yetọn wẹ lehe yé na kọ̀n nuhe ma yọnbasi atọ̀n dopọ do: (1) Jiwheyẹwhe yin huhlọnnọ; (2) Jiwheyẹwhe yin owanyi bo yọ́n; bọ (3) onú ylankan lẹ to jijọ zọnmii. Yé lẹndọ to whenuena e yindọ nugbo wẹ onú atọ̀ntọ yin, e whè gbau dopo to awe he pò lẹ mẹ dona yin lalo. Hlan yewlẹ, Jiwheyẹwhe ma penugo nado doalọtena danuwiwa kavi e ma kiya wẹ.

Azán delẹ bọdo gbakija World Trade Center tọn go to New York, sinsẹ̀ngán he diyin to États-Unis de dọmọ: “Gbẹtọ lẹ ko kàn nuhewutu . . . Jiwheyẹwhe jotẹndona nugbajẹmẹji po yajiji lẹ po se mi whlasusu. Yẹn dona yigbe dọ yẹn ma yọ́n gblọndo lọ mlẹnmlẹn jẹ fie yẹnlọsu jlo nado yọnẹn jẹ gba.”

To hodidọ gando gblọndo etọn go mẹ, sinsẹ̀n-nuplọnmẹtọ de wlan dọ “sinsẹ̀n-nuplọnmẹ dagbe” he sinsẹ̀ngán ehe nọ plọnmẹ yinuwado emi ji taun. E sọ kẹalọyi pọndohlan weyọnẹntọ devo tọn he wlan dọ: “Nugbo lọ dọ Jiwheyẹwhe dáblu wẹ zọ́n bọ mí ma sọgan mọnukunnujẹ nuhewutu mí to yaji mẹ.” Ṣigba be nugbo wẹ dọ mí ma sọgan mọnukunnujẹ nuhewutu Jiwheyẹwhe jotẹndona danuwiwa mẹ ya?

Bẹjẹeji Danuwiwa Tọn

To vogbingbọn mẹ na nuhe sinsẹ̀ngán lẹ sọgan dọ, Biblu ma dohia dọ nuhewutu Jiwheyẹwhe jotẹndona danuwiwa dáblu gba. Nuagokun de he na gọalọna mí nado mọnukunnujẹ whẹho lọ mẹ wẹ nado yọnẹn dọ Jehovah ma dá aihọn ylankan de gba. E dá asu po asi po tintan to pipé mẹ, matin ylando. Jehovah pọ́n alọnuzọ́n etọn hlan bo mọdọ e “yọ́n tlala.” (Gẹnẹsisi 1:26, 31) Lẹndai etọn wẹ yindọ Adam po Evi po ni dlẹnkanna Paladisi Edẹni mẹ tọn jẹ aigba lọ blebu ji bo hẹn ẹn gọ́ po gbẹtọ ayajẹnọ lẹ po to hihọ́ basinamẹ nupojipetọ-yinyin owanyinọ etọn glọ.—Isaia 45:18.

Danuwiwa bẹjẹeji po nudida gbigbọnọ de po, he jlo dọ emi ni nọ yin sinsẹ̀n-basi hlan, dile etlẹ yindọ e ko yin nugbonọ hlan Jiwheyẹwhe dai. (Jakobu 1:14, 15) Atẹṣiṣi etọn sọawuhia to aigba ji to whenuena e diọlinlẹnna asu po asi po tintan nado kọnawudopọ hẹ ẹ to nukundidiọsọ Jiwheyẹwhe mẹ. Kakati nado litaina anademẹ he to tlọlọ Jiwheyẹwhe tọn ma nado dù kavi doalọ sinsẹ́n atin oyọnẹn dagbe po oylan po tọn lọ go, Adam po Evi po yí sọn e mẹ bo dù. (Gẹnẹsisi 3:1-6) To mọwiwa mẹ, e mayin dọ yé vẹtoli na Jiwheyẹwhe kẹdẹ wẹ gba ṣigba sọ dohia ga dọ yé jlo na jẹ mẹdekannu sọn ewọ si.

Whẹho Walọ Dagbe Tọn de Yin Finfọndote

Atẹṣiṣi Edẹni mẹ tọn ehe fọ́n whẹho nujinọtedo walọ dagbe tọn de dote, yèdọ avùntọ́nmẹ de heyin nujọnu na wẹkẹ lọ. Gbẹtọvi atẹṣitọ lọ lẹ dohia dọ Jehovah ma to gandu do nudida etọn lẹ ji ganji gba. Be Mẹdatọ lọ tindo jlọjẹ nado biọ tonusise mlẹnmlẹn sọn gbẹtọvi lẹ si wẹ? Be ninọmẹ gbẹtọvi lẹ tọn ma na pọnte hugan eyin yé tin to yededenu ya?

Jehovah penukundo avùn heyin tintọ́n gandudu etọn ehe go to aliho de mẹ he do jlẹkajininọ pipé etọn hia to owanyi, whẹdida dodo, nuyọnẹn, po huhlọn po mẹ. E sọgan ko yí huhlọn etọn zan nado gbidi atẹṣitọ lọ lẹ sẹ to afọdopolọji. Enẹ na ko taidi nuhe sọgbe, na e tindo jlọjẹ nado wàmọ wutu. Ṣigba mọwiwa ma na ko na gblọndo na kanbiọ nujinọtedo walọ dagbe tọn he ko yin finfọndote lẹ. To alọ devo mẹ, Jiwheyẹwhe sọgan ko wọnji ylando lọ go poun. Enẹ sọgan taidi nuwiwa owanyinọ de na mẹdelẹ to egbehe. Ṣogan, ehe lọsu ma na na gblọndo na alọsọakọ́n Satani tọn dọ e na pọnte hugan eyin gbẹtọvi lẹ to gandu do yede ji. Humọ, be nuyiwa mọnkọtọn ma na tlẹ na tuli mẹdevo lẹ nado gbẹkọ aliho Jehovah tọn go ya? Kọdetọn lọ na yin yajiji madopodo.

