Kukwe medenbiti ni raba kukwe driere kwin ye ererebiti nuaindre
1. ¿Nitre nünanka kä jene jene känti ye ererebätä nitre kristiano kena käkwe kukwe driebare ye tä dre driere nie?
1 Nitre kristiano kena ye kukwe kwin Ngöbökwe driebare nitre kä keta kabre känti aune nitre iglesia keta kabre te yei (Col. 1:23). Käre niaratre nämene Gobran Ngöbökwe kukwei ye arabe driere, akwa nitre töi ño ño ye ererebätä niaratre nämene kukwe driere. Ñodre, nitre nünanka Judá abokän nämene Biblia mike ütiäte krubäte jai yebe Pedro blitabare angwane, Joel ni Ngöbö kukwei niekä yebätä blitabare kwe (Hech. 2:14-17). Ne madakäre, mikata gare Hechos 17:22-31 yekänti erere, Pablo blitabare ño nitre grieko ben ye mike ñärärä. Kä nengwane, kä ruäre känti nitre tä Biblia mike ütiäte jai, ye medenbätä ni rikadre kukwe driere ju ju te ngwane, ñaka töbikadre krubäte kukwe Bibliabätä ye mikakäre gare. Akwa, nire nire ñaka Biblia mike ütiäte jai o töi ñaka iglesiabätä o tärä näin iglesiate akwa ñaka kukwe Bibliabätä mike era jai yebe nikwe blitadre angwane, nikwe töbikadre kwin käne.
2. ¿Tärä o täräkwata drieta yebiti ni raba kukwe driere ño nitre tä Biblia mike ütiäte jai aune nitre ñaka Biblia mike ütiäte jai ye dimikakäre?
2 Tärä aune täräkwata yebiti ni rabadre sribire kwin. Kä nete, tärä aune täräkwata driedi ye kwita rabai sö krobu te aune täräkwata jene jene ye driedi. Ñodre, Ni Mikaka Mokre bätä ¡Despertad!, täräkwata kia aune täräkwata mada mada. Kä känti nita kukwe driere yekänti nitre ñaka tö kukwe Bibliabätä mikai gare jai angwane, kukwe meden raba nemen tuin ütiäte ietre yebätä blitadre bentre. Nikwe ñan Biblia ye kädekadrete o ñan ñäkädre texto yebätä ietre, akwa niaratre törbadre kukwe mikai gare jai angwane, ni rikadreta tuinbiti mikakäre tödeke Ngöböi aune Kukwe kwe Biblia yei. Ne madakäre, nitre tä Biblia mike ütiäte jai yebe nikwe blitadre angwane, ni raba tärä o täräkwata tä kukwe Bibliabätä mike gare ye driere ietre. Tärä o täräkwata meden drieta metrere sö yebätä, akwa ni raba tärä Dre drieta o täräkwata Mäkwe Ngöbö mika täte aune mäkwe nünain kärekäre o Mäkwe Ngöbö mika täte ye driere kä ruäre ngwane arato. Kukwe medenbiti ni raba kukwe driere kwin yebiti nikwe kukwe driedre ye ütiäte krubäte.
3. ¿Nitre ie nita kukwe driere ye ñobätä brukwä bämikata dobro ye kwrere?
3 Kä ükadrete jai. Ni brukwä ye bämikata dobro ye kwrere (Luc. 8:15). Nitre ruäre brukwä ye ükadrete bäri ne kwe kukwe metre Bibliabätä ye rabadre brukwäbätä aune ririadre. Nitre kukwe driekä siklo kena käkwe kukwe kwin Ngöbökwe nökani nitre nünanka kä jökrä känti brukwäte ye köböire kukwe kwin namani kwetre aune käi namani juto krubäte bätätre (Hech. 13:48, 52). Nita kukwe driere ño ye nikwe mikai ñärärä angwane, kukwe kwin rabai nikwe ye käi rabai juto nibätä niaratre erere arato.