Jesús Ja Nire Biani Ngwainta Törö jai ye nikwe käi ngwandre juto jabätä
1. ¿Jesús Ja Nire Biani Ngwainta Törö jai ye näire kä raba nemen ño bäri juto mäbätä?
1 ¿Mä törba kä tuai bäri juto jabätä sö marzo, abril aune mayo yebätä? Ye erere ngwane mäkwe kukwe driedre bäri, aune raba nuainbare mäi angwane, mäkwe prekursor ausiliar nuaindre. ¿Ñobätä yekwe kä mikai bäri juto mäbätä?
2. Nita kukwe driere bäri ye ngwane, ¿ñobätä kätä nemen bäri juto nibätä?
2 Mäkwe kä mika bäri juto jabätä. Jehovakwe ni sribebare ne kwe nikwe mikadre täte aune nikwe niara kukwei mikadre gare jai ye ngwane kä rabadre juto nibätä (Mat. 5:3). Kä rabadre juto nibätä jondron biankäre ni madai yekäre ni sribebare kwe arato (Hech. 20:35). Kukwe drieta nikwe ye tä ni mike kukwe ketebu ne nuainne: Ngöbö mike täte aune ni mada dimike. Erametre, nita kukwe driere bäri ye ngwane, kä nemen bäri juto nibätä. Ne madakäre, nita kukwe driere bäri ye ngwane, nita nuainne bäri kwin, ye köböire nita blite töi jämebiti aune kä jürä ñaka nemen krubäte nibätä blitakäre. Ne madakäre, nita kukwe driere bäri aune nitre tötike bäri Bibliabätä. Ye tä kä mike bäri juto nibätä kukwe driekäre.
3. ¿Ñobätä sö marzo aune abril ye rabai kwin krubäte prekursor ausiliar nuainkäre?
3 Sö marzo aune abril ye rabai kwin krubäte prekursor ausiliar nuainkäre ñobätä ñan aune ni raba nuainne 30 o 50 ora. Sö yebätä nikwe kä jutobiti nitre nübaidi Jesús Ja Nire Biani Ngwainta Törö jai ye kräke arato. Ye nuaindi sabado 22 marzo nemen lune 14 abril yete, köbö yete Jesús ja nire biani ye ngwainta törö jai. Konkrekasion keta kabre yete nitre kukwe driekä kwati krubäte rabai “sribi[re] gwairebe” kä medenkänti tätre kukwe driere ye jökrä känti köbö dianinkä ye näre te (Sof. 3:9).
4. ¿Mä tö prekursor ausiliar nuaindi angwane mäkwe dre nuaindre?
4 Ja ükete biare. Mä jämi nuainne angwane, ora tä ükaninte mäi jondron nuainkäre ye mäkwe mika ñärärä aune mä raba kukwe meden ükete jai yebätä mäkwe töbika ne kwe mäkwe kukwe driedre bäri sö krati o bäri te. Mäkwe orasion nuain Jehovai (Sant. 1:5). Mäkwe kukwe ye kädrie mä mräkätre aune ja mräkätre konkrekasionte yebe (Prov. 15:22). Mätä bren o mätä sribire mantre jetebe, akwa kä raba nemen juto mäbätä prekursor ausiliar ye nuainkäre.
5. ¿Jesús Ja Nire Biani Ngwainta Törö jai ye näire nikwe kukwe driei bäri angwane dre kwin rabai bare?
5 Ni Jehová mikaka täte yebätä kä tädre juto ie niara tö (Sal. 32:11). Jesús Ja Nire Biani Ngwainta Törö jai ye näire nikwe ja di ngwain kukwe driere bäri angwane, kä ñan rabai juto ni aibebätä, ñakare aune nikwe kä mikai juto ni Rün kä kwinbiti yebätä arato (Prov. 23:24; 27:11).