Ang Cristianong Paghinugyaw Magapadayon sa Milenio

1. Ang mga Judiyo sa Republika sang Israel wala magpanikasog nga ipatok liwat ang ano, kag ngaa?

BISAN sa Republika sang Israel (ginpatok sang 1948), ang madamo nga Judiyo nga nagapasakop gihapon sa Mosaikong Kasugoan wala magpatok liwat sang pagsaulog sing tuig sang Paghinugyaw. Madamo sing komplikasyon kon himuon nila ina. Daku nga mga problema sa ekonomiya ang mangin resulta, kay nadalahig ang mga kinamatarong sa mga pagkabutang. Ang Republika sang Israel wala nagaukupar sang bug-os nga duta nga ginpuy-an anay sang 12 ka tribo. Wala man sing templo nga may mataas nga saserdote gikan sa tribo ni Levi, bangod nadula na ang listahan sang mga tribo sang katawhan.

2. Paano ang pila ka Cristiano nagsugod na sa pagsaulog sang Paghinugyaw nga ginlandong sang Paghinugyaw sang dumaan nga Israel?

² Apang, ano ang aton kahimtangan kon tuhoy sa pagpakamaayo sang pagsaulog sing Paghinugyaw? Madumduman naton nga ang dumaan nga Paghinugyaw isa ka piesta nga tuig sang kahilwayan—ang mga Israelinhon nga nagbaligya sang ila kaugalingon sa pagkaulipon ginahilway kag ginabalik ang pinanubli nga mga duta. (Levitico 25:8-54) Sa nagligad nga artikulo, nakita naton nga ining kahimusan natapos sa Mosaikong Kasugoan nga katipan sang 33 C.E. (Roma 7:4, 6; 10:4) Nian nagsugod ang bag-ong katipan nga paagi sa amo ginpatawad sang Dios ang mga sala sang mga tumuluo, ginhaplasan sila sing balaan nga espiritu, kag gin-adoptar sila subong mga anak nga dalhon sa langit. (Hebreo 10:15-18) Apang ang mga nagabenepisyo gikan sa sining bag-ong katipan nga kahimusan “diutay nga panong” sang 144,000 “nga ginbakal gikan sa duta.” Gani paano ang minilyon sang iban pa matutom nga mga Cristiano makatigayon sing kahilwayan nga ginlandong sang Paghinugyaw?—Lucas 12:32; Bugna 14:1-4.

Isa ka Halad Para sa Tanan!

3. Daw ano ka epektibo kag dayon ang halad ni Jesus?

³ Sa wala pa ang Cristianong mga tion, ang mga benepisyo sang tuigan nga Adlaw sang Katumbasan nagadugay sing isa ka tuig lamang. Ang mga benepisyo sang halad nga gawad ni Ginuong Jesucristo padayon, wala sing katapusan. Sa amo, indi na kinahanglan nga ang antitipiko nga Mataas nga Saserdote, si Jesus, mangin tawo liwat, ihalad ang iya kaugalingon, kag dayon magbalik sa langit agod ipresentar ang bili sinang halad sing tuig-tuig sa Labing Balaan nga duog ni Jehova nga Dios. Subong ginapakita sang Kasulatan: “Si Cristo, nga nabanhaw indi na gid mapatay liwat; ang kamatayon wala na sing kagamhanan sa iya.”—Roma 6:9; Hebreo 9:28.

4, 5. (a) Ano ang nangin resulta sang pag-aplikar ni Jesus sang iya halad kutob sang Pentecostes 33 C.E.? (b) Ano ang aton pamatuod nga ang iya halad iaplikar sing masangkad pa?

