Nikwe nitre dimikadre Ngöbö mike täte
1. Gätä kri Köbömä “¡Gobran Mäkwe Jatadre!” yete, ¿täräkwata meden meden mikani tuare, aune ñobätä ye kwin krubäte?
1 Gätä kri Köbömä “¡Gobran Mäkwe Jatadre!” yete täräkwata ketebu sribebare mrä mikani tuare: Mäkwe Ngöbö mika täte aune mäkwe nünain kärekäre aune keteiti abokänbätä jondron bämikani jerekäbe, Mäkwe Ngöbö mika täte. Tärä okwä tikani braibebätä, ye medenbätä nuäre kwitadre. Täräkwata Mäkwe Ngöbö mika täte aune mäkwe nünain kärekäre, ye kwita manabarera kukwe 431 jene jene yebiti.
2. ¿Nire nire kräke täräkwata ketebu ne sribebare?
2 ¿Metrere nire nire kräke täräkwata ne sribebare? Kukwe tä nemen bare kä jökräbiti tibien ye ani kädriere ruäre:
• Ni kukwe driekä tädre blite ni gwi ben, tädre tuinbiti kena o tädre tuinbiti bobukäre ye ngwane, ni gwi ye ie ñäkä ñaka gare täräbätä o ñaka nuäre ñäkädre täräbätä kräke ye rabadre gare ie.
• Ni kukwe driekä käkwe blitadre nitre blite kukwe madabiti ben, nitre ye kukweibiti tärä ñaka kwitani krubäte o tärä ruäre aibe sribebare niaratre kukweibiti. Kukwe drieta ye käi känti, nitre jökrä bäsi ie ñäkä ñaka gare tärä sribebare niaratre kukweibiti yebätä raba kwen nie arato.
• Ni kukwe driekä käkwe blitadre kisebiti kukwe driekäre nitre ie ni kukwe ruin ñakare yei, kukwe drie tädre kwe ye käi känti.
• Monso chi ie ñäkä jämi gare täräbätä yei rün törbadre kukwe metre driei.
3. ¿Täräkwata Mäkwe Ngöbö mika täte ye tä ükaninte ño jatäri?
3 Täräkwata ketebu tä ükaninte ño. Täräkwata Mäkwe Ngöbö mika täte yebätä kukwe tikani braibe, ruäre ngwane kukwe ñaka tikani nga krubäte aune texto Bibliabätä mikani täräkwata ye köräbätä ngösöri abokän tä kukwe bäri ütiäte mike gare. ¿Ñobätä sribebare ye erere? Töbike kukwe nebätä, täräkwata tikani ñaka mä kukweibiti ye ni iti käkwe biandre mäi, tärä okwä tikani krubätebätä ye ñaka rükadre gare mäi. Jondron üai bä nuäre tädre mikani täräkwata yebätä, akwa ¿mä törbadre ie? Erametre mä ñan törbadre ie. Ye erere arato, kukwe tikani krubäte täräbätä ye ñaka raba nitre ie ñäkä ñaka gare kwin täräbätä ye dimike. Ye medenbätä, täräkwata katire katire yebätä jondron üai tä mikani krubäte, aune ye tä ükaninte kwin krubäte. Kukwe tikani yebätä ja tötikadre gäre, tä täräi mikaninkä ni jie ngwankäre ja tötike jondron üai mikani ketare ketare yebätä.
4. Täräkwata Mäkwe Ngöbö mika täte aune mäkwe nünain kärekäre tä ükaninte ño jatäri ye mä raba niere ruäre.
4 Täräkwata Mäkwe Ngöbö mika täte yebätä jondron üai mikani ye arabe tä mikani Mäkwe Ngöbö mika täte aune mäkwe nünain kärekäre yebätä. Ye sribebare ja tötikakäre nitre ie ñäkä ñaka gare kwin täräbätä o tä ja kite ñäke täräbätä yei. Ni tädre ni mada tötike täräkwata Mäkwe Ngöbö mika täte yebiti angwane, ni raba täräkwata Mäkwe Ngöbö mika täte aune mäkwe nünain kärekäre yebiti ja tötika jie ngwen. Kukwe ketare ketare tä mikani página kobubätä. Kukwe ngwantarita tä mikani köräbätä kwin ye mikata gare página kobubätä yebiti. Jondron üai mikani yebätä kukwe mikata gare aune texto Bibliabätä tä mikani. Página keta kabre yebätä, rekwadro ngösöri yekänti kukwe mada mikata gare aune texto Bibliabätä tä mikani abokänbiti ja tötika raba ni ja tötikaka yebe töi nuäi ye ererebätä.
5. ¿Ñongwane aune ño ni raba täräkwata ketebu ne driere?
