Ang Biblia—Isa ka Libro nga Dapat Basahon
ANG Biblia tubtob karon ang may pinakalapnag sing sirkulasyon nga libro sa bug-os nga maragtas. Amo ini ang pinakadamu sing badbad, pinakadamu sing nakutlo, kag ang pinakadumaan nga libro. Huo, kag amo man ini ang libro nga nakalampuwas sa pinakamasingki nga paghingabot. Apang, sing dimalipayon, ang Biblia indi amo ang ginabasa sing pinakalapnag nga libro sa kalibutan.
Apang ang Biblia dapat basahon. Binagbinagon naton ang pila ka katunayan nahanungod sini.
Ngaa Basahon Ini sing Tayuyon?
Ang aton Ingles nga tinaga nga “Bible” naghalin sa Griegong termino nga bi·bli’a, nga nagakahulugan “diutay nga mga libro.” Nagapahanumdom ini sa aton nga ang Biblia ginahuman sang madamu nga mga libro—bisan nga ang iban sa ila indi tuman ka “diutay”! Ginsulat ini sa panag-on nga kapin sa isa ka libo ka tuig. Bisan nga ginsulat sang mga tawo, inspirado sila sang mas mataas nga Ginhalinan. Bisan karon, minilyon ang nagaugyon nga ang “bug-os nga Kasulatan inspirado sang Dios kag mapuslanon.” (2 Timoteo 3:16) Huo, ining “diutay nga mga libro” puno sang mga panghunahuna ni Jehova nga Dios mismo. (Isaias 55:9) Indi katingalahan nga naglawig ini sing tuman kadugay!
Ang batasan nga pagbasa sing tayuyon sang Kasulatan mapuslanon sang nagligad nga panahon. Dapat nga isulat sa kamut sing personal sang mga hari sang Israel ang mga kopya sang Kasugoan, nga karon importante nga bahin sang Biblia. Dapat nila ini basahon sing adlaw-adlaw, subong dalayon nga pahanumdom nga mag-alagad sing mapainubuson kag magtuman sa mga kasugoan sang Dios. (Deuteronomio 17:18-20) Sa pagkamatuod, makakuha kita sing kaanggid nga mga benepisyo gikan sa tayuyon nga pagbasa sang Biblia.
Kag daw ano ka importante nga talupangdon ang tagna sang Biblia! Bangod sang personal nga pagtuon ni manalagna Daniel sa mga Kasulatan, nahantupan niya ang importante nga tagna sa tolon-an ni Jeremias nga pagatumanon sadto.—Daniel 9:1, 2; Jeremias 29:10.
Sang si Juan Bautista nagawali, “ang mga tawo nagahulat” sa Mesias. (Lucas 3:15) Nagapakita ini nga madamu sa tunga nila ang pamilyar sa mga tagna nahanungod kay Cristo nga ginrekord sa Kasulatan. Tuman ini ka makawiwili, sanglit ang mga libro indi gilayon nga matigayon sadto nga mga adlaw. Ang mga kopya sang mga tolon-an sang Biblia dapat nga isulat sing maukod paagi sa kamut. Gani paano ang mga tawo nangin pamilyar sa sini?
Sa madamu nga kaso bangod sang publiko nga pagbasa. Si disipulo Santiago nagkomento: “Si Moises kutob sang nahaunang kaliwatan may mga nagawali sa iya sa tagsa ka siudad, kay ginabasa sia sang mga sinagoga sa tagsa ka adlaw nga inugpahuway.”—Binuhatan 15:21.
Karon mahapos para sa mga indibiduwal nga makapanag-iya sang personal nga kopya sang Biblia, kag sa dili magkubos ang pila ka “diutay nga mga libro,” matigayon sa mga pamulong sang 97 porsiento sang populasyon sang kalibutan. Busa makasulubo ang indi interesado katama sa paghibalo kon ano ang ginasiling sang Biblia sa ila.
