OPLỌN 43

Owe Azọ́ndenamẹ Tọn Yiyizan

BIBLU yí agun Klistiani tọn jlẹdo agbasa gbẹtọvi tọn go. Awutugonu dopodopo wẹ yin nujọnu, ṣigba ‘popolẹpo ma nọ wà azọ́n dopolọ gba.’ To gbesisọmẹ hẹ enẹ, mí dona penukundo lẹblanulọkẹyi depope he yin nina mí go ganji. Ehe biọ dọ mí ni mọnukunnujẹ bo penukundo azọ́ndenamẹ hodidọ tọn depope he yin nina mí go ganji kakati nado yí nukunpẹvi do pọ́n nujọnu-yinyin hosọ delẹ tọn na mí lẹndọ hosọ devo lẹ na fọnjlodotenamẹ hugan wutu. (Lom. 12:4-8) Afanumẹ nugbonọ nuyọnẹntọ lọ wẹ tindo azọngban lọ nado wleawuna núdùdù gbigbọmẹ tọn “to osaa sisọ mẹ.” (Mat. 24:45) Mí to pinpẹn-nutọn dohia na tito enẹ eyin mí yí nugopipe mítọn lẹ zan nado wleawuna hodidọ lẹ sọgbe hẹ anademẹ he mí mọyi lẹ. Ehe nọ gọalọna nukọnyiyi agun lọ blebu tọn.

Nuhe Na Yin Yiyidogọ. To whenuena hosọ de yin didena we to wehọmẹ, hẹn ẹn diun dọ hosọ enẹ kẹdẹ ji wẹ a dọhodo. To whẹho susu mẹ, owe he mẹ azọ́n lọ na yin wiwà sọn na yin didena we. Eyin owe he ji hodidọ towe na sinai do ma yin didena we, a sọgan bẹ nudọnamẹ lẹ pli sọn owe he jlo we lẹ mẹ. Ṣigba, dile a to awuwlena hodidọ lọ, hẹn ẹn diun dọ nuzedonukọnnamẹ lọ pete sinai do hosọ heyin didena we ji. A sọ dona lẹnnupọndo mẹplidopọ towe lẹ ji ga to whenuena a to nudọnamẹ he na yin yiyizan lẹ ṣinyan.

Yí sọwhiwhe do plọn owe heyin alọdlẹndo lọ, bo keje wefọ he tin to e mẹ lẹ pọ́n. Enẹgodo lẹnnupọndo lehe a na yí ì zan po kọdetọn dagbe po ji nado hẹn ale wá na mẹplidopọ towe lẹ. De nuagokun awe kavi atọ̀n he a na yizan taidi nuagokun tangan lẹ to hodidọ towe mẹ sọn owe lọ mẹ. Mọdopolọ, de wefọ he a jlo na hia bo dọhodeji lẹ sọn owe azọ́ndenamẹ tọn lọ mẹ.

Nawẹ nuhe ji a na dọhodo lẹ dona sù sọ? Nuhe ji a sọgan dọhodo po kọdetọn dagbe po lẹ kẹdẹ wẹ dona yin yiyizan. Ma gbẹkọ aliho mẹpinplọn tọn dagbe lẹ go nado sọgan yí nudọnamẹ susu dogọ blo. Eyin delẹ to nudọnamẹ lọ mẹ ma sọgbe hẹ yanwle hodidọ towe tọn, yí adà he na gọalọna we nado jẹ yanwle towe kọ̀n lẹ kẹdẹ zan. Sọn owe azọ́ndenamẹ tọn lọ mẹ, yí nuhe na namẹ oplọn bo hẹn ale wá na mẹplidopọ towe lẹ kẹdẹ zan. Yanwle jẹhẹnu hodidọ tọn ehe mayin nado dọ onú nẹmu he ji a sọgan dọhodo gba, ṣigba nado yí nuhe ko yin didena we zan taidi dodonu hodidọ towe tọn.

Lẹndai hodidọ towe tọn mayin nado basi bladopọ azọ́n he yin didenamẹ lọ tọn poun gba. A dona wleawu nado gbà nuagokun delẹ do flinflin, basi zẹẹmẹ gigọ́ lẹ do yé ji, basi nuyijlẹdonugo yetọn, podọ vlavo na apajlẹ yọn-na-yizan yetọn tọn de. Linlẹn devo lẹ dona yin yiyizan nado dọhodo nuagokun titengbe lẹ ji sọn owe azọ́ndenamẹ towe mẹ kakati nado diọ owe enẹ.

Mẹmẹsunnu he tindo jẹhẹnu mẹplọntọ tọn lẹ sọgan yin azọ́ndena to nukọn mẹ nado wazọ́n to Opli Sinsẹ̀nzọn tọn ji. Yé mọnukunnujẹemẹ dọ dandannu wẹ e yin nado yí owe azọ́ndenamẹ tọn lọ zan kakati nado diọ ẹ po owe devo po. Mọdopolọ, mẹmẹsunnu he nọ na togunmẹ hodidọ lẹ nọ yin nina todohukanji lẹ nado hodo. Ehelẹ nọ hẹn ẹn yọnbasi nado diọada jẹ obá de mẹ, ṣigba yé nọ do nuagokun tangan he na yin hodọdeji lẹ, linlẹn he nọgodona lẹ, po wefọ he ji hodidọ lọ sinai do lẹ po hia hezeheze. Pinplọn nado yí owe azọ́ndenamẹ tọn zan taidi dodonu de to mẹpinplọn whenu yin adà titengbe de nado wleawuna azọ́ndenamẹ hodidọ tọn devo lẹ.

Azọ́nplọnmẹ ehe sọgan sọ gọalọna we nado deanana plọnmẹ Biblu whégbè tọn he to nukọnyi lẹ. A na plọn nado ze ayidonugo do owe oplọn lọ tọn ji kakati nado zẹ̀pá sọn hosọ lọ ji gbọn nùzindo onú devo lẹ he sọgan yin ojlofọndotenamẹnu ṣigba he ma yin dandannu nado mọnukunnujẹ hosọ lọ mẹ dali. Nalete, eyin a mọnukunnujẹ nupinplọn ehe mẹ ganji, a ma na tẹdo owe oplọn lọ tọn go sọmọ bọ a na gboawupo nado basi zẹẹmẹ he nuplọntọ de sọgan tindo nuhudo etọn lẹ gba.