Magpakita sing Kalangkag sa Pagwali sing Maayong Balita
“Nalangkag gid ako nga iwali ang maayong balita sa inyo man.”—ROMA 1:15.
1, 2. Ano sa masami ang reaksion sang mga tawo sa emerhensya?
“NAGHALIN sila gikan sa tanan nga bahin . . . ginatos ka boluntaryo ang nag-abot sa duha ka distrito, upod ang mga trak nga puno sing kalan-on kag panapton, kag nagpatindog sila sing mga balaybalay nga maibakwitan, ang iban nagpangabudlay sing 18 pa 20 ka oras kada adlaw, ang iban wala sing tulog sa sulod sang una nga mga inadlaw sang mabulwang ang alubaybay.”
2 Amo sina ang reaksion sang mga tawo sang magbaha sa isa ka sentral nga komunidad sang California sang nagligad nga tigpamulak, nga nagtiklod sa 24,000 ka tawo sa pagpalagyo agod maluwas. Huo, kon may matabo nga mga kalamidad—halin sa lokal nga mga baha kag mga linog tubtob sa nuklear nga mga aksidente—ang mga tawo masami nga nagaboluntaryo sing kinabubut-on kag mapagsik nga nagabulig. Ginakalukos nila ang ila mga pako, kon sa aton pa, ginaatubang ang madamo nga katalagman kag mga kabudlayan, kag malangkagon nga nagabulig sa iban—bisan sa mga dumuluong.
Hilingagawon nga Tion
3. Anong daku nga emerhensya ang ginaatubang karon sang katawhan?
3 Ang katawhan sa karon nagaatubang sa pinakadaku nga kalamidad sa maragtas. Indi ini bangod sang halit nga ginahimo sang tawo sa palibot, sang peligro sang nuklear nga inaway, ukon sang pagdugang sang krimen kag kasingki, bisan pa makatalagam ining mga butang. Sa baylo, ang katawhan nagaatubang sang gintawag ni Jesucristo nga “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo liwat.” Agod ipakita kon daw ano ka makahalapay ang “dakung kapipit-an,” si Jesus nagsiling pa: “Sa kamatuoran, kon wala mapalip-ot yadtong mga adlaw, wala kuntani sing unod nga maluwas.”—Mateo 24:21, 22.
4. Sa atubangan sina nga emerhensya, ano dapat ang reaksion naton?
4 Ano ang reaksion mo kon nahibaloan mo nga madamo nga tawo, lakip ang iban nga suod sa imo, ang malaglag sa dili madugay sa sina nga kapipit-an? Luyag mo bala magbulig? Dumduma ang matagnaon nga palanan-awon ni Ezequiel tuhoy sa tawo nga may tintirohan sang sekretaryo. Ginsugiran sia nga ang mga nakabaton lamang sing simbuliko nga tanda sa ila agtang ang maluwas sa kalaglagan sang Jerusalem, kag sia ang magahimo sadtong nagaluwas kabuhi nga tanda. Ano ang ginhimo niya? “Nahimo ko suno sa ginsugo mo sa akon,” report niya.—Ezequiel 9:1-11.
5. Anong hilikuton ang ginsugo sa aton nga himuon naton, kag daw ano ka hilingagawon ini?
5 Nagapakita man bala ikaw sina nga kahanda kag kalangkag subong sadtong tawo nga napanaptan sing lino nga naghimo gid sang ginsugo ni Jehova? Ano ang ginsugo ni Jehova? Paagi sa iya Anak, nga si Jesucristo, sia nagsugo: “Busa lakat kamo kag himuon nga mga disipulo ang tanan nga kapungsuran, . . . nga nagatudlo sa ila sa pagtuman sang tanan nga ginsugo ko sa inyo.” (Mateo 28:19, 20) Isa ini ka nagaluwas kabuhi nga hilikuton subong sadtong simbuliko nga pagtanda sa mga agtang sang adlaw ni Ezequiel. Ang bisan sin-o nga wala nagabaton kag mangin disipulo ni Jesucristo malaglag sa kamot sang Pangulo nga Manuglaglag sang Dios. (2 Tesalonica 1:6-8) Makita mo bala ang pagkahilingagawon? Ginapakita mo bala ini paagi sa pagpakita sing kalangkag sa pagwali sing maayong balita?
Pagkalangkag—Kon Paano Ginapakita?
6. Ano ang kahulugan sang “pagkalangkag”?
6 Ang katawhan ni Jehova, sa kabilugan, nakahangop sa pagkahilingagawon sang tion. Kita tanan nagakalangkag nga madamo ang maluwas sa nagapakari nga “dakung kapipit-an.” Ang pagkalangkag, suno sa isa ka diksionaryo, amo ang “hanuot ukon mabaskog nga handom sa pagtinguha ukon sa pagtigayon sing isa ka butang.” Ang isa nga nagakalangkag sa isa ka butang nagahugod sang iya hunahuna kag aksion sa pagtigayon sini. Himuon niya ang tanan nga masarangan niya sa paglandas sang bisan anong balagbag kag upang, kag magapadayon sia sa paghimo sini tubtob nga malab-ot niya ang iya tulumuron. Amo sina ang ginbatyag ni apostol Pablo nahanungod sa iya ministeryo, kag nagakaigo nga ilugon naton sia.—1 Corinto 4:16.
7. Ngaa luyag ni Pablo magkadto sa Roma?
7 Binagbinaga, halimbawa, ang mga pulong ni Pablo sa mga Cristiano sa Roma, sa Roma 1:13-16. “Makapila ako nga nagtuyo sa pagkadto sa inyo,” siling niya sa ila. Ngaa? “Agod nga may bunga ako sa inyo man,” paathag niya. Buot bala silingon sini nga ang katuyuan lamang ni Pablo amo nga duawon ang kauturan sa Roma kag ayhan palig-unon sila sa pagpalambo sing dugang pa sang “mga bunga sang espiritu,” subong amo ang ginasiling sang iban nga mga komentarista? (Galacia 5:22, 23) Wala, kay ang iya dugang pa nga mga pulong “subong sa tunga sang iban nga mga pungsod” maathag nga nagapakita nga tuyo niya nga matigayon ang mga bunga sang Ginharian sa tunga sang di-Cristiano nga komunidad didