Nuzedonukọnnamẹ Lẹ

Nado Bẹ Plọnmẹ Biblu lẹ Jẹeji to Sibigbe Tintan Osun Mars Tọn

“Gbẹtọ susu wẹ to oyà whẹdida mawadodo tọn ji to egbehe. Podọ, mahopọnna dọ togán lẹ ko dovivẹnu susu nado doalọtena ninọmẹ enẹ, e ma pà yé. Amọ́, be mì lẹndọ mẹde sọgan doalọtena whẹdida mawadodo ya?” Jotẹnna gblọndo. Do hosọ he tin to wepa godo tọn Atọ̀họ̀-Nuhihọ́ lọ Tọn janvier-mars tọn ji hia whétọ lọ bo gbadopọnna hukan awetọ to kanbiọ awetọ glọ po wefọ he yin dide lọ po. Ze linlinnamẹwe lọ lẹ donukọnna ẹn bo basi tito nado lẹkọwa nado dọhodo hosọ devo ji.

Atọ̀họ̀-Nuhihọ́ lọ Tọn Janvier-Mars

“Diblayin gbẹtọvi lẹpo wẹ nọ dibuna okú, podọ gbẹtọ nukundeji delẹ tlẹ dovivẹnu susu nado glo okú. Be mì yọ́n nuhewutu mí ma nọ jlo na kú ya? [Jotẹnna gblọndo. Enẹgodo hia Yẹwhehodọtọ 3:11.] Biblu dohia dọ Jiwheyẹwhe wẹ ko do linlẹn gbẹninọ kakadoi tọn do ahun mítọn mẹ. Hosọ ehe dọhodo vivẹnu he gbẹtọvi lẹ ko do nado gbawhàn okú tọn ji bosọ do Omẹ dopo gee he sọgan gbawhàn enẹ hia.” Ze hosọ he bẹsọn weda 4tọ ji donukọnnamẹ.

Réveillez-vous! Mars

“Pọndohlan voovo wẹ gbẹtọvi lẹ nọ tindo gando akuẹ go. Mẹdelẹ nọ lẹndọ akuẹ wẹ yin adọ̀ nuylankan lẹpo tọn. Mẹdevo lẹ nọ lẹndọ e sọgan hẹn hihọ́ po ayajẹ po wá na mí. Etẹwẹ mìwlẹ lẹn? [Jotẹnna gblọndo. Enẹgodo hia 1 Timoti 6:10.] Hosọ he bẹsọn weda 8tọ ji ehe dọhodo pọndohlan jlẹkaji tọn he Biblu dohia gando akuẹ go ji.”