⁴ Busa, sang mga tuig kutob sang Pentecostes 33 C.E., sang ang mga tumuluo nangin ginpanganak sang espiritu nga mga disipulo sang ginhimaya nga si Ginuong Jesus, nagsugod sila sa pagsaulog sing Cristianong Paghinugyaw. Sang ‘mahilway sila gikan sa kasugoan sang sala kag kamatayon,’ nakatigayon sila sing makapapagsik nga kahilwayan. (Roma 8:1, 2) Ginbantala man nila ang Cristianong mensahe agod nga mapatawad man ang mga sala sang iban, mangin hinaplas, kag mangin espirituwal nga mga anak sang Dios. Apang, nagakahulugan bala ini nga kon ang isa indi sa grupo nga limitado sa 144,000, indi sia makaeksperiensia sing makalilipay nga kahilwayan karon?

⁵ Talalupangdon may kaangtanan sa sini ang mga pulong ni apostol Pablo sa Roma 8:19-21: “Ang hanuot nga pagpaabot sang tinuga nagahulat sang pagpahayag sang mga anak sang Dios. Kay ang tinuga nasakop sa kaluyahon [bangod makasasala kag indi makadula sang sala].” Ginpadaku ni Pablo nga may yara “paglaum nga ang tinuga gid hilwayon sa kahiulipnan sang pagkamadinulunton kag makaagom sing mahimayaon nga kahilwayan sang mga anak sang Dios.” Busa, ina nga kahilwayan indi limitado sa mga nangin “mga anak sang Dios” sa langit. Ang pamilyar nga mga pulong sa Juan 3:16 nagapalig-on sina. Kag, subong nasambit na, ang hinaplas nga si apostol Juan nagsiling nga si Cristo napatay “tungod sa aton mga sala, kag indi lamang tungod sa aton kundi tungod sa mga sala sang bug-os nga kalibutan.”—1 Juan 2:2.

1919—Una nga Kahilwayan

6, 7. Sugod sang 1919, ano nga sahi sang kahilwayan ang ginbantala, kag ngaa labi na sugod sadto?

⁶ Sa modernong mga tion ang mga hinaplas nga nagasaulog sing Cristianong Paghinugyaw nagabantala sing makahilway nga maayong balita, labi na sugod sang 1919. ‘Ngaa sugod lamang sadtong tion?’ mahimo ipalibog mo kon ulihi ka lang natawo. Tan-awon naton ini nga ginatandaan nga nadalahig ang imo pag-agom sing kahilwayan.

⁷ Sa sulod sang mga dekada antes sina nga petsa, ang mga hinaplas ni Jehova nagbalhag sing mga kamatuoran sang Biblia, subong sang sa bantog nga mga serye nga Studies in the Scriptures (1886-1917). Nagpanagtag man sila sing madamo puno sing impormasyon nga mga polyeto kag mga tract. Sa tion sang Inaway Kalibutanon I, nag-abot ang pagpamatok, pagtilaw kag pag-ayag, kag naghinay ang ila pagpanghikot. Apang sang 1919 ang hinaplas nga nagkalabilin nagpadayon nga may napapagsik nga kakugi sa pagbantala sang mga kamatuoran sang Biblia. Subong nga si Jesus sang 30 C.E. nakasiling nga ginhaplas sia sa pagbantala sing “kahilwayan sa mga bihag kag sa pagpasag-uli sang panulok sa bulag,” amo man ang masiling sining modernong-adlaw nga mga hinaplas. Sa tapos sang makapakunyag nga kombension sang Septiembre 1-7, 1919,a mapagsik nga nagpadayon sila sa pagbantala sing mga kamatuoran nga naghilway sa dimaisip nga mga tawo.—Lucas 4:18.

8, 9. Sa anong kahulugan ang madamo nahilway, kag anong mga bulig ang gingamit sa pagbantala sina nga kahilwayan?

