Ang Pagtamod sang Biblia

Pagpasakop sang Asawa—Ano ang Kahulugan Sini?

ANG PULONG sang Dios, ang Biblia, nagasiling sa Efeso 5:​22: “Ang mga asawa dapat magpasakop sa ila mga bana subong nga sa Ginuo.” Ano gid ang buot silingon sini? Dapat bala magpasakop ang asawa sa tanan nga luyag sang bana, bisan ano man ini? Indi bala sia makamatumato ukon makahatag sing tuhay nga mga opinyon sa iya bana?

Binagbinaga ang rekord sang Biblia tuhoy kay Abigail. Naghulag sia sing maalamon apang supak sa kabubut-on sang iya manggaranon nga bana, nga si Nabal. Walay sapayan sang kaayo nga ginpakita kay Nabal sang mga sumulunod ni David, nga ginpili sang Dios nga mangin hari sang Israel, “ginsinggitan sila ni [Nabal].” Naakig sa pagkawalay kabalaslan ni Nabal, naghanda si David agod patyon sia. Narealisar ni Abigail nga yara sa katalagman ang bug-os niya nga panimalay. Gin-uluuluhan niya si David. Paano?—1 Samuel 25:2-35.

Ginsilingan ni Abigail si David nga si Nabal isa ka “walay pulos nga tawo” kag ginhatag niya kay David ang mga butang nga wala ginhatag ni Nabal. Sa kinaandan, sala para sa isa ka bana ukon asawa nga ibulgar ang mga kasaypanan sang iya tiayon. Nangin rebelde bala si Abigail bangod sang paghambal kag paghulag sa sining paagi? Indi. Luyag niya luwason ang kabuhi ni Nabal kag sang iya panimalay. Wala sing rekord nga nagpakita nga dimatinahuron sia ukon independiente. Ukon nagsiling ang matig-a sing buot nga si Nabal nga wala niya maluyagi ang paagi sang pagbulig niya sa pagdumala sang iya daku nga pagkabutang. Apang sa sining ital-ital nga kahimtangan, nagmatumato sia sing maalamon. Dugang pa, nagaugyon ang Biblia sa ginhimo ni Abigail.—1 Samuel 25:3, 25, 32, 33.

Madugay antes sang panahon ni Abigail, may mga tion nga ang mga asawa sang mga patriarka nagpabutyag sing mga pagtamod kag nagpanghikot sing tuhay sa luyag sang ila mga bana. Apang, ining “balaan nga mga babayi nga nagalaum sa Dios” ginkabig subong mga halimbawa sang pagpasakop para sa Cristianong asawa. (1 Pedro 3:​1-6) Halimbawa, sang nakita ni Sara nga ang anak nga lalaki ni Abraham nga si Ismael nangin makatalagam para sa ila anak nga lalaki, nga si Isaac, namat-od sia nga palayason si Ismael. “Ginsubuan gid sa sini si Abraham.” Apang ang Dios nagsiling kay Abraham: “Dili magkasubo bangod sa ginsiling sa imo ni Sara tuhoy sa bata . . . Sunda sia.”​—⁠Genesis 21:​11, 12.

Kinahanglan ang Paghantop

Indi nian, maalamon para sa asawa nga himuon sing pilit ang nahibaluan niya nga indi maalamon ukon supak sa diosnon nga mga prinsipio, bangod lamang nagapasakop sia. Indi man sia dapat magbatyag nga balasulon bangod nagmatumato sia sa pila ka importante nga mga butang, subong sang ginhimo nanday Abigail kag Sara.

Ang pagpasakop sang asawa wala nagakahulugan nga sundon niya sa tanan nga tion ang luyag sang iya bana. Ano ang kondisyon? Kon ang nataya amo ang matarong nga mga prinsipio, mahimo nga indi sia mag-ugyon sa iya bana. Apang, dapat niya gihapon ipakita ang espiritu sang diosnon nga pagpasakop.

Huo, dapat maghalong ang asawa nga indi niya pag-unahan ang mga luyag sang iya bana bangod sang pagkaindependiente, pagkamasinupakon, ukon iban pa sayop nga motibo. Dapat sia magmahantupon, “mahangpunon,” kaangay ni Abigail.​—⁠1 Samuel 25:⁠3.

Kon Ginalikawan sang Bana ang Responsabilidad

Ang pangunang tulumuron kag katuyuan sang diosnon nga pagpasakop sang asawa amo ang pagpahamuot kay Jehova paagi sa pagkooperar sa iya bana kag pagsakdag sang iya mga desisyon. Mahapos lamang ini kon ang bana hamtong sa espirituwal. Isa ini ka hangkat kon indi sia amo sina.

