Kä jürä mäbätä yei mäkwe ñaka ja ganaimana
1. ¿Ñobätä nitre ruäre ie ja ñaka nüke törö ja tötika Bibliabätä driekäre?
1 Mä ñaka rabai dirire kwin jürä mäbätä, ¿yebätä ñaka nemen nuäre mä kräke ja tötika Bibliabätä driekäre? Nitre Ngöbö mikaka täte metre kirabe, ñodre Moisés aune Jeremías, yei ja ñaka namani ruin töbätä arato sribi biani ietre ye nuainkäre (Éx. 3:10, 11; 4:10; Jer. 1:4-6). Ye medenbätä nierare ja nemen ruin ye erere nie. ¿Ni raba dre nuainne?
2. ¿Ñobätä ni ñaka rikadre jerekäbe ju ju te aune ñaka nitre mada aibe tuanemetre nitre tötike Bibliabätä?
2 Kena, jondron meden ñaka raba nemen nuainbare nie ye Jehová ñaka ribere nuaindre nie ye ni rabadre ngwen törö jai (Sal. 103:14). Niara tä ni juen ni mada tötike aune dirire ie ye ngwane, raba nemen bare nie gare ie yebätä tä nuaimana nie (Mat. 28:19, 20). Jehová ñaka tä sribi ye bien nuaindre nitre ie kukwe gare aune bäri töbätä ye aibe ie (1 Cor. 1:26, 27). Ye medenbätä, ni ñaka rikadre jerekäbe ju ju te aune ñaka nitre mada aibe tuanemetre nitre tötike Bibliabätä.
3. ¿Jehová tä ni tötike ño ni mada tötikakäre Bibliabätä?
3 Jehová tä ni tötike. Jehová tä ni tötike akwle ne kwe nikwe ni mada tötikadre (2 Cor. 3:5). Kukwe metre ñaka gare jire nitre töbätä kä nebätä ie, ye niara tä mike gare nie nitre braibe dianinkä ji ngwankäre niarakwe yebiti (1 Cor. 2:7, 8). Jesús, Dirikä Bäri Kri käkwe kukwe keta kabrebiti nitre tötikabare ye Biblia tä mike gare nie. Aune nikwe dre nuaindre nitre tötikakäre ye drieta käre nie konkrekasionte. Ne madakäre, tärä aune täräkwata keta kabre tä nikwe, ñodre tärä Dre drieta, ye tä kukwe bäri ütiäte Bibliabätä ye mike gare metre jatäri aune nuäre rükadre gare. ¡Ni mada tötikadre Bibliabätä ye nuäre nuaindre!
4. Jehovakwe ni dimikai, ¿ye ñobätä ni rabadre tö ngwen metre ie?
4 Jehová diebiti, Moisés aune Jeremías käkwe sribi nämene kisete ye nuainbare (Éx. 4:11, 12; Jer. 1:7, 8). Ye medenbätä, Jehovakwe ni dimikadre nikwe ribedre ie arato. Niarakwe ni dimikai yei nikwe tö ngwandre, ñobätä ñan aune nita ni mada tötike ye ngwane nita kukwe kwin niara kräke nuainne: kukwe metre driere niarabätä (1 Juan 3:22). Ye medenbätä nikwe ja töi mikadre kwatibe ja tötika Bibliabätä ye kömike ni madabe. Ye käkwe kä mikai juto krubäte nibätä aune jondron kwin keta kabre rabai nikwe.