Ang NU—Palanan-awon sang Isa ka Tawo

ANG Albertina, apat sing makina nga DC-6B nga eroplano, manubo lang nga naglupad sa ibabaw sang kalasangan sang Aprika. Bag-o lang ini makalabay sa erport sang Ndola sa Naaminhan nga Rhodesia (karon Zambia.) Ang 16 ka sumalakay sini naglakip sa isa sang labing importante nga mga tawo sa kalibutan sadtong tion.

Sa mangitongito nga kagab-ihon, ang piloto nagliso agod maghugpa. “Mationtion sang ulihi nautod sang mga elese ang ibabaw nga bahin sang mga kahoy . . . Ang punta sang pakpak nautod, kag, sa masunod nga pila ka segundo, dugang pa nga bahin sang pakpak ang nautod. . . . Halos walo ka gatos ka tapak paubos halin sa una nga pagsag-id sa mga kahoy, ang puno sang nawala nga pakpak sang Albertina nakaigo sa tiilan sang bungyod sang mga subay. Ang eroplano naglibot kag nagbalintong pawala tubtob nagdulog ini nga nagadabadaba kag nagaatubang sa direksion nga ginhalinan sini.”

Sang makalab-ot ang tabang sa eroplano, nasapwan nila sa sulod sini ang bangkay sang 14 ka tawo nga nasunog. Ang isa nga nakalampuwas nabuhi pa sing lima ka adlaw. Pila ka yarda ang kalayuon gikan diri nasapwan ang balibalion nga lawas sang sekretaryo-heneral sang Nasyones Unidas—si Dag Hammarskjöld. Ang nagapanguna nga alagad sang katawhan, si G. NU subong amo ang pagtawag sang iban sa iya, napatay.—The Mysterious Death of Dag Hammarskjöld, ni Arthur L. Gavshon.

Ang NU kag ang mga Iglesia

Nakibot gid ang kalibutan sa pagkapatay ni Dag Hammarskjöld. Nagpalibog ang iban kon paano makapanghikot ang NU nga wala ang pagpanguna sining maila, intelihente nga tawo nga nagpakilala sang iya estilo sa iya papel subong sekretaryo-heneral.

Si Hammarskjöld ginlaragway subong isa ka Cristianong mistiko. Ang iya mga sinulat daw nagapahangop nga gintawag sia sang Dios sa iya destinasyon sa Nasyones Unidas. Sang nagapakighambal sa mga grupo sang mga iglesia, sia nagsiling nga ang pagtuo sa Dios kag sa NU dapat pareho. Sa isa ka okasyon sia nagsiling: “Ang Organisasyon [sang NU] kag ang mga iglesia dapat magbuligay sa pagpanikasog sang tanan nga tawo nga may maayong kabubut-on, walay sapayan sang ila kredo ukon porma sang pagsimba, sa pagtukod sing paghidait sa duta.” Sia man nagsiling: “Walay sapayan sang tanan nga kinatuhayan sa kinaugali kag salabton, ang mga iglesia kag ang Nasyones Unidas may pareho nga tulumuron kag duog nga hilikutan nga sa diin nagabuligay sila.”

Si Hammarskjöld man ang nagdesinyo sang Meditation Room nga yara sa publiko nga hululatan sang tinukod sang NU. Ang kuarta nga gingamit sa pagtukod sini gintipon halin sa nasamo nga grupo sang mga Muhammadano, mga Judiyo, mga Katoliko, kag mga Protestante. Sa tunga sang hululatan nga kuarto amo ang isa ka napahining nga bloke sang iron ore nga ginasugaan sang palaba nga korte sang kapawa.

Paano gintamod ni Hammarskjöld yadtong iron nga bato? Sia nagsulat: “Mahimo naton tamdon ini subong isa ka altar, wala sing unod indi bangod wala sing Dios, indi bangod isa ini ka altar sa isa ka dikilala nga dios, kundi bangod gindedikar ini sa Dios nga ginasimba sang tawo sa idalom sang madamo nga ngalan kag sa madamo nga porma.”

Binilyon ka tawo ang nagatuo sa Dios. Madamo sa ila ang nakakita kay Papa Juan XXIII, Papa Paulo VI, kag Papa Juan Paulo II subong man sa Protestante nga mga klerigo nga nagasakdag kag nagabendisyon sa organisasyon para sa paghidait. Ang Batikano may yara gani permanente nga manugpanilag sa NU. Bangod sining relihioso nga pagsakdag, ang iban nagapati nga ang NU amo ang paagi sang Dios sa pagdala sing paghidait kag kalig-onan sa duta. Bisan sa karon ginapaabot nila ang 1986 subong ang “Internasyonal nga Tuig sang Paghidait” sang NU.

Nagapati ka bala nga ang NU amo gid ang paagi sang Dios padulong sa paghidait sa duta? Nagahunahuna ka bala nga ang 40 ka tuig nga maragtas sining organisasyon nagahatag sing pamatuod sa pagpakamaayo sang Dios sa sini? Napahiusa gid bala sang NU ang mga pungsod sa paghidait?

[Laragway sa pahina 3]

Ginpangayo ni Dag Hammarskjöld ang pagsakdag sang mga iglesia para sa NU

[Ginkuhaan]

Litrato sang NU