Paano ang Paghidait Mangin Katunayan?
Ano ang pila sang daku nga mga salandaran nga nagapugong sa permanente nga paghidait nga mangin katunayan? Gikan sa aton bag-o lang nga artikulo, makilala naton ang masunod:
(1) Makagod nga paggahom sang kadalagkuan nga mga klase (politikal, militar, komersial, kag relihioso) nga nagmaniobra sa mga tawo.
(2) Isa ka sistema sang edukasyonal nga pagdihon pasad sa sobra nga nasyonalismo nga nagatudlo sing “balaan nga pagkamaiyaiyahon,” pagkasuperyor sang pungsod, indi pagsalig, kag dumot.
(3) Ang kabug-osan nga pagkontrol kag pagtuytoy sang ‘dios sining sistema sang mga butang, nga nagbulag sa painoino sang mga ditumuluo,’ nga amo, si Satanas nga Yawa.—2 Corinto 4:4.
KINAHANGLAN ang pagbalhin sang panghunahuna kag pagbalhin sang tagipusuon sa bug-os nga kalibutan. Kag nagakahulugan ina sing pagbalhin sang edukasyon—agod matudloan ang tanan nga tawo sing paghidait, gugma, kag pagtahod sa isa kag isa. Kag nagakahulugan man ina sing bug-os kalibutan nga pagbalhin sang pagkapangulo padulong sa isa ka nahiusa nga pagkapangulo nga tahuron sang tanan nga pungsod—isa ka matarong nga pangulohan sa bug-os nga kalibutan. Sa amo, nagakahulugan ina sang pagbalhin sang paggahom sa kalibutan—gikan sa paggahom ni Satanas padulong sa paggahom sang Dios! Apang paano mahanabo ining mga pagbalhin
Gintagna sang Biblia kapin sa 2,500 ka tuig ang nagligad nga sa tion sang katapusan sining sistema sang mga butang ‘ang Dios sang langit magapatindog sing ginharian nga dili gid malaglag.’ (Daniel 2:44) Amo ini ang walay katapusan nga Ginharian nga para sa amo gintudloan ni Jesus ang iya mga sumulunod nga mangamuyo: “Magkari ang imo ginharian. Himuon ang imo kabubut-on, subong sang sa langit, amo man sa duta.” (Mateo 6:9, 10) Ina nga ginharian nagakahulugan sing bag-ong paggahom ni Cristo Jesus, gikan sa langit, para sa bug-os nga duta, subong amo ang ginsulat ni manalagna Daniel: “Ang paggahom [ukon, pagkasoberano] dayon nga paggahom nga indi magtaliwan, kag ang iya ginharian indi malaglag.”—Daniel 7:13, 14.
Ining langitnon nga pangulohan sa kamut ni Cristo amo ang bag-ong kahimusan nga magabulos sa nagabahinbahin, makagud nga mga klase sang mga kadalagkuan nga nag-abuso sa katawhan sa sulod sang linibolibo ka tuig. Amo ini ang magagahom nga bahin sang “bag-ong mga langit kag bag-ong duta” nga ‘ginahulat naton suno sa saad [sang Dios], kag sa sini magapuyo ang pagkamatarong.’ (2 Pedro 3:13) Ining pangulohan amo ang matuod nga “magadihon sang palaabuton sang kalibutan,” indi ang Nasyones Unidas sa Nueva York nga ginasakdag ni Robert Muller, kabulig nga sekretaryo-heneral sang NU. Walay sapayan nga ginproklamar sang NU ang 1986 subong Internasyonal nga Tuig sang Paghidait, ang matuod nga paghidait magaabot lamang paagi sa Ginharian sang Dios, ang iya nahamut-an nga alagyan.
Ang Papel sang Edukasyon
Minilyonmilyon ka tawo ang nagahanda na sa pagpuyo sa paghidait sa idalom sang paggahom sina nga Ginharian nga pangulohan. Sa sulod sang kapin sa isa ka gatos ka tuig daku nga kampanya sa pagtudlo ang ginpasangkad sa mga pungsod agod madala ang mensahe sina nga Ginharian sa tanan nga tawo. Ayhan ginduaw ikaw sa imo puluy-an sang isa ka mahidaiton nga tiglawas sina nga pangulohan, bisan pa mahimo nga sadto nga tion wala mo marealisar ang pagkaimportante sadto nga pagduaw. Nagapakigbahin sia sa labing masangkad nga hilikuton sa pagtudlo sa maragtas sang katawhan. Sin-o ang dumuloaw? Isa sang mga Saksi ni Jehova. Kag ngaa ginaduaw kamo sang mga Saksi?
Ang mga Saksi nagatanyag nga ton-an ang Biblia upod sa bisan sin-o nga sinsero nga tawo nga nagahandum sa pagtuon tuhoy sa paagi ni Jehova padulong sa paghidait. Ining wala sing bayad nga edukasyon nagabulig sa minilyonmilyon sa “pagsalsal sang ila mga espada nga mangin mga punta sang arado kag sang ila mga bangkaw nga mangin mga galab nga inughagbas.” Si manalagna Isaias nagsiling: “Ang pungsod indi magbayaw sing espada batok sa pungsod, kag indi na sila magtuon sing inaway.”—Isaias 2:4.
Ginatuman na sang mga Saksi ni Jehova ining tagna tuhay sa mga katapo sang Nasyones Unidas, nga nagapakig-away gihapon batok sa isa kag isa paagi sa pulong ukon sa pisikal nga inaway. Kag paano ini natigayon sang mga Saksi? Paagi sa pagtuon sang Biblia agod matigayon ang panghunahuna ni Cristo tuhoy sa mga butang; paagi sa pagtuon nga ang Dios matuod gid nga gugma kag dapat nga ipakita nila ang iya gugma sa ila isigkatawo sang tanan nga pungsod kag rasa. Bangod sina nagapabilin sila nga wala sing nadampigan sa politikal nga mga hulusayon kag wala sila nagapakigbahin sa bisan anong inaway ukon sinuay, bisan ano man ang matabo.—1 Juan 4:8; Juan 13:34, 35.
Suno sa natuman nga tagna sang Biblia, malapit na ang tion nga ang Ginharian sang Dios magahikot. (Mateo 24:3-35) Sa dili madugay laglagon sang inaway sang Dios nga Armagedon ang paggahom ni Satanas upod ang tanan nagabahinbahin kag malaglagon nga politika sini. (Bugna 16:14-16; 19:17-21) Karon na ang tion sa pagliso sa Dios kag sa iya Pulong. Ang mga Saksi ni Jehova sa inyo palibot malipay sa pagbulig sa imo sa pagpamatuod para sa imo kaugalingon nga ang walay katapusan nga paghidait indi isa ka maila nga damgo kundi isa ka katunayan nga sa dili madugay magaluntad sa bug-os nga kalibutan. Ukon indi magpangalag-ag sa pagsulat sa mga manugbalhag sining magasin para sa dugang pa nga impormasyon kag bulig.
[Kapsion sa pahina 8]
“May yara bag-ong mga langit kag bag-ong duta nga aton ginahulat suno sa iya saad, kag sa sini magapuyo ang pagkamatarong.”—Pedro nga apostol
[Laragway sa pahina 9]
“Kag salsalon nila ang ila mga espada nga mga punta sang arado . . . Ang pungsod indi magabayaw sing espada batok sa pungsod, kag indi na sila magtuon sing inaway.”—Isaias nga manalagna
[Kapsion sa pahina 9]
“Paagi sa sini makilala sang tanan nga kamo mga disipulo ko, kon maghigugmaanay kamo.”—Jesucristo