Sa sini nga kaso, paano niya ini malandas? Mahimo niya sia mapangabay sing hanuot ukon makapanugda kon anong mga desisyon ang maayo para sa pamilya. Kon tugutan niya ang iya bana nga ‘manguna,’ ayhan mangin sampaton sia sa ulihi sa sini. Ang padayon nga pagsing-al sa bana nagalapas sa espiritu sang nagakaigo nga pagpasakop. (Hulubaton 21:19) Apang, kon maathag nga yara sa peligro ang pamilya bangod sa mga kasuguan sang bana, mahimo makapanugda ang asawa sang husto nga dalanon, subong sang ginhimo ni Sara.

Kon ang bana ditumuluo, mas daku ang hangkat para sa asawa. Sa gihapon, dapat sia magpasakop tubtob nga wala niya sia ginapahimo sang supak sa mga sugo sang Biblia. Apang kon amo sini ang iya ginahimo, ang isa ka Cristiano nga asawa dapat maghulag kaangay sa mga disipulo sang ginsugo sila sang hukmanan nga lapason ang mga sugo sang Dios: “Tumanon namon ang Dios subong manuggahom sangsa mga tawo.”​—⁠Binuhatan 5:⁠29.

Apang, bangod sang kakulang sing eksperiensia kag kaalam, mahimo maabusuhan bisan sang maayo nga mga bana kag asawa ang ila mga papel. Ang bana mahimo makulangan sing pasunaid; mahimo ipilit sang asawa ang iya mga naluyagan. Ano ang makabulig? Ang mapainubuson nga pagtamod sa kaugalingon importante para sa ila nga duha, sanglit “nagakasandad kita tanan sa madamo nga tion.”​—⁠Santiago 3:2.

Ginaapresyar sang madamong lalaki ang bunayag nga pagmatumato sang asawa kon ginagamit niya ini sing maalamon. Kag nagauswag ang kooperasyon kon nagapangayo sila sing pasaylo kon makasayop sila. Subong nga ginapatawad ni Jehova ang aton mga sayop sa adlaw-adlaw, dapat man naton patawaron ang iban. “Kon ang mga sayop amo ang imo ginatulok, O Jah, O Jehova, sin-o ang makatindog? Kay yara sa imo ang matuod nga pagpatawad.”​—⁠Salmo 130:​3, 4.

“Pagpasakop sa Isa kag Isa”

Nian, para sa aton kaayuhan, ang Kasulatan nagalaygay: “Magpasakop kamo sa isa kag isa sa kahadlok kay Cristo.” Tahura ninyo sing mahigugmaon ang isa kag isa; indi magsupak ukon magpaindis-indis. Ang teksto nagapadayon: “Ang mga asawa dapat magpasakop sa ila mga bana subong nga sa Ginuo, bangod ang bana amo ang ulo sang iya asawa subong nga si Cristo amo ang ulo sang kongregasyon.”​—⁠Efeso 5:​21-23.

Ang Griegong tinaga nga gingamit ni Pablo sa Efeso 5:​21, 22 nagapahangop sing pagpasakop sang isa sang iya kaugalingon, nga wala ginapilit. Kag ang pagpasakop ginahimo para sa Ginuo, indi lamang para sa kalinong sang pag-asawahay. Ang hinaplas nga kongregasyon ni Cristo kinabubut-on, kag malipayon nga nagapasakop kay Cristo. Kon ginahimo man sang asawa ang kasubong sini sa iya bana, nian ang pag-asawahay mangin malipayon kag madinalag-on.

Ang Kasulatan nagasiling man: “Higugmaon sang tagsa ka [bana] ang iya asawa subong sang iya kaugalingon.” (Efeso 5:​33; 1 Pedro 3:7) Dapat man dumdumon sang bana nga dapat man sia magpasakop sa iya ulo, kay ang Biblia nagasiling: “Ang ulo sang tagsa ka lalaki amo si Cristo.” Huo, ang lalaki dapat magpasakop sa mga panudlo ni Cristo. Kag si Cristo man, nagapasakop sa iya ulo: “Ang ulo ni Cristo amo ang Dios.” Busa, ang tanan magluwas kay Jehova may isa ka ulo. Kag ginatuman niya mismo ang iya mga kasuguan.​—⁠1 Corinto 11:​3; Tito 1:​2; Hebreo 6:⁠18.

Ang Cristianong pagpasakop timbang kag para sa kaayuhan sang lalaki kag babayi. Nagadala ini sing kalinong sa pag-asawahay kag sing pagkakontento nga mahatag lamang sang aton mahigugmaon nga Manunuga.​—⁠Filipos 4:⁠7.

[Picture Credit Line sa pahina 14]

Leslie’s