Ginpalig-on nga Basahon Ini
Ginhimu sang mga Saksi ni Jehova nga importante nga bahin sang ila hilikuton nga ipalig-on ang tayuyon nga pagbasa sa Biblia. Sa madukot nga letra sa isa sang ila planta nga imprintahan sa bug-os kalibutan nga ulong-talatapan sa Brooklyn, Nueva York, makita ang dinalan nga “READ GOD’S WORD THE HOLY BIBLE DAILY.”
Sa kapin sa 46,000 ka kongregasyon sang mga Saksi ni Jehova sa bug-os nga kalibutan, ginahiwat ang semanal nga Theocratic Ministry School. Ang dayag nga pagbasa sang napili nga bahin sang Biblia kada semana isa ka bahin sang kurso. Ang tanan nga nagatambong may semanal nga asaynment nga basahon ang pila ka kapitulo sang Biblia sing pribado sa ila mga balay kag yadtong nagasunod sa sining eskedyul sa ulihi makabasa sang bug-os nga Biblia.
Nahisuno ini sa Theocratic Ministry School Guidebook, ang isa sang mga teksbok nga ginagamit sa sining kurso. Ini nagasiling: “Ang imo personal nga eskedyul dapat maglakip sang tion agod basahon ang Biblia mismo. May daku nga balor ang pagbasa sini halin sa panghapin tubtob sa panghapin. . . . Apang, ang imo tulumuron sa pagbasa indi dapat ang pagkubre lamang sa materyal, kundi ang pagkuha sang kabilogan nga punto-de-vista sini upod ang tinutuyo nga dumdumon. Maghinguyang sing panahon nga pamalandongan kon ano ang ginasiling sini.”—Pahina 21.
Ginabatyag sang mga Saksi ni Jehova nga ang modernong-adlaw nga mga Cristiano dapat nga may ihibalo nahanungod sa Biblia. Nagahunahuna sini, ginpadaku ang ika-20 ka siglo nga bersion sang dayag nga pagbasa sang Biblia. Ginrekord nila ang madamu sang “diutay nga mga libro” sang Biblia sa cassette tapes. Busa yadtong nagabatyag nga indi sila makahinguyang sing tion sa pagpungko kag sa pagbasa sa malawig nga tion makapamati na karon sang mga narekord nga tolon-an sang Biblia samtang nagapangabudlay sa palibot sang balay, samtang nagamaneho, kag samtang nagahimu sang madamu iban pa nga butang. Sa pagkamatuod, ang mga teyp isa man ka matahom nga bulig kon kita nagalingkod agod basahon ang Biblia. Isa ka makalilipay nga eksperiensia ang pamatian ang pagbasa sang mga Kasulatan samtang nagasunod sa imo kaugalingon nga kopya sang Biblia.
Sa bisan ano nga paagi, himusli sing bug-os ang espirituwal nga pagtuytoy nga ginaaman sa mga publikasyon sang matuod nga Cristiano nga ginaaman sang Dios paagi sa “matutom kag mainandamon nga ulipon.” (Mateo 24:45-47) Apang ngaa indi man himuon nga imo batasan nga basahon ang Biblia sing adlaw-adlaw. Ang mga benepisyo mangin daku, subong sang ginpakita sa sugo nga ginhatag sang nagligad sa Israelinhon nga lider nga si Josue: “Ining tolon-an sang kasugoan indi magbulag sa imo baba kundi magpamalandong ka sa iya sa adlaw kag gab-i, agod nga makabantay ka sa paghimu nahisuno sa dalanon nga nasulat sa sini; kay nian mapabugana mo ang imo dalanon kag nian may maayo ka nga kauswagan.”—Josue 1:8.
[Laragway sa pahina 31]
Sing tinuig na, ang isa ka karatula sa planta nga imprintahan sang Watchtower Society sa 117 Adams Street, Nueva York, nagpalig-on sa mga nagaalagi nga basahon ang Balaan nga Kasulatan