⁸ Binagbinaga, halimbawa, ang bulig sa pagtuon sa Biblia nga The Harp of God (1921), nga nagpresentar sing importante nga mga kamatuoran nga daw subong sang napulo ka kuwerdas sang arpa. Ginkilala sang libro nga “madamo ang hinadlokan sa pagtuon sing Biblia” bangod sang doktrina nga “ang silot sa malauton . . . amo ang wala sing katapusan nga pagtormento ukon pag-antos sa impierno nga nagadabadaba sa indi mapalong nga kalayo kag asupre.” Ang mga bumalasa sang halos 6,000,000 ka kopya sining libro nakatuon nga ining doktrina “indi matuod bangod sang apat ka magkatuhay kag maathag nga rason: (1) bangod indi ini makatarunganon; (2) bangod batok ini sa katarungan; (3) bangod batok ini sa prinsipio sang gugma; kag (4) bangod indi gid ini makasulatanhon.” Hunahunaa lamang ang paghilway nga nahimo sina sa mga tawo nga nagdaku nga may kahadlok sa dayon nga pag-antos sa impierno ukon sa purgatoryo!

⁹ Huo, ang kamatuoran sang Biblia nga makugi nga ginbantala sining mga hinaplas naghilway sa mga tawo sa bilog nga globo nga naulipon sa dimatuod nga mga panudlo, mga disparatis, kag dimakasulatanhon nga mga buhat (subong sang pagsimba sa katigulangan, kahadlok sa mga murto ukon malaut nga mga espiritu, kag pinansial nga paghingalit sang mga klero). Ang mga titulo gid sang pila ka bulig sa pagtuon sa Biblia nagapakita sang makahilway nga impluwensia sini sa minilyon.b Sa amo nangin matuod ang mga pulong ni Jesus, sang magsiling sia nga ang iya mga disipulo ‘magahimo sing mga buluhaton nga daku pa’ sa iya ginhimo. (Juan 14:12) Ipaanggid sa una nga hilikuton sa paghilway sa espirituwal nga ginhimo ni Jesus sa pagbantala sing “kahilwayan sa mga bihag,” ang modernong-adlaw nga mga alagad sang Dios nakahimo sing daku pa—nakalab-ot sa madamong minilyon sa bilog nga globo.

10. Ngaa mapaabot naton nga ang dugang pa kag daku pa nga kahilwayan maeksperiensiahan?

¹⁰ Apang, dumduma, nga sang unang siglo ang dugang pa nga paghilway nagsugod sang Pentecostes 33 C.E. Didto ang Cristianong Paghinugyaw nagsugod para sa “diutay nga panong” nga ginpatawad sa ila mga sala kag naghimo sa ila nga mangin “mga anak sang Dios” sa langit. Kamusta sa aton tion? Sarang bala mahilway ang minilyon pa sang debotado nga mga Cristiano gikan sa pagkaulipon sa sala kag sa amo makasaulog sing daku nga Paghinugyaw? Huo, kag ginpakita ini ni apostol Pedro sang maghambal sia tuhoy sa “tion sang pagpasag-uli sang tanan nga ginpamulong sang Dios sa baba sang iya balaan nga mga manalagna kutob sa dumaan.”—Binuhatan 3:21.

Paghinugyaw Para sa Minilyon

11. Paano ang Levitico kapitulo 25 nagapahangop nga makapaabot kita sing kahilwayan nga indi lamang para sa espirituwal nga Israel?

¹¹ Talalupangdon nga sing makaduha sa Levitico kapitulo 25 ang mga Israelinhon ginpahanumdom nga gikan sa pagtamod ni Jehova sila iya “mga ulipon” nga ginhilway niya gikan sa Egipto. (Bersikulo 42 kag 55) Ining kapitulo sang Paghinugyaw nagasambit man sang mga “pumuluyo” kag ‘mga dumuluong sa tunga nila.’ Ang katumbas nila sa karon amo ang “dakung kadam-an” nga nagapakigbahin upod sa espirituwal nga mga Israelinhon sa pagbantala sing Cristianong maayong balita.

