Kapitulo 86

Ang Sugilanon Tuhoy sa Nadula nga Anak

SA TAPOS masugid bag-o lang sa mga Fariseo ang ilustrasyon tuhoy sa nakita liwat nga dracma, nagpadayon karon si Jesus paagi sa isa pa ka ilustrasyon. Nahanungod ini sa isa ka mahigugmaon nga amay kag sa iya pagpakig-angot sa iya duha ka anak, ang kada isa sa ila may mabug-at nga sala.

Nahauna, amo ang manghod, ang nagapanguna nga karakter sang ilustrasyon. Ginkuha niya ang iya panublion, nga wala sing pagpang-alag-ag nga ginhatag sang iya amay. Nian naglakat sia kag nadalahig sa tuman ka imoral nga dalanon sang pagkabuhi. Apang pamatii samtang ginasugid ni Jesus ang sugilanon, kag tan-awa kon mahibaluan mo kon sin-o ang ginalaragway sang mga karakter.

“May isa ka tawo,” sugod ni Jesus, “nga may duha ka anak nga lalaki. Kag ang manghod sa ila nagsiling sa iya amay, ‘Amay, ihatag sa akon ang bahin sang pagkabutang nga naigo sa akon.’ Kag ginbahinbahin [sang amay] ang iya pagkabutang sa ila.” Ano ang ginhimo sining manghod sa iya nabaton?

“Sa wala madugay nga mga adlaw,” paathag ni Jesus, “ang manghod nga anak nagtipon sang tanan nga iya kag nagpanlakatan sa malayo nga duta, kag didto gin-usikan niya ang iya pagkabutang sa patuyang nga pagpangabuhi.” Ang matuod, gingasto niya ang iya kuwarta sa pagkabuhi upod sa mga makihilawason. Sa tapos sadto nag-abot ang mabudlay nga mga tion, subong padayon nga ginasugid ni Jesus:

“Sang nahinguyang niya ang tanan, nag-abot ang dakung tiggulutom sa sadtong duta, kag nagsugod sia sa pagbatyag sing kinawad-on. Nagkadto pa sia gani kag nagpamugon sa isa sang mga pumuluyo sa sadtong duta, nga nagpadala sa iya sa mga uma niya sa pagbahog sa mga baboy. Kag ginhandum niya kuntani ang pagbusog sang iya tiyan sang mga algarroba nga ginakaon sang mga baboy, kag wala sing tawo nga naghatag sa iya.”

Daw ano ka makapanubo nga napilitan sia sa pagbahog sa mga baboy, kay ining mga sapat dimatinlo suno sa Kasuguan! Apang ang masakit gid sa anak amo ang mahapdi nga pagkagutom nga bangod sini ginhandum niya ang pagkaon para sa mga baboy. Bangod sang iya daku nga pag-antos, si Jesus nagsiling, “nahaulian sia.”

Sa pagpadayon sang iya sugilanon, si Jesus nagpaathag: “Nagsiling sia [sa iya kaugalingon], ‘Pila ka mga mamumugon sang akon amay nga may tuman nga kalan-on kag nagabugana, apang nagakapatay ako diri sa gutom! Magatindog ako kag magakadto sa akon amay kag magasiling sa iya: “Amay, nakasala ako batok sa langit kag sa imo atubangan. Indi na ako takus pagtawgon nga anak mo. Himua ako nga subong sang isa sang imo mga mamumugon.” ’ Gani nagtindog sia kag nagkadto sa iya amay.”

Yari ang butang nga binagbinagon: Kon gin-atubang sia sang iya amay kag akig nga ginsinggitan sang maglakat sia, mahimo gid nga indi sia magpauli. Mahimo nga mabalik sia sa ila lugar kag mangita sing trabaho sa iban agod nga indi niya maatubang ang iya amay. Apang, wala niya ina mahunahuna. Luyag niya magpauli sa ila puluy-an!

Sing maathag, ang amay sa ilustrasyon ni Jesus nagalaragway sa aton mahigugmaon kag maluluy-on nga langitnon nga Amay, si Jehova nga Dios. Kag mahimo nga nakilala man ninyo nga ang nadula, ukon buhaha, nga anak nagalaragway sa kilala nga mga makasasala. Ang mga Fariseo, nga ginahambal ni Jesus, nagmulay kay Jesus bangod sang iya pagkaon kaupod sining mga makasasala. Apang sin-o ang ginalaragway sang anak nga magulang?

Sang Nakita ang Nadula nga Anak

Sang ang nadula, ukon buhaha, nga anak sa ilustrasyon ni Jesus nagbalik sa balay sang iya amay, ano nga sahi sang pag-abiabi ang nabaton niya? Pamati samtang ginalaragway ini ni Jesus:

“Sang malayo pa sia, nakit-an sia sang iya amay kag ginkaluuyan, kag nagdalagan ang amay kag ginhakos sia niya kag ginhalukan sing mapinalanggaon.” Daw ano sia ka maluluy-on kag mahigugmaon nga amay, nga nagalaragway sing nagakaigo sa aton langitnon nga Amay, si Jehova!

Mahimo nga nabalitaan sang amay ang patuyang nga pagkabuhi sang iya anak. Apang gin-abiabi niya sia sa balay nga wala na maghulat para sa isa ka detalyado nga paathag. Amo man sina ka maabiabihon si Jesus, sia ang una nga nagpalapit sa mga makasasala kag mga manugsukot sang buhis, nga ginlaragway sa ilustrasyon sang buhaha nga anak.

