Köbö 17 marzo täräkwata döräidi Jesús ja nire biani Ngwanta Törö jai kräke
1. ¿Dre kömikai köbö 17 marzo yete?
1 Jesús murie ketani ye nita “bä mike batire batire” o nita Ngwenta Törö jai kä kwatire kwatire te (1 Cor. 11: 26, Kukwe Kuin Ngöbökwe). Ye medenbätä, ni tö nitre kwati tuai nüke gätä ütiäte yebätä, ne kwe Ngöbökwe ni kökataribare ye rabadre tuin ütiäte ietre (Juan 3:16). Nitre nübaidi Jesús ja nire biani Ngwanta Törö jai kräke, ye kömikai sabado 17 marzo. ¿Ni niena ja ükete biarebe täräkwata ye döräikäre bäri?
2. ¿Täräkwata nitre nübaikäre drie raba ño?
2 Nitre nübaidre ño. Ñaka blitadre raire. Ni raba niere krörö: “Ñantörö. Täräkwata nebiti tita mä aune mä mräkätre nübaire gätä ütiäte nuaindi kä jökräbiti tibien köbö 5 abril yete. Jesukwe ja biani murie ketadre ye köböire dre namanina bare aune niarata dre nuainne kä nengwane, ye mikai gare nie Biblia yebiti. Ñaka ngwian käräi mäi, kä medenkänti aune ora nuäi te nuaindi ye mikata gare nete”. Kukwe driedi bämän krüte ye ngwane täräkwata Ni Mikaka Mokre bätä ¡Despertad! drie raba arato.
3. ¿Dre nuaindre ne kwe täräkwata döräidre ye rabadre ni jökrä kisete?
3 Ni jökrä nübaidre. Ni tö nitre kwati tuai nüke gätä yebätä. Ye medenbätä, nitre tuabitita nikwe, nitre tä ja tötike Bibliabätä nibe, ni mräkätre, nitre nünanka ni bäre, sribimuko nikwe bätä ni nänkä kwelate nibe o nitre mada mada gare nie, ye jökrä nikwe nübaidre siba. Arato, konkrekasion nikwe tä kukwe driere ye jökrä känti täräkwata döräidre, ye kräke nitre umbre käkwe kukwe ükadrete. Kä kwatire kwatire te täräkwata döräita ye köböire kukwe kwin namanina bare. Jesús ja nire biani ngwaninta törö jai kä känente ye ngwane meri nükani gätä yebätä, ye ni ni käi ükatekä käkwe ja töi mikani meri ye dimike ne kwe nire käkwe niara nübaibare ye kwandre ie. Akwa nirekwe nübaibare ye ñaka nämene gare ie. Ni kukwe driekä abokän nämene kukwe driere ju ju te käkwe täräkwata ye mikaninte kräke, köbö ye arabe te.
4. ¿Ñobätä ni rabadre täräkwata döräire kä jutobiti?
4 Täräkwata döräidi ye mäkwe mikadrete ni mada kräke angwane ni iti raba niken Jesús ja nire biani Ngwanta Törö jai ye näire. Mäkwe nitre nübai ye ñaka rükadre gätä yebätä, akwa mäkwe ja di ngwain täräkwata döräire ye köböire kukwe Ngöbökwe ye mäkwe mikai gare nitre madai. Mäkwe täräkwata döräidi ye käkwe mikai gare Jesús ye abokän niena Reire. Ne madakäre, mäkwe täräkwata ye döräidi kä jutobiti angwane mäkwe bämikai nitre madai, ja mräkätre konkrekasionte yei aune Jehovai, ni kökanintari kwe ye ütiäte mä kräke (Col. 3:15).