12. Sugod sang 1935, anong makalilipay nga hitabo ang nagsugod?

¹² Sugod sang 1935, aktibo nga ginpaupod sang “maayong manugbantay” nga si Jesucristo sa hinaplas nga nagkalabilin ang iya gintawag nga “iban nga mga karnero.” ‘Gindala,’ man niya ini sila kag nagporma sila sing “isa ka panong” sa idalom sang “isa ka manugbantay.” (Juan 10:16) Ang “iban nga mga karnero” nagadamo karon sing minilyon. Kon ikaw isa sa sinang malipayon nga kadam-an, ginaisip na ikaw nga matarong subong abyan sang Dios, kag subong bahin sang tawhanon nga tinuga, nagapaabot nga ‘hilwayon gikan sa pagkaulipon sa kaduluntan’ sa tion sang nagapakari nga “tion sang pagpasag-uli sang tanan” sa duta. Indi ini wala sa lugar nga paglaum.—Roma 8:19-21; Binuhatan 3:20, 21.

13. Anong pagpakamaayo ang dapat talupangdon nga matabo labi na sa tapos sang “dakung kapipit-an”?

¹³ Sa tapos makita ni apostol Juan ang 144,000 nga nagakalipay sa Cristianong Paghinugyaw nga nagalaum pa langit, ginlaragway niya ang isa ka “dakung kadam-an,” nga nagasiling: “Ini amo sila ang nagguwa sa dakung kapipit-an, kag ginlabhan nila ang ila mga panapton nga malaba kag ginpaputi sila sa dugo sang Kordero. Busa yara sila sa atubangan sang trono sang Dios; kag nagahalad sila sa iya sing balaan nga pag-alagad sa adlaw kag gab-i sa iya templo.”—Bugna 7:14, 15.

14, 15. Ngaa ang mga katapo sang “dakung kadam-an” may pinasahi nga rason nga magkalipay karon?

¹⁴ Bisan sa karon, sa wala pa ang dakung kapipit-an, nagatuo sila sa ginpatulo nga dugo ni Cristo, kag sa amo nagabenepisyo gikan sa iya mahalaron nga kamatayon. Nagakalipay man sila nga nahilway sila gikan sa Babilonia nga Daku, nga may yara sila maayong konsiensia sa atubangan ni Jehova nga Dios, kag nga may pribilehiyo sila sa pag-ambit sa katumanan sang Mateo 24:14 paagi sa pagbantala sing maayong balita sang Ginharian sa wala pa ang katapusan.

¹⁵ Apang, kamusta ang paglaum sang dakung kadam-an nga mahilway sila gikan sa natawhan nga sala kag dikahimpitan? Malapit na bala ina nga tion? May yara kita maayong rason sa pagpati nga kaupod pa naton ang pila sang kaliwatan sang katawhan nga gintagna ni Jesucristo indi magataliwan tubtob matuman ang tanan nga gintagna. (Mateo 24:34) Busa, ang daku nga katapusan sang “konklusyon sang sistema sang mga butang” malapit na.—Mateo 24:3.

Labing Daku nga mga Bahin sang Cristianong Paghinugyaw

16. Sa diin kita karon sa pagkatuman sang katuyoan sang Dios, kag ano ang yara sa palaabuton?

¹⁶ “Ang inaway sang dakung adlaw sang Dios nga Labing Gamhanan” madasig nga nagahilapit, kag ang nagkalabilin sang “diutay nga panong,” subong man ang “dakung kadam-an” sang ila matutom kag maunungon nga mga kaupod magahupot sing integridad kay Jehova nga Dios kag magapaabot sang iya pag-amlig. Malangkagon nga ginapaabot nila ang pagdugmok ni Jehova sa tanan nga puersa sang kaaway, agod ibindikar ang iya kaugalingon subong ang Unibersal nga Soberano. Daw mangin ano kadaku gid nga bahin ini sa ila pag-agom sing Cristianong kahilwayan!—Bugna 16:14; 19:19-21; Habacuc 2:3.

