Alọwle po Mẹjitọ-Yinyin po to Ojlẹ Opodo Tọn Ehe Mẹ
“Gli wẹ ojlẹ lọ . . . pò.”—1 KỌL. 7:29.
1. (a) Diọdo he mọ mí te to egbehe tẹlẹ wẹ tin to nuhe vẹawu nado pehẹ lẹ mẹ? (b) Naegbọn nujinọtedo whẹndo tọn he to didiọ lẹ dona duahunmẹna mí?
OHÓ Jiwheyẹwhe tọn dọ dọdai dọ “ojlẹ opodo tọn” na yin hiadogona gbọn awhàn, aigba sisọsisọ, huvẹ po azọ̀nylankan lẹ po dali. (Dan. 8:17, 19; Luku 21:10, 11) Biblu sọ na avase dọ ojlẹ awusinyẹn tọn ehe to whenuho gbẹtọvi tọn mẹ na yin ojlẹ diọdo ayidego tọn lẹ to nuyiwa gbẹtọ lẹ tọn mẹ. Dopo to nuhe na vẹawu nado pehẹ to ‘azán godo tọn’ he sinyẹnawu ehelẹ mẹ wẹ tukla to gbẹzan whẹndo tọn mẹ. (2 Tim. 3:1-4) Naegbọn diọdo ehelẹ dona duahunmẹna mí? Na yé gbayipe bosọ sinyẹn sọmọ bọ yé sọgan yinuwado nukun he Klistiani lẹ nọ yí do pọ́n alọwle po mẹjitọ-yinyin po to egbehe ji. To aliho tẹ mẹ?
2. Nukun tẹwẹ aihọn nọ yí do pọ́n alọwle po gbẹdai po to paa mẹ?
2 To egbehe, gbẹdai ko lẹzun nuhe bọawu bosọ gbayipe, podọ sọha gbẹdai lẹ tọn to jijideji to otò susu mẹ. Ṣigba, mí dona hẹn do ayiha mẹ gligli dọ pọndohlan Jehovah Jiwheyẹwhe tọn gando alọwle po gbẹdai po go gbọnvo mlẹnmlẹn na dehe mẹsusu kẹalọyi to aihọn mẹ. Eyin mọ wẹ, etẹwẹ yin pọndohlan Jehovah tọn?
3. Nukun tẹwẹ Jehovah po Jesu Klisti po nọ yí do pọ́n alọwle?
3 Jehovah Jiwheyẹwhe nọ donukun sọn mẹhe ko wlealọ lẹ si nado yin nugbonọ na opà alọwle tọn yetọn. To whenuena Jehovah kọ̀n sunnu po yọnnu tintan lọ po dopọ to alọwle mẹ, e dọ dọ “sunnu . . . na sẹbọdo asi etọn go: yé nasọ lẹzun olàn dopo.” To nukọn mẹ, Jesu Klisti vọ́ nùzindo hodidọ enẹ ji bo yidogọ dọmọ: “Enẹwutu, nuhe Jiwheyẹwhe kọndopọ mì dike gbẹtọ klan ẹn blo.” Jesu sọ dọ yinukọn dogọ dọmọ: “Mẹdepope he na jo asi etọn dai, adavo na whẹho galilọ tọn, bosọ wlealọ hẹ devo, e deayọ.” (Gẹn. 2:24; Mat. 19:3-6, 9) Enẹwutu, Jehovah po Jesu po nọ pọ́n alọwle taidi kanṣiṣa gbẹwhenu tọn de he nọ wá vivọnu kiki eyin dopo to alọwlemẹ lọ lẹ mẹ kú. (1 Kọl. 7:39) To whenuena e yindọ nuzedai wiwe de wẹ alọwle yin, mí ma dona nọ yí nukunpẹvi do pọ́n gbẹdai. Na nugbo tọn, Ohó Jiwheyẹwhe tọn dọ dọ Jehovah gbẹwanna gbẹdai he ma sọgbe hẹ Owe-wiwe.a—Hia Malaki 2:13-16; 3:6.
