Ang Pagtamod sang Biblia

Droga Para sa Pagpangalipay—Ngaa Indi Dapat?

“ANG cocaine . . . mahimo nga amo ang labing mahugmay sa ginadumilian nga mga droga nga ginagamit karon sing lapnag . . . kag makalilipay gid.”

Amo ang ginsiling ni Dr. Peter Bourne sang 1974. Apat ka tuig sang ulihi subong manuglaygay sa panglawas sang White House para kay Presidente Jimmy Carter, si Dr. Bourne napilitan sa paghalin bangod sang akusasyon nga paggamit sing ginadumilian nga droga.

Sang isa ka tion ang cocaine madali nga matigayon sang tanan sa halos bisan diin—sa mga groseriya, sa mga saloon, kag gikan sa mga manugbaligya nga ginapaagi sa koreo. Sa tion sang katuigan 1880 kag 1890, sarang ini mayupyop sa porma sang dahon sang coca nga mga sigarilyo. Ginainom ini sa nanuhaytuhay nga mga alak kag mahugmay nga mga ilimnon. Bisan gani ang popular nga detektib nga si Sherlock Holmes sang Ingles nga piksion ginalaragway subong nagagamit sing cocaine sing “tatlo ka beses kada adlaw sa madamo nga bulan.”—The Sign of Four, ni Sir Arthur Conan Doyle.

Ang cocaine ginkilala bangod sang mga kinaiya sini sa pagpasag-uli sang kusog kag ginbaton subong remedyo sa sakit sang ulo, hapo, hay fever, kag sakit sang ngipon. Nangin eliksir ini para sa kadam-an. Halimbawa, sang 1884 ang pamatan-on nga si Sigmund Freud nagsulat: “Natilawan ko ini nga epekto sang coca, nga nagapugong sang pagkagutom, pagkatuyo, kag pagkakapoy kag nagapabaskog sang panghunahuna sang isa, sing mga isa ka dosena ka beses sa akon kaugalingon . . . Ang una nga dosis ukon ang sulitsulit nga mga dosis sang coca wala nagapatubas sing masupog nga handum sa paggamit sini nga pangpapagsik sing dugang pa.”—Über Coca.

Sang nagligad nga tinuig, amo man ang ginkomento tuhoy sa marijuana, nga nagdul-ong sa pila ka tawo sa pagpati nga ang paggamit sing droga indi makahalalit. Apang, sa karon makabasa ka sing madamo nga medikal nga pamatuod nga nagapakita sang kabaliskaran. Sa pagkamatuod, ang paggamit sing mga droga subong sang marijuana, cocaine, crack (isa ka porma sang cocaine), heroina, amphetamines, kag barbiturates makahalalit gid sa lawas.

Makahalalit kag Makamamatay nga mga Epekto

Ang mga mananalawsaw nagasiling nga ang mga nagamarijuana makapaabot sing gamay nga mga lapsag, kapin nga mga aksidente, kag nahalitan nga mga baga. Ang cocaine kag ang isa pa ka porma sini nga crack, gin-angot sa paranoia kag iban pa nga sintoma sang schizophrenia, sobra nga kapung-aw, indi makatulog, pagkadula sing gana, pagkadula sang seksuwal nga sugyot, sobra nga pagkaburingot, kuyap, atake sa tagipusuon, stroke, sakit sa panit ukon dalagku nga mga lap-ok, pagkadula sang mga tiil kag mga tudlo, depekto sa pagkabun-ag, impeksion sa naibabaw nga respiratoryo, indi makapanimaho, kag kamatayon. Suno sa isa ka manunulat sang siensya, “kon ang paggamit sing cocaine sa tion sang pagbusong isa ka balatian, ang epekto sini sa mga lapsag ginakabig nga isa ka problema sa pag-atipan sang panglawas sang bug-os nga pungsod.”

Ang pila ka sahi sang mga nagadroga may daku man nga katalagman nga tapikan sing AIDS. (Tan-awa ang pahina 25.) Kag madamo nga problema sa panglawas ang gin-angot sa pag-abuso sa sintetiko nga mga droga, subong sang amphetamine, barbiturate, tranquilizer, kag imported nga “designer drugs.”