To nuyọnẹn etọn mẹ, Jehovah ko dike gbẹtọvi lẹ ni yinuwa to aliho yede tọn mẹ na ojlẹ de. Dile etlẹ yindọ ehe ko zẹẹmẹdo tẹnjijodona danuwiwa nado zindonukọn na ojlẹ gli de, gbẹtọvi lẹ ko gbọnmọ dali tindo dotẹnmẹ hundote lọ nado dohia eyin yé sọgan dugán do yede ji matin anademẹ Jiwheyẹwhe tọn po kọdetọn dagbe po, gbọn gbẹninọ sọgbe hẹ nujinọtedo dagbe po oylan po yedetiti tọn lẹ dali. Etẹwẹ ko yin kọdetọn lọ? Whenuho gbẹtọvi tọn ko gọ́ na awhàn, whẹdida mawadodo, kọgbidinamẹ, po yajiji po. Awugbopo mlẹnmlẹn atẹṣiṣi ehe tọn sọta Jehovah wẹ na didẹ whẹho heyin finfọndote to Edẹni mẹ lọ kakadoi.

Ṣigba, Jiwheyẹwhe ko do owanyi etọn hia gbọn awuwiwlena Visunnu etọn, Jesu Klisti, he ze ogbẹ̀ gbẹtọvi tọn etọn jo taidi avọ́sinsan ofligọ tọn de dali. Ehe tún gbẹtọvi tonusetọ lẹ dote sọn whẹgbledo ylando po okú po tọn he tolivivẹ Adam tọn hẹnwa si. Ofligọ lọ ko hùn aliho ogbẹ̀ madopodo tọn dote na mẹhe do yise hia to Jesu mẹ lẹpo.—Johanu 3:16.

Mí tindo mẹhẹndeji homẹmiọnnamẹ Jehovah tọn dọ ojlẹ gli de wẹ yajiji gbẹtọvi tọn tin na. “Whenu pẹẹde, mẹylankan lẹ ma na tin ba,” wẹ psalm-kàntọ lọ wlan. “Hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.”—Psalm 37:10, 11.

Sọgodo Hihọ́ po Ayajẹ po Tọn De

Hẹndi dọdai Biblu tọn lẹ tọn dohia dọ ojlẹ ko sẹpọ na Jiwheyẹwhe nado doalọtena danuwiwa, awubla, po okú po. Doayi onú jiawu he ja he apọsteli Johanu mọ to numimọ de mẹ lẹ go. E wlan dọmọ: “Yẹn sọ mọ olọn yọyọ de, po aigba yọyọ de po: na olọn tintan, po aigba tintan po ko juwayi; ohù masọ tin ba. . . . Jiwheyẹwhe lọsu nasọ nọ̀ hẹ [gbẹtọ lẹ], . . . Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” To hodidọ de he zinnudo nugbo-yinyin dọdai ehelẹ tọn ji mẹ, Johanu yin didọna dọmọ: “Wlanwe: ohó helẹ dodo po nugbo po wẹ.”—Osọhia 21:1-5.

Etẹwẹ dogbọn homẹvọnọ liva susu he ko kú sọn atẹṣiṣi Edẹni mẹ tọn whenu gbọ́n lẹ dali? Jehovah dopagbe dọ emi na hẹn mẹhe to amlọndọ to okú mẹ todin lẹ gọwá ogbẹ̀. Apọsteli Paulu dọmọ: “Yẹn sọ tindo todido hlan Jiwheyẹwhe dè . . . dọ, fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Omẹ ehelẹ na tindo todido gbẹninọ to aihọn he mẹ “dodo nọ nọ̀” tọn.—2 Pita 3:13.

Kẹdẹdile otọ́ owanyinọ de na dike ovi etọn ni doakọnna mẹzizẹ awufiẹsa tọn de eyin e yọnẹn dọ e na hẹn ale dẹn-to-aimẹ lẹ wá do, mọwẹ Jehovah ko dike gbẹtọvi lẹ ni tindo numimọ gbẹzan danuwiwa tọn na ojlẹ gli de to aigba ji do. Ṣigba, dona madopodo lẹ to tenọpọn mẹhe wà ojlo Jiwheyẹwhe tọn lẹpo. Paulu basi zẹẹmẹ dọmọ: “Yè hẹn nudida yin mẹmẹglọ hlan ovọ́, e mayin po ojlo po gba, ṣigba gbọn linlẹn mẹhe yí dopolọ do mẹglọ to todido mẹ tọn dali. Na yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.”—Lomunu lẹ 8:20, 21.

Linlin de wẹ ehe yin na nugbo tọn—e mayin wunmẹ he mí nọ mọ to televiziọn ji kavi hia to linlinwema lẹ mẹ gba. Wẹndagbe he yọnhugan lọ wẹ e yin sọn “Jiwheyẹwhe homẹmimiọn lẹpo tọn,” he nọ hò mítọn pọ́n nugbonugbo dè.—2 Kọlintinu lẹ 1:3.

[Yẹdide to weda 6]

Ojlẹ ko dohia dọ gbẹtọvi lẹ ma sọgan dugán do yedelẹ ji po kọdetọn dagbe po matin anademẹ Jiwheyẹwhe tọn gba

[Yẹdide/Asisa Yẹdide tọn]

Whẹndo Somalie tọn: UN PHOTO 159849/M. GRANT; atom bomb: USAF photo; opá yasanamẹ tọn: U.S. National Archives photo