Nọ Yí Nukun Nujọnu Tọn do Pọ́n Alọwle
4. Naegbọn e nọ vẹna jọja Klistiani delẹ dọ yé zọ̀n plaplaji biọ alọwle mẹ?
4 Fẹnnuwiwa zanhẹmẹ tọn ko dó tadu aihọn ylankan he mẹ mí to gbẹnọ te. Yẹdide gblewa tọn susu wẹ mí nọ mọ egbesọegbesọ. Mí ma sọgan yí nukunpẹvi do pọ́n nuyiwadomẹji he yé sọgan tindo do mí ji, titengbe do jọja mítọn vivẹ lẹ ji to agun lọ mẹ. Etẹwẹ jọja Klistiani lẹ sọgan wà nado pehẹ nuyiwadomẹji ylankan enẹ, he sọgan fọ́n ojlo zanhẹmẹ tọn dote to yé mẹ eyin yé ma tlẹ jlo? Mẹdelẹ ko tẹnpọn nado pehẹ nuyiwadomẹji enẹ gbọn alọwiwle to whenuena yé gbẹ́ pò to jọja taun dali. To mọwiwà mẹ, todido yetọn wẹ nado dapana fẹnnuwiwa zanhẹmẹ tọn. Ṣigba, to ojlẹ vude godo, susu yetọn wẹ nudide enẹ ko vẹna. Etẹwutu? To whenuena jeje alọwle tọn ko wayi godo, yé wá mọdọ yewlẹ po alọwlemẹ yetọn po ma tindo nususu to kọndopọ mẹ na nuhe dù whẹho egbesọegbesọ tọn lẹ. E ma yin nupaṣamẹ dọ asu po asi po enẹlẹ nọ pehẹ nuhahun sinsinyẹn.
5. Etẹwẹ na gọalọna asu po asi po lẹ nado yin nugbonọ na opà alọwle tọn yetọn? (Pọ́n nudọnamẹ odò tọn.)
5 E sọgan vẹawu taun nado wlealọ hẹ mẹde—etlẹ yin Klistiani hatọ de—bo wá mọdọ e gbọnvo tlala na nuhe hiẹ to nukundo. (1 Kọl. 7:28) Etomọṣo, mahopọnna lehe ninọmẹ lọ sọgan vẹawu sọ, Klistiani nugbo lẹ yọnẹn dọ gbẹdai he ma sọgbe hẹ Owe-wiwe ma yin pọngbọ dagbe de na nuhahun he nọ dekọtọn sọn alọwle he ma tindo ayajẹ mẹ lẹ gba. Enẹwutu, mẹhe to azọ́n sinsinyẹn wà nado hẹn alọwle yetọn dote na yé jlo na yin nugbonọ na opà alọwle tọn yetọn lẹ jẹna sisi po alọgọ owanyinọ agun Klistiani tọn po.b
6. Nawẹ jọja Klistiani lẹ dona nọ pọnnukọnhlan alọwle gbọn?
6 Be jọja tlẹnnọ de wẹ hiẹ yin ya? Eyin mọ wẹ, nawẹ hiẹ dona nọ pọnnukọnhlan alọwle gbọn? Hiẹ sọgan dapana awubla susu eyin a whesọ kakajẹ whenue a pegan to agbasa-liho, to apọ̀nmẹ, podọ to gbigbọ-liho nado wlealọ whẹpo do bẹ haṣinṣan owanyi tọn de jẹeji hẹ Klistiani vijinu awetọnọ de. Nugbo wẹ dọ, Owe-wiwe ma dọ owhe he mẹde dona tindo taun nado wlealọ gba.c Ṣigba, Biblu dohia dọ hiẹ na wadagbe nado nọte kakajẹ whenue a zẹ̀ ojlẹ he mẹ ojlo zanhẹmẹ tọn nọ sinyẹn taun te lọ go. (1 Kọl. 7:36) Etẹwutu? Na ojlo sinsinyẹn zanhẹmẹ tọn sọgan yinuwado nulẹnpọn towe ji to aliho agọ̀ mẹ bo hẹn we basi nudide nulú tọn he sọgan wá dekọtọn do awubla mẹ to godo mẹ lẹ. Flindọ, ayinamẹ nuyọnẹn tọn he Jehovah na do alọwle ji to Biblu mẹ lẹ tin na ale po ayajẹ towe po.—Hia Isaia 48:17, 18.