Apang, walay sapayan sang kilala nga mga katalagman, ang mga tawo nagakasulay gihapon sa pagtilaw sang mga droga. Ang mga talagsa lang nagagamit sini nga mga droga nakunyag sa sini. Walay sapayan, matuod gid ang mga katalagman. Daw subong ini sang pagpaandar sa isa ka tanker sang langis padulong sa isa ka kabatuhan nga yara sa idalom sang tubig—sigurado gid ang kapahamakan.

Ang Imo Lawas—Isa ka ‘Buhi nga Halad’

Ang prinsipio nga ginpabutyag ni apostol Pablo sa Roma 12:1 may daku nga kaangtanan sa sini nga butang. Ini nagasiling: “Busa ginapakiluoy ko sa inyo, mga kauturan, bangod sang mga kaluoy sang Dios, sa pagdulot sang inyo mga lawas subong nga halad nga buhi, balaan kag kalahamut-an sa Dios, isa ka balaan nga pag-alagad upod ang inyo ikasarang sa pagpangatarungan.” Ang mga Cristiano dapat maghalad sing kapin ka makahuluganon nga mga halad sang sa sapat nga mga halad nga ginpatuman sa dumaan nga pungsod sang Israel.

Talalupangdon ang paggamit ni Pablo sa Griegong ekspresyon nga ginbadbad nga “halad nga buhi, balaan” (thy·siʹan zoʹsan ha·giʹan). Suno sa nanuhaytuhay nga mga eskolar sang Biblia, ining mga pulong may masunod nga kahulugan: Ang Israelinhon naghalad sing patay nga halad. Indi na ini mahalad liwat. Sa pagpatuhay, dapat ihalad sang isa ka Cristiano ang iya tanan nga enerhiya, nga “buhi.” (Ang Griegong berbo nga porma nga ginbadbad “buhi” nagakahulugan kon kaisa sing “magkabuhi nga may kapagros.”) Kag subong nga ang isa ka Israelinhon gindumilian sa paghalad sang sapat nga piang ukon may depekto, ginahalad sang isa ka Cristiano sa Dios ang iya labing maayo nga mga ikasarang. Kag sanglit ang lawas sang isa ka Cristiano nangin paagi sa iya pagpanghikot, ang tanan niya nga buhat kag panghunahuna upod ang ila instrumento—ang iya lawas—dapat idedikar sa Dios lamang. Mangin isa ini ka buhat sang bug-os nga pagdedikar. Indi sia ang nagapanag-iya sa iya kaugalingon. Sa amo, ang iya kabuhi, indi ang rito, amo ang matuod nga halad.

Busa, ginpalig-on ni Pablo ang mga Cristiano sang nahaunang siglo, nga samtang nagakabuhi pa sila sa duta, gamiton nila ang ila enerhiya, ang ila panglawas, kag ang bisan ano nga kinaadman ukon regalo nila sa bug-os kalag nga pag-alagad sa Dios. (Colosas 3:23) Dapat nila ihatag kay Jehova ang labing maayo nga mahalad nila sa lawas kag sa hunahuna. Malipay gid ang Dios sa sini nga mga halad.

Apang, ano ang mangin reaksion sang Dios kon sila hungod nga naghimo sing mga buhat nga nagpaluya sang ila pisikal ukon mental nga ikasarang kag nagpalip-ot pa gani sang ila kabuhi? Lapason bala sang mga Cristiano ang kasuguan kag atubangon ang katalagman nga mabuhinan ang ila katakus sa ministeryo sang Dios? Ang dimatinlo nga mga buhat mahimo nga makadiskalipikar sa ila subong mga ministro kag magaresulta pa gani sa pagtabog sa ila gikan sa Cristianong kongregasyon.—Galacia 5:19-21.

Sa karon, ang pag-abuso sang mga tawo sa mga droga kinaandan nga buhat sa bug-os nga kalibutan. Sarang bala makagamit ang isa ka tawo sina nga mga droga para sa pagpangalipay kag sa gihapon makahalad sang iya lawas subong “halad nga buhi, balaan, kalahamut-an sa Dios”? Indi lamang ang medikal nga pagpanalawsaw kag ang dimaisip nga mga eksperiensia tuhoy sa makahalapay nga mga epekto kundi ang mga prinsipio man sang Biblia ang nagahatag sing maathag nga sabat—indi!

[Laragway sa pahina 16]

“The Opium Smoker”—ni N. C. Wyeth, 1913