Hlan Wehiatọ Mítọn Lẹ

HOMẸ mítọn hùn nado dọna mì dọ bẹsọn zinjẹgbonu ehe ji, diọdo delẹ na wá aimẹ gando Atọ̀họ̀-Nuhihọ́ Lọ Tọn go. Whẹpo mí nado basi zẹẹmẹ gando diọdo lọ lẹ go, mì gbọ mí ni donù nuhe ma na diọ lẹ go.

Oyín linlinnamẹwe ehe tọn, yèdọ Atọ̀họ̀-Nuhihọ́ Lọ Tọn He To Ahọluduta Jehovah Tọn Lá, ma ko diọ. Enẹwutu, Atọ̀họ̀-Nuhihọ́ Lọ Tọn na zindonukọn nado hẹn gbégbò wá na Jehovah taidi Jiwheyẹwhe nugbo lọ podọ wẹndagbe Ahọluduta tọn etọn na to homẹmiọnna mẹhe nọ hia ẹ lẹ. Hosọ he tin to weda 5 jẹ 9 zinjẹgbonu ehe tọn mẹ lẹ dọhodo nuhe Ahọluduta enẹ yin po whenue e na wá po ji. Humọ, Atọ̀họ̀-Nuhihọ́ Lọ Tọn na zindonukọn nado hẹn yise to Jesu Klisti mẹ lodo dogọ, nọgodona nugbo Biblu tọn, bosọ basi zẹẹmẹ gando nujijọ aihọn tọn lẹ go po alọgọ dọdai Biblu tọn lẹ po kẹdẹdile e ko to bibasi do sọn owhe susu lẹ die.

To whelọnu lo, etẹlẹ wẹ na diọ? Mì gbọ mí ni basi zẹẹmẹ do adà yọyọ ojlofọndotenamẹ tọn delẹ he na sọawuhia to vọkan linlinnamẹwe ehe tọn mẹ ji ehe na nọ yin zinzinjẹgbonu whladopo to osun atọ̀n mẹ.a

Adà mẹhẹnlẹnnupọn tọn voovo lẹ na nọ sọawuhia to zinjẹgbonu ehe mẹ. Hosọ lọ, “Be Hiẹ Yọnẹn Ya?” na na nudọnamẹ dodonu tọn he dọnmẹdogo bo tá hinhọ́n do zẹẹmẹ kandai taun taun Biblu tọn delẹ ji. Hosọ lọ “Dọnsẹpọ Jiwheyẹwhe” na zinnudo nuhe mí sọgan plọn gando Jehovah go sọn wefọ Biblu tọn tangan delẹ mẹ ji. Adà he yin “Wehiatọ Mítọn lẹ Kanse” na na gblọndo kanbiọ paa Biblu tọn lẹ tọn. Di apajlẹ, mẹsusu wẹ nọ kanse dọ, “Be Ahọluduta Jiwheyẹwhe tọn tin to ahun towe mẹ wẹ ya?” A na mọ gblọndo lọ to weda 13 ji.

Susu hosọ he na nọ sọawuhia whẹwhẹ lẹ tọn yin awuwlena nado gọalọna whẹndo lẹ. Adà de na tin he yin “Họnhungan Ayajẹ Whẹndo Tọn Lẹ.” E na dọhodo nuhahun he nọ fọ́n to whẹndo mẹ lẹ ji bo nasọ do lehe nunọwhinnusẹ́n Biblu tọn lẹ sọgan gọalọ nado didẹ nuhahun lọ lẹ do hia. Hosọ lọ “Plọn Ovi Towe Lẹ” nasọ yin awuwlena na mẹjitọ lẹ nado nọ hia ẹ hẹ ovi yetọn lẹ. Adà ojlofọndotenamẹ tọn devo wẹ na yin “Na Jọja Mítọn Lẹ,” he na basi todohukanji tito Biblu pinplọn tọn de he na hẹn ale wá na jọja lẹ.

Hosọ devo lẹ na tin he na nọ yin awuwlena to zinjẹgbonu whladopo to osun atọ̀n mẹ ehe mẹ. “Hodo Apajlẹ Yise Yetọn Tọn” na whàn mí nado hodo apajlẹ mẹhe yin nùdego to Biblu mẹ de tọn. Di dohia, to weda 18 jẹ 21 zinjẹgbonu ehe tọn ji, hiẹ na hia kandai he whànmẹ de gando yẹwhegán Elija go bo nasọ plọn lehe mí sọgan hodo apajlẹ yise etọn tọn do. Adà he yin “Wekanhlanmẹ de sọn . . . ,” na bẹ numimọ mẹdehlan lẹ po mẹdevo lẹ po tọn hẹn sọn adà voovo aihọn lọ tọn mẹ. “Nuhe Mí Plọn sọn Jesu Dè” na basi zẹẹmẹ do nuplọnmẹ dodonu Biblu tọn lẹ ji to aliho he bọawu mẹ.

Mí deji dọ Atọ̀họ̀-Nuhihọ́ Lọ Tọn na zindonukọn nado fọnjlodotena wehiatọ he nọ na sisi Biblu bosọ jlo na yọ́n nuhe Biblu plọnmẹ taun lẹ. Todido mítọn wẹ yindọ linlinnamẹwe ehe na gọalọna we nado hẹn pekọwana ojlo towe to nugbo Biblu tọn mẹ.

ZINJẸGBONUTỌ LẸ

[Nudọnamẹ Odò Tọn]