Azọngban Mẹjitọ-Yinyin Tọn
7. Numimọ tẹwẹ jọja asu po asi po delẹ nọ tindo, podọ naegbọn ehe sọgan hẹn nuhahun biọ alọwle yetọn mẹ?
7 Asu po asi po he yawu wlealọ delẹ nọ lẹzun mẹjitọ to whenuena yelọsu gbẹ́ yin jọja taun. Nado dọ hójọhó, yé ma ko tindo whenu pé nado yọ́n ode awetọ ganji whẹpo viyẹyẹ lọ do wá, mẹhe nọ biọ ayidonugo to ozán po okle po. Jọwamọnu wẹ e yin dọ onọ̀ lọ ni jẹ ayidonugo lẹpo na viyẹyẹ lọ ji, podọ enẹ sọgan hẹn asu etọn whànwu. Humọ, zánnukle ninọ nado penukundo viyẹyẹ lọ go sọgan hẹn apọ̀ wá, ehe nọ hẹn nuhahun biọ haṣinṣan asu po asi po lọ lẹ tọn mẹ. Yé nọ wá mọ to ajiji mẹ dọ yé ko hẹn mẹdekannujẹ yetọn bu taun. Todin yé masọ sọgan nọ tọ́nwhẹ̀n bo nọ wà nuhe jlo yé dile yé vò nado wà do dai ba. Nukun tẹwẹ yé dona yí do pọ́n ninọmẹ yetọn he diọ lọ?
8. Nukun tẹwẹ mí dona nọ yí do pọ́n mẹjitọ-yinyin, podọ etẹwutu?
8 Kẹdẹdile mẹhe to alọwle lẹ dona yọnẹn dọ azọngban de wẹ e yin do, mẹjitọ-yinyin dona nọ yin pinpọnhlan taidi azọngban podọ lẹblanulọkẹyi de sọn Jiwheyẹwhe dè. Mahopọnna diọdo depope he viyẹyẹ de jiji sọgan hẹnwa gbẹzan Klistiani asu po asi po de tọn mẹ, yé dona wà nuhe go yé pé lẹpo nado pehẹ diọdo ehelẹ to aliho he sọgbe mẹ. To whenuena e yindọ Jehovah wẹ na nugopipe vijiji tọn gbẹtọvi lẹ, mẹjitọ lọ lẹ dona pọ́n viyẹyẹ lọ hlan taidi ‘ogú de sọn Jehovah dè.’ (Ps. 127:3) Otọ́ po onọ̀ Klistiani de po na dovivẹnu nado hẹn azọngban yetọn lẹ di taidi “mẹjitọ . . . lẹ to Oklunọ mẹ.”—Efe. 6:1.
9. (a) Etẹwẹ ovi de pinplọn nọ bẹhẹn? (b) Etẹwẹ asu de sọgan wà nado gọalọna asi etọn nado lodo to gbigbọ-liho?
9 Ovi de pinplọn nọ biọ mẹde-yido-sanvọ́ na owhe susu. E nọ yí whenu po huhlọn susu po. Asu Klistiani de dona mọnukunnujẹemẹ dọ na owhe susu to viyẹyẹ de jiji godo, e yọnbasi dọ asi etọn na nọ yin ayihafẹsẹna to opli lẹ ji podọ e sọgan nọma tindo dotẹnmẹ hundote sọmọ na oplọn mẹdetiti tọn po ayihamẹlinlẹnpọn po. Ehe sọgan bẹpla gbigbọnọ-yinyin etọn. Azọngban mẹtọn yinyọnẹn taidi mẹjitọ de nọ biọ dọ asu lọ ni wà nuhe go e pé lẹpo nado gọalọ to nukunpipedo ovi lọ go mẹ. E sọgan tẹnpọn nado súdo nuhe gbọ asi etọn go to opli ji lẹ tọn gbọn hodidọ hẹ ẹ do delẹ to nuagokun opli lọ tọn lẹ ji to whégbè dali. E sọ sọgan nọ gọalọ nado penukundo viyẹyẹ lọ go na asi etọn nido sọgan tindo mahẹ gbesisọ tọn to yẹwheho Ahọluduta lọ tọn didọ mẹ.—Hia Filippinu lẹ 2:3, 4.
10, 11. (a) Nawẹ ovi lẹ nọ yin pinplọn to “hokọnamẹ” Jehovah tọn mẹ gbọn? (b) Naegbọn mẹjitọ Klistiani susu do jẹna pipà?