5 Kukwe driedre ñobiti. Kukwe drieta ju ju te ye ngwane täräkwata ketebu ye drie raba kä jökrä ngwane, rabadre tuin nuain bä angwane nuaindre, sö medenbätä kukwe drieta ye ngwane täräkwata ye drie ñaka tädre akwa nuain raba arato (rekwadro “Mä raba driere ño” ye mikadre ñärärä). Mä rikadre ni tuinbitita ye ngwane mä raba niere ni tö kukwe mikai gare jai yei, mä tö jondron mikai tuare ie aune ye bitikäre mäkwe täräkwata ye mikate ie.
6. ¿Ni raba ja tötike ño Bibliabätä täräkwata ketebu yebiti?
6 Täräkwata Mäkwe Ngöbö mika täte yebätä kukwe ngwantarita ye ñaka tä tikani, ye medenbätä ja tötikadrebätä angwane ñaka nuaindre tärä Dre drieta yebiti erere. Kä jene jene känti nitre jökrä töta nemen kukwe namani bare kira kädrieta ye kukwe nuai. Ye medenbätä kukwe namani bare kira tikani Ngöbö üai köböire tä Bibliabätä ye mäkwe mika gare jondron üai mikani yebiti ni ja tötikaka yei. Jondron üai tä mikani ye mäkwe mika gare. Mäkwe nuain kä jutobiti aune ni ja tötikaka tä töbike ño ye mäkwe nübai niere. Texto Bibliabätä tä mikani página köräbätä ngösöri yebätä mäkwe ñäkä, aune texto tä dre niere yebätä mäkwe mika töbike. Mäkwe kukwe ngwantari ie ne kwe blitadre kwe arato aune kukwe ye nüke gare ie o ñakare ye mäkwe mika gare kwin jai. Ni ja tötikaka ye tä ja tötike täräkwata Mäkwe Ngöbö mika täte aune mäkwe nünain kärekäre yebiti angwane, jondron üai ketare ketare yekänti kukwe tikani aune texto Bibliabätä tä mikani yebätä mäkwe ñäkä gwairebe ben.
7. ¿Ni ja tötikaka Bibliabätä ye ni raba dimike ño nirien ja üaire?
7 Nikwe nitre ja tötikaka dimikadre nirien ja üaire. Ja tötika Bibliabätä ye raba ni ja tötikaka töi mike ja kite ñäke täräbätä ne kwe kukwe metre Jehovakwe ye rabadre gare bäri ie (Mat. 5:3; Juan 17:3). Ye medenbätä, mätä nitre tötike täräkwata Mäkwe Ngöbö mika täte yebiti angwane, ja känenkäre ñäkädre ño täräbätä ye mä rabai driere ni ja tötikaka yei, aune ye bitikäre mä raba ja tötike ben Mäkwe Ngöbö mika täte aune mäkwe nünain kärekäre yebiti. Täräkwata medenbiti ja tötika tädre ni ja tötikaka yebe akwa niara ñaka täi juto ja ngökakäre ñöte ja tötika krütai ie ye ngwane. Ye medenbätä, mä rabadre ja tötike ja känenkäre tärä Dre drieta yebiti o tärä mada raba niara dimike kukwe Bibliabätä mike nüke gare bäri jai yebiti.
8. ¿Ñobätä mätä debe bien krubäte täräkwata mrä sribebare kukwe driekäre yebätä?
8 Nitre tö nünain kärekäre angwane, rabadre ni Gobranka kri kä jökräbiti mike täte (Isa. 55:3). Jehová tö “ni jökrä” tuai ja mike täte, nitre ye ngätäite nitre ie ñäkä ñaka gare täräbätä ye käkwe mikadre täte ie tö arato (1 Tim. 2:3, 4, Kukwe Kuin Ngöbökwe). Täräkwata mrä tä nikwe abokänbiti ni raba nitre tötike Ngöbö mikakäre täte, ¡yebätä nita debe bien krubäte!
[Rekwadro de página 3]
Mä raba driere ño
Mäkwe página 2 bätä 3 ye mika tuare ni gwi ie, aune mäkwe ngwantari ie: “¿Mä törba nünain kä ne erere te? [Mäkwe tuanmetre blite.] Biblia [o, tärä deme ne tä käbämike] gwäune Ngöbökwe Kä tibien kwitai bä nuäre aune nitre mikai nüne jäme jabe, abokän känti nitre ñaka nünain bobre aune ñaka rabai bren. Nikwe dre nuaindre nünankäre yete ye mike ñärärä. [Kukwe tä tikani página 3 yebätä mäkwe ñäkä, kukwe ye tä Isaías 55:3 mike gare.] Ni raba Ngöbö mike täte nieta nete. Akwa, ¿ño ni raba Ngöbö mike täte?”. Mäkwe página 4 aune 5, ye känä biti kukwe ngwantarita ye mikata gare ño ye mäkwe kädrie ben. Kä ñaka krubäte ni gwi yei angwane, mäkwe täräkwata ye mikate ie aune köbö ükate jai tuabitikäre aune kukwe täräkwatabätä ye kädriekäre ben.