Matuod, ang mahinantupon nga amay sa ilustrasyon ni Jesus wala sing duhaduha nga nakamutik na sang paghinulsol sang iya anak sang makita niya ang iya masinulub-on kag napung-awan nga pangguyahon sang nagpauli sia. Apang ang mahigugmaon nga inisyatibo sang amay nagpahapos para sa anak nga itu-ad ang iya mga sala, subong sang ginsaysay ni Jesus: “Kag ang anak nagsiling sa iya, ‘Amay, nakasala ako batok sa langit kag sa imo atubangan. Indi na ako takus pagtawgon nga anak mo. Himua ako nga subong sang isa sang imo mga mamumugon.’ ”

Apang, halos pa lang mabungat sang anak ang mga pulong sang ang iya amay naghulag, kag nagsugo sa iya mga ulipon: “Dali! dalha ang pinakamahal gid nga panapton, kag isul-ob sa iya, kag butangi sing singsing ang iya kamot kag sandalyas ang iya mga tiil. Kag dalha ang pinatambok nga tinday sang baka kag ihawa ini kag magkaon kita kag magkasadya, kay ining akon anak napatay kag nabuhi liwat; nadula sia kag nakita.” Kag nagsugod sila “sa pagkasadya.”

Samtang, ang “anak nga magulang [sang amay] yadto sa uma.” Tan-awa kon kilala ninyo kon sin-o ang ginalaragway niya paagi sa pagpamati sa nabilin nga sugilanon. Si Jesus nagsiling tuhoy sa anak nga magulang: “Sang nagpauli sia kag naghinampot sa balay nabatian niya ang lanton kag sinaot. Kag gintawag niya ang isa sang mga suluguon kag ginpamangkot kon ano ang kahulugan sini. Kag nagsiling sia sa iya, ‘Ang imo utod nag-abot, kag ginpaihaw sang imo amay ang pinatambok nga tinday, bangod nga nabaton niya sia nga maayo.’ Apang nangakig sia kag indi buot magsulod. Nian ang iya amay nagguwa kag nagpakiluoy sa iya. Apang nagsabat sia sa iya amay, ‘Yari karon sa sining mga tinuig nagaalagad ako sa imo kag wala gid ako maglapas sang imo sugo, apang wala mo gid ako paghatagi sing tinday nga kanding agod nga magkasadya ako upod sang akon mga abyan. Apang sang nag-abot ining anak mo, nga naghalunhon sang imo pangabuhian upod sa makihilawason nga mga babayi, gin-ihaw mo tungod sa iya ang pinatambok nga tinday.’ ”

Sin-o, kaangay sang anak nga magulang, ang wala magpakita sing kaluoy kag igtalupangod sa mga makasasala? Indi bala ang mga escriba kag ang mga Fariseo? Bangod ginmulay nila si Jesus kay gin-abiabi niya ang mga makasasala nga nagresulta sa sini nga ilustrasyon, maathag nga sila amo ang ginalaragway sang anak nga magulang.

Ginhinakpan ni Jesus ang iya sugilanon paagi sa pangabay sang amay sa iya anak nga magulang: “Anak, ikaw kaupod nakon sa gihapon, kag ang tanan nga akon imo; dapat kita magkasadya kag magkalipay, kay ining imo utod napatay kag nabuhi, kag nadula sia kag nakita.”

Busa ginbilin ni Jesus nga wala mahibalui kon ano ang ginhimo sang ulihi sang anak nga magulang. Sa pagkamatuod, sang ulihi, sang mapatay kag mabanhaw ni Jesus, “isa ka daku nga kadam-an sang saserdote ang nagmatinumanon sa pagtuo,” ayhan nagalakip sa iban sining “anak nga magulang” nga klase nga ginahambalan diri ni Jesus.

Apang sin-o sa modernong tion ang ginalaragway sang duha ka anak? Sila amo ang may bastante na nga nahibaluan nahanungod sa mga katuyuan ni Jehova agod may rason nga makasulod sila sa isa ka kaangtanan upod sa iya. Ang anak nga magulang nagala­ragway sa iban nga mga katapo sang “diutay nga panong,” ukon “kongregasyon sang panganay nga nalista sa langit.” Gin-adoptar nila ang panimuot nga kaanggid sa iya sang anak nga magulang. Indi nila luyag nga abiabihon ang dutan-on nga klase, ang “iban nga mga karnero,” nga sa banta nila nagapangagaw sing igtalupangod.

Ang buhaha nga anak, sa pihak nga bahin, nagalaragway sa iban nga katawhan sang Dios nga naglakat agod agumon ang kalipayan nga ginatanyag sang kalibutan. Apang, sang ulihi, mahinulsulon sila nga nagbalik kag sa liwat nangin aktibo nga mga alagad sang Dios. Sa pagkamatuod, daw ano ka mahigugmaon kag maluluy-on ang Amay sa ila nga nagakilala sang pagkinahanglan nila sing kapatawaran kag nagabalik sa iya! Lucas 15:​11-32; Levitico 11:​7, 8; Binuhatan 6:​7; Lucas 12:​32; Hebreo 12:​23; Juan 10:⁠16.

▪ Sin-o ang ginasugiran ni Jesus sining ilustrasyon, ukon sugilanon, kag ngaa?

▪ Sin-o ang nagapanguna nga karakter sa sugilanon, kag ano ang natabo sa iya?

▪ Sin-o ang ginalaragway sang amay kag sang manghod nga anak?

▪ Paano gin-ilog ni Jesus ang huwaran sang maluluy-on nga amay sa iya ilustrasyon?

▪ Ano ang pagtamod sang anak nga magulang sa pag-abiabi sa iya utod, kag paano naghulag sing kaanggid sa anak nga magulang ang mga Fariseo?

▪ Ano ang aplikasyon sang ilustrasyon ni Jesus sa aton adlaw?