10 Azọngban mẹtọn yinyọnẹn taidi mẹjitọ de nọ biọ nususu hugan awuwiwlena núdùdù, avọ̀, ohọ̀, po nukunpedomẹgo dotowhé tọn po na ovi lọ. Titengbe to ojlẹ opodo tọn he gọ́ na owù ehe mẹ, jọja lẹ tindo nuhudo nado plọn nunọwhinnusẹ́n walọ dagbe tọn he yé na hodo to gbẹzan yetọn mẹ lẹ sọn ovu whenu. Ovi lẹ dona nọ yin pinplọn “to hihò po hokọnamẹ [Jehovah] tọn po mẹ.” (Efe. 6:4) “Hokọnamẹ” ehe bẹ linlẹn Jehovah tọn lẹ didó do ayiha ovi de tọn mẹ sọn whenuena e gbẹ́ pò to viyẹyẹ pẹnyẹn-pẹnyẹn yin kaka biọ owhe aflanmẹ tọn he nọ vẹawu lẹ mẹ hẹn.—2 Tim. 3:14, 15.
11 To whenuena Jesu dọna hodotọ etọn lẹ dọ yé dona “hẹn akọta lẹpo zun nuplọntọ,” ayihaawe ma tin dọ nuhe dọ e te sọ zẹẹmẹdo dọ mẹjitọ lẹ dona nọ gọalọna ovi yetọn lẹ nado lẹzun devi. (Mat. 28:19, 20) Avùnnukundiọsọmẹnu de wẹ enẹ yin, na aihọn ehe nọ gbidikọna jọja lẹ. Enẹwutu, mẹjitọ he penugo bo plọn ovi yetọn lẹ po kọdetọn dagbe po bọ yé wá lẹzun Klistiani klandowiwe lẹ jẹna pipà mẹlẹpo tọn to agun lọ mẹ nugbonugbo. Yé ko “gbawhàn” nuyiwadomẹji aihọn tọn gbọn yise po nugbonọ-yinyin yetọn po dali taidi mẹjitọ he yọ́n azọngban yetọn lẹ.—1 Joh. 5:4.
Yé Gbọṣi Tlẹnmẹ Kavi Nọma Jivi Na Lẹndai Dagbe de Wutu
12. Naegbọn Klistiani delẹ nọ basi dide nado nọ̀ tlẹnmẹ na ojlẹ de?
12 To whenuena e yindọ “gli wẹ ojlẹ lọ . . . pò” podọ ‘ninọmẹ aihọn ehe tọn to didiọ,’ Ohó Jiwheyẹwhe tọn dotuhomẹna mí nado lẹnnupọndo ale tlẹnmẹninọ tọn lẹ ji. (1 Kọl. 7:29-31) Enẹwutu, Klistiani delẹ de nado gbọṣi tlẹnmẹ kavi nado nọ̀ tlẹnmẹ na ojlẹ de whẹpo do wlealọ. E jẹna pipà dọ yé ma nọ yí dotẹnmẹ mẹdekannujẹ tlẹnmẹninọ tọn yetọn zan nado doafọna yanwle ṣejannabi tọn lẹ. Mẹsusu gbọṣi tlẹnmẹ nado sọgan sẹ̀n Jehovah “matin agọjodogodo” kavi ayihafẹsẹnamẹ. (Hia 1 Kọlintinu lẹ 7:32-35.) Klistiani tlẹnnọ delẹ nọ sẹ̀n taidi gbehosọnalitọ kavi nọ wazọ́n to Bẹtẹli. Mẹsusu nọ tẹnpọn nado yọ́n-na-yizan na titobasinanu Jehovah tọn dogọ gbọn vivẹnudido nado pegan nado sọgan yì Wehọmẹ Azọ́nplọnmẹ Devizọnwiwa tọn dali. Na nugbo tọn, mẹhe sẹ̀n na ojlẹ de taidi lizọnyizọnwatọ whenu-gigọ́ tọn to whenuena yé gbẹ́ pò to tlẹnmẹ bo wá de nado wlealọ to godo mẹ lẹ nọ saba mọdọ nuhọakuẹ he yé plọn to owhe enẹlẹ gblamẹ gbẹ́ to ale hẹnwa na alọwle yetọn.