17. Paano ang minilyon pa makabaton sing kahilwayan sa daku nga Paghinugyaw?

¹⁷ Magasunod ang paghari sang madaugon nga Hari Jesucristo sa ibabaw sang natinloan nga duta, nga magapalig-on pa sa unibersal nga pagkasoberano ni Jehova, kag si Jesucristo bug-os nga magakontrol sa duta subong ang Hari sang mga hari kag Ginuo sang mga ginuo. Nian iaplikar niya sing direkta ang bili sang iya halad sa minilyon ka katawhan, lakip ang ginbanhaw nga mga patay, nga nagtuo kag kinabubut-on nga nagabaton sang kapatawaran sang mga sala nga ihatag sang Dios paagi kay Cristo. Pamatod-an ini sang pagpahid sang Dios sang “tagsa ka luha sa ila mga mata, kag wala na sing kamatayon, ukon kalisod ukon paghibi ukon kasakit pa.” (Bugna 21:3, 4) Kon indi ina matuod nga kahilwayan, ano ang matuod nga kahilwayan?

18. Kaanggid sa isa ka bahin sang dumaan nga Paghinugyaw, ano ang mahanabo sa duta sa bag-ong sistema?

¹⁸ Dugang pa, ang duta indi na pagkontrolon, dagtaan, kag laglagon sang makagod nga mga indibiduwal, korporasyon, kag pangulohan sang tawo. (Bugna 11:18) Sa baylo, ibalik ini sa matuod nga mga sumilimba. Sila tugyanan sing makalilipay nga hilikuton sa pag-ambit sa li­te­ral nga katumanan sang tagna ni Isaias: “Magapatindog sila sing mga balay kag puy-an sila; kag magatanom sila sing mga ulubasan kag magakaon sang bunga nila. Indi sila magpatindog kag iban ang magapuyo; indi sila magtanom kag iban ang magakaon . . . Indi sila magpangabudlay sa wala sing pulos, ukon magpanganak nga sa kalalat-an; kay sila kaliwat nga ginpakamaayo ni Jehova.” (Isaias 65:21-25) Sa katapusan sang Milenyo nga Paghari, ang tanan nga agi sang napanubli nga sala kag dikahimpitan madula na kag ang mga matutom sang Dios sa duta magasaulog sang bug-os nga kabaskugon sang Paghinugyaw nga mangin amo ang katapusan sini. Gani ang kahilwayan nga ginlandong sang Paghinugyaw matuman na.—Efeso 1:10.

Sa Tapos sang Milenio nga Putukputukan sang Paghinugyaw

19, 20. Paano si Satanas kag ang mga demonyo magatinguha sa pagpasilabot sa mga pagpakamaayo nga magaresulta sa Paghinugyaw sa Milenio, apang ano ang mangin resulta?

¹⁹ Ang Bugna 20:1-3 nagatagna nga si Satanas nga Yawa, nga manuggahom sang mga demonyo, madula sa sulod sang isa ka libo ka tuig nga paghari ni Cristo sa ibabaw sang katawhan. Kon, sa katapusan sang Milenio, ang Yawa kag ang iya mga demonyo tugutan sa malip-ot sa pagguwa, makita sining malaut nga mga espiritu ang duta, indi sa kahimtangan nga ginbiyaan nila ini, kundi subong isa ka bilog-globo nga paraiso nga indi malaragway sa katahom. Makita nila ang duta nga ginapuy-an sang matutom nga “dakung kadam-an” kag sang binilyon nga ginbanhaw nga para sa ila si Jesucristo napatay subong isa ka halad nga gawad. Sa katapusan sang Milenio, matuman na sang Cristianong Paghinugyaw ang katuyoan sini nga hilwayon sing bug-os ang katawhan gikan sa mga epekto sang sala. (Roma 8:21) Daw ano ka makatalamay kon ang isa magtinguha sa paglaglag sinang matahom nga kahimtangan! Apang paagi sa pagtugot sang labing gamhanan nga Dios, ang Yawa magahimo sang iya katapusan nga pagtinguha sa paghimo sini, kag magasalakay sia nga may daku nga kapaslawan. Sa sini nga epekto nasulat ini sa Bugna 20:7-10, 14:

²⁰ “Sang pagkatapos sang isa ka libo ka tuig, si Satanas hubaran gikan sa iya bilanggoan kag magaguwa sa pagdaya sa mga pungsod sa apat ka pamusod sang duta, nga amo, ang Gog kag Magog, sa pagtipon sa ila sing tingob nga sa inaway. Ang ila kadamuon subong sang balas sang dagat. Kag nagsaka sila sa kalaparan sang duta kag ginlibutan nila ang dulugan sang mga balaan kag ang hinigugma nga siudad. Apang nahulog ang kalayo gikan sa langit kag naglamon sa ila. Kag ang Yawa nga nagdaya sa ila gintagbong sa linaw nga kalayo kag asupre.”

21. Kon matapos na ang Cristianong Paghinugyaw sa Milenio, ano nga reaksion sang langitnon nga mga anak sang Dios ang magapahanumdom sang Job 38:7?

²¹ Ang matuod nga kahilwayan, nga pahanabuon sang Paghinugyaw nga kahimusan, padayon nga agumon bisan diin; ang tanan nga tinuga mahilway kag magapadungog sa Isa nga amo lamang ang may ngalan nga Jehova. (Salmo 83:18) Mangin matuod ina samtang padayon nga ginatuman ni Jehova ang iya mga katuyoan sa bug-os nga uniberso. Sang gintuga ang duta, sa wala pa ginbutang sa sini ang katawhan, “ang tanan nga kabituonan sang kaagahon nag-ambahan sing tingob, kag naghinugyaw sa kalipay ang tanan nga anak sang Dios” sa matahom nga talan-awon. (Job 38:7) Daw ano pa ang paghugyaw nila kon makita nila ang duta nga ginapuy-an sang mga lalaki kag mga babayi nga nagpasundayag kag nagpamatuod sang ila bug-os nga dedikasyon kag integridad sa labing gamhanan nga Dios.

22. Ano dapat ang mangin panimuot naton, nahisanto sa laygay nga masapwan sa Salmo 150:1-6?

²² Sa tapos mabinagbinag ang tanan sa kapawa sang kasanag nga ginapasilak sang Kasulatan, wala kita sing mahimo kundi maghugyaw upod sa langit kag magsiling, Hallelujah! Ang tolon-an sang Salmo nagahinakop paagi sa sini nga laygay sa aton: “Hallelujah. Dayawa ang Dios sa Iya santuaryo; dayawa Sia sa langit, sa Iya kuta. Dayawa Sia bangod sang Iya gamhanan nga mga buhat; dayawa Sia bangod sang Iya labaw nga pagkadaku. Dayawa Sia sa tunog sang budyong; dayawa Sia sa salterio kag arpa. Dayawa Sia nga may pandereta kag sinaut; dayawa Sia sa mga tulunggon nga may mga kuerdas kag sa lantoy. Dayawa Sia nga may mga apiping nga matagsing; dayawa Sia nga may mga apiping nga mataas sing tunog. Ang tagsa ka butang nga may ginhawa magdayaw sa GINUO. Hallelujah.”—Salmo 150:1-6, Tanakh Bible (1985), Jewish Publication Society of America.

[Mga footnote]

Paano Mo Sabton?

◻ Gikan sa ano ginhilway ang mga disipulo ni Jesus sang Pentecostes 33 C.E., nga nagtanda sang pagsugod sang ano para sa ila?

◻ Ngaa may rason nga paabuton ang kahilwayan nga daku pa sa natabo sang unang siglo?

◻ Ano nga sahi sang paghilway ang nagakatabo kutob sang 1919?

◻ Paano kag san-o ang “iban nga mga karnero” makabenepisyo gikan sa daku nga Paghinugyaw?

◻ Sa tapos sang putukputukan sang Paghinugyaw, ano ang kahimtangan sang duta?

[Laragway sa pahina 25]

Ginbantala ang kahilwayan sa Cedar Point, 1919

[Laragway sa pahina 26]

Ang “iban nga mga karnero” magaambit sa Paghinugyaw sa Milenio