Itakod ang Proteksion nga Paha
◼ Sa Estados Unidos, ang pagbungguanay sang mga salakyan amo ang nagapanguna nga kabangdanan sang kamatayon sa tunga sang mga pamatan-on halin sa 5 pakadto sa 24 anyos ang edad.
◼ Sa Japan, ang mga aksidente sa dalanon amo ang ginatunaan sang kamatayon nga doble pa sa nagakapatay sa kanser sa suso kag apat ka pilo ang kalabawon sa mga nagakapatay sa kanser sa prostate.
◼ Sa Europa, apat ka pilo ang kalabawon sang nagakapatay nga mga tawo sa mga aksidente sa awto sangsa nagakapatay sa mga homicide.
INING makapahadlok nga mga estadistika nagapadaku sang isa sang duna nga mga katalagman sang paglakbay paagi sa awto—ang tuman nga kadasigon ginabangdan sang kamatayon. Kag labi na ang sobra kadasig nga pagpadalagan sa tapos makainom. Maayo na lang nga ang risgo sa aksidente kag kahalitan sarang mabuhinan. Paano ina posible?
Ang pagpalambo sing may kasiguruhan nga mga batasan sa pagmaneho isa ka maayong panugod. Ang pila ka eksperto sa kasiguruhan nagasiling nga 9 sa 10 ka aksidente ang sarang mapunggan ukon malikawan. Ang pagsobra sa limite nga kadasigon nga nasulat sa karatula, pagguwa pasulod sa linya sang trapiko, pagmaneho nga duot sa ginasundan nga salakyan, pagmaneho sa idalom sang impluwensia sang droga ukon alkohol, kag ang pagmaneho sing wala mamentinar sing maayo nga salakyan amo ang pila lamang ka halimbawa sang peligruso nga mga batasan sa pagmaneho. Ang pagtahod sa kabuhi kag gugma sa aton isigkatawo dapat magpahulag sa aton nga mangin mahalungon kag responsable kon nagapadalagan sing salakyan.—Mateo 7:12.
Ang proteksion nga mga paha isa pa ka simple, apang masami ginakalipatan, nga tikang para sa kasiguruhan. Suno kay Tim Hurd, humalambal para sa Department of Transportation sang Estados Unidos, “ang proteksion nga paha amo ang labing epektibo nga paagi agod maluwas ang imo kabuhi kon may matabo nga pagbungguanay. Ginadoble sini ang posibilidad nga maluwas ikaw.” Para sa kabataan nga mga pasahero, halos triple ang posibilidad nga maluwas sila kon maggamit sila sing proteksion nga mga pulungkuan para sa kabataan.a
Wala sapayan sini, ginapakita sang mga surbe nga halos un-tersia sang mga pasahero sa salakyan sa Estados Unidos ang wala nagatakod sing proteksion nga paha. Subong ginikanan, ginapat-od mo bala nga ang imo kabataan nahigot sa ila mga pulungkuan antes ikaw magpadalagan sang imo salakyan? Ang tion nga kinahanglan sa pagtakod sini takus gid.
[Mga footnote]
a Ang National Highway Traffic Safety Administration nagarekomendar: “Ang kabataan nga nagapungko sa nagatalikod nga mga pulungkuan para sa kabataan indi dapat ibutang sa unahan nga pulungkuan sang awto nga nasangkapan sing air bag nga naplastar sa atubang sang pulungkuan sa tupad sang tsuper. Ang epekto sang air bag sa nagatalikod nga pulungkuan para sa bata enkaso maghabok ini mahimo makasamad sa bata.”