13. Naegbọn Klistiani asu po asi po delẹ basi dide ma nado jivi?
13 To awà delẹ ji to aihọn lọ mẹ, diọdo devo ko sọ sọawuhia to gbẹzan whẹndo tọn mẹ—enẹ wẹ yindọ asu po asi po susu ko magbe nado nọ̀ ovi ma ji. Mẹdelẹ nọ wàmọ na whẹwhinwhẹ́n akuẹzinzan tọn lẹ wutu; mẹdevo lẹ nọ wàmọ na yé jlo na vò nado doafọna agbasazọ́n he na hẹn yé jẹ adọkun de wutu. Asu po asi po Klistiani delẹ sọ tin he basi dide ma nado jivi. Ṣigba, yé nọ saba wàmọ nado vò dogọ na sinsẹ̀nzọn Jehovah tọn. Be ehe zẹẹmẹdo dọ asu po asi po ehelẹ ma nọ duvivi gbẹzan he jẹ de tọn to alọwle yetọn mẹ wẹ ya? Paali, yé nọ duvivi etọn gbau. Etomọṣo, yé nọ desọn ojlo mẹ nado yí delẹ to dona he nọ zọnpọ hẹ alọwle lẹ mẹ do sanvọ́ bo ze yanwle Ahọluduta lọ tọn lẹ do otẹn tintan mẹ. (1 Kọl. 7:3-5) Delẹ to asu po asi po enẹlẹ mẹ nọ wadevizọn na Jehovah po mẹmẹsunnu yetọn lẹ po to azọ́n lẹdo po agbegbe tọn po mẹ kavi to Bẹtẹli. Mẹdevo lẹ nọ sẹ̀n taidi gbehosọnalitọ kavi mẹdehlan. Jehovah ma na wọn azọ́n yetọn po owanyi he yé dohia na oyìn etọn po gba.—Heb. 6:10.
“Tukla to Agbasalan Mẹ”
14, 15. “Tukla to agbasalan mẹ” tẹwẹ mẹjitọ Klistiani lẹ sọgan pehẹ?
14 Apọsteli Paulu dọna Klistiani alọwlemẹ lẹ dọ yé na tindo “tukla to agbasalan mẹ.” (1 Kọl. 7:28) Ehe sọgan bẹ nuhahun agbasalilo alọwlemẹ lọ lẹ tọn, ovi yetọn lẹ kavi mẹjitọ yọnhonọ yetọn lẹ tọn hẹn. E sọ sọgan bẹ nuhahun po ayimajai he gando ovi yetọn lẹ pinplọn go lẹ po hẹn ga. Dile e yin nùdego do to bẹjẹeji hosọ ehe tọn, Biblu dọ dọdai dọ ‘azán godo tọn lẹ’ na hẹn “ojlẹ awusinyẹn tọn” he vẹawu nado pehẹ lẹ wá. Delẹ to nuhe vẹawu nado pehẹ lọ lẹ mẹ wẹ ovi he yin “tolivẹtọ do mẹjitọ go” lẹ.—2 Tim. 3:1-3.
15 Avùnnukundiọsọmẹnu sinsinyẹn de wẹ ovi lẹ pinplọn yin na mẹjitọ Klistiani lẹ. Mí ma vò sọn nuyiwadomẹji ylankan “ojlẹ awusinyẹn tọn” he mẹ mí tin te ehelẹ tọn si gba. Enẹwutu, mẹjitọ Klistiani lẹ dona to avùnho zọnmii sọta nuyiwadomẹji mẹhusudo tọn he “aihọn ehe” sọgan tindo do ovi yetọn lẹ ji. (Efe. 2:2, 3) Podọ avùn enẹ ma nọ yawu pàmẹ! Na nugbo tọn, eyin e jọ bọ visunnu kavi viyọnnu whẹndo Klistiani de tọn doalọtena Jehovah sinsẹ̀n, “tukla” de wẹ enẹ yin na mẹjitọ etọn he ko tẹnpọn nado plọn ẹn whẹ́n to nugbo mẹ lẹ.—Howh. 17:25.
“Nukunbibia Daho Na Tin”
16. “Nukunbibia” tẹwẹ Jesu dọ dọdai etọn?
16 Ṣigba, “tukla” kavi nukunbibia depope he alọwle po ovi pinplọn po nọ hẹnwa ma sọtẹ́n yijlẹdo nukunbibia daho he to nukọn ja lọ go. To dọdai he Jesu dọ gando tintin tofi etọn po vivọnu titonu ehe tọn po go mẹ, e dọmọ: “Nukunbibia daho na tin, ehe nkọ ma ko tin sọn whẹwhẹwhenu aihọn tọn kakajẹ dinvie, lala, mọnkọtọn ma to na tin gbede.” (Mat. 24:3, 21) Jesu dohia to godo mẹ dọ gbẹtọ susugege de na lùn “nukunbibia daho” ehe tọ́n. Ṣigba, titonu Satani tọn na zindonukọn nado to huhlọn godo tọn etọn lẹpo yí do yangbé Kunnudetọ Jehovah tọn he tin to jijọho mẹ lẹ tọn. Matin ayihaawe, ojlẹ awusinyẹn tọn de wẹ e na yin na mímẹpo—yọpọ po mẹho po.
17. (a) Naegbọn mí sọgan nọ pọ́n sọgodo hlan po jidide po? (b) Etẹwẹ dona nọ yinuwado nukun he mí nọ yí do pọ́n alọwle po mẹjitọ-yinyin po ji?
17 Etomọṣo, mí ma dona nọ dibu zẹjlẹgo na sọgodo. Mẹjitọ he yin nugbonọ na Jehovah lẹ sọgan donukun nado yin hihọ́ basina to pọmẹ hẹ ovi pẹvipẹvi yetọn lẹ. (Hia Isaia 26:20, 21; Zẹf. 2:2, 3; 1 Kọl. 7:14) Ṣigba todin whẹ́, na mí yọnẹn dọ mí tin to azán godo tọn lẹ mẹ wutu, mì gbọ enẹ ni yinuwado nukun he mí nọ yí do pọ́n alọwle po mẹjitọ-yinyin po to ojlẹ opodo tọn ehe mẹ ji. (2 Pita 3:10-13) Gbọnmọ dali, vlavo mí yin tlẹnnọ kavi alọwlemẹ, tindo ovi kavi lala, gbẹzan mítọn na hẹn gbégbò po pipà po wá na Jehovah po agun Klistiani tọn po.
[Nudọnamẹ odò tọn lẹ]
a Pọ́n owe lọ Vivez en gardant à l’esprit le jour de Jéhovah to hóvila lọ “Il a haï le divorce” [“Ewọ Gbẹwanna Gbẹdai”] glọ, to weda 125 ji.
b Mẹhe to pipehẹ nuhahun to alọwle mẹ lẹ na mọ alọgọ yí sọn dogbigbapọnna hosọ he sinai do alọwle ji delẹ mẹ taidi dehe sọawuhia to Atọ̀họ̀-Nuhihọ́ Lọ Tọn 15 septembre 2003 po Réveillez-vous! 8 janvier 2001 po mẹ.
c Pọ́n weta 30, “Be Yẹn Ko Wleawu Fó Na Alọwle Wẹ?” to owe Kanbiọ He Jọja lẹ Nọ Kanse—Gblọndo He Wazọ́n Lẹ mẹ.
Dogbapọn
• Naegbọn jọja Klistiani lẹ ma dona nọ zọ̀n plaplaji biọ alọwle mẹ?
• Etẹwẹ ovi de pinplọn bẹhẹn?
• Naegbọn Klistiani susu nọ gbọṣi tlẹnmẹ kavi nọ nọ̀ ovi ma ji eyin yé wlealọ?
• “Tukla” tẹwẹ mẹjitọ Klistiani lẹ sọgan pehẹ?
[Yẹdide to weda 17]
Naegbọn e do yin nuyọnẹnnu na jọja Klistiani lẹ nado whesọ whẹpo do wlealọ?
[Yẹdide to weda 18]
Asu de sọgan yí nususu wà nado gọalọna asi etọn nado tindo mahẹ gigọ́ to nuwiwa gbigbọmẹ tọn lẹ mẹ
[Yẹdide to weda 19]
Naegbọn Klistiani asu po asi po delẹ basi dide nado nọ̀ ovi ma ji?