Gikan sa Amon mga Bumalasa

Pagkapatay sang Bata

Salamat sa inyo isyu nahanungod sa “Pag-atubang sa Pagtaliwan sang Anak.” (Agosto 8, 1987) Bisan pa pila ka beses ako nga naghibi samtang ginabasa ko ang mga artikulo, nabuligan ako sa paghibalo nga ang ginabatyag sang iban pareho gid sa ginabatyag ko. Ang amon 24 anyos nga si Karen napatay sang Marso 1978 sang mabungguan sia sang trak sa isa ka interseksion mga pila ka bloke lamang ang kalayuon gikan sa iya balay. Ginaapresyar ko gid nga ang inyo artikulo nagsiling nga indi malain ang magbakho, kag wala ini nagapakita sing kakulang sing pagtuo sa ginasaad sang Dios nga pagkabanhaw; sa baylo, nagapakita ini sing daku nga gugma sa napatay. Nalugpayan gid ako sina. Natandog ako sang pagsulat ni ­Diane ­Krych kay David nga mahiwat sila sing sinalusalo para sa iya kon pukawon na sia ni Jehova gikan sa iya pagtulog. Ginaplano ko man nga hiwatan si Karen sing sinalusalo kon banhawon sia. Daw indi na gid ako makahulat nga makita ang iya matahom nga yuhum!

D. L., Estados Unidos

Bag-o ko lang mabasa ang inyo guwa nga “Pag-atubang sa Pagtaliwan sang Anak.” Makapamatuod ako sa pagkamaminatud-on sang tagsa ka pulong sa sini. Ang kasubo wala gid nagataliwan. Sa sulod sang 13 ka tuig daw ginabatyag ko nga sala na ang ginahimo ko bangod sang pagkasubo ko sa pagkapatay sang akon anak nga lalaki. Wala ko na karon ginabatyag nga sala ini. Daw nahaw-asan na ako karon sa pagkahibalo nga ang pagbakho wala nagapakita sing kakulang sing pagtuo sa aton daku nga Dios, si Jehova.

A. M., Estados Unidos

Luyag ko ipabutyag ang akon daku nga apresasyon sa artikulo nga “Pag-atubang sa Pagtaliwan sang Anak.” Ang amon palangga nga anak nga si John napatay sang pito ka tuig nga nagligad. Naagihan ko ang madamo nga balatyagon nga ginlaragway sa inyo artikulo—indi pagpati, pagpanghiwala, pagbatyag nga nakasala. Wala ako magpadala sa iya sing sulat apang may maleta ako nga puno sang iya mga pagkabutang. Sa akon hunahuna nagbakasyon lamang sia kag indi makakomunikar sa akon. Sa sulod sang duha ka tuig nagbatyag ako sing kapung-aw, wala nagapakig-impon sa iban, kag wala sing paglaum. Indi ko mahangpan ang akon mga ginabatyag. Maayoayo na karon ang pamatyag ko, bisan pa isa gihapon ka daku nga butang ang pagkapatay sang akon anak. Salamat gid sa pagbulig sa iban nga mahangpan ang amon mga ginabatyag kag kon anong positibo nga mga butang ang masiling ukon mahimo nila agod makabulig sila.

V. W., Estados Unidos

Bag-o ko lang matapos basa ang mga artikulo nga “Pag-atubang sa Pagtaliwan sang Anak.” Anom ka tuig na kag walo ka bulan sugod sang madula namon ang amon bugtong nga anak nga babayi bangod sang isa ka aksidente sa awto. Ang inyo mga artikulo nakabulig sa akon sa paghangop nga ang akon mga ginabatyag normal. Indi ko mabaton nga patay na sia. Ginahunahuna ko nga sia isa ka misyonero sa iban nga pungsod, bisan pa nahibaluan ko nga napatay na sia. Ginabatyag ko man ang kinahanglanon nga magpadala sa iya sing sulat. Sang nagligad lamang nga tuig nga ginbaton ko ang iya pagkapatay; narealisar ko nga bisan ano man nga pagbakho ang himuon ko indi ko na sia mabanhaw. Gani tion yadto nga magguwa ako gikan sa akon tuman nga pagpangasubo. Salamat gid sa sining artikulo.

V. B., Estados Unidos

Subong ginsambit sa pahina 14 sang ginsambit sa ibabaw nga guwa, wala ginarekomendar sang “Magmata!” ang paghimo sing mga sulat sa napatay subong bulig sa pag-agi sa proseso sang pagbakho. Ang sulat ni ­Diane ­Krych ginbalhag indi lamang agod iilustrar kon paano ang pagkabanhaw nga paglaum nagpabaskog sa iya kundi agod iilustrar man kon ano ang reaksion sang iban nga tawo kon nagabatyag sing sobra nga kasubo, agod nga ang iban makapakita sing paghangop kag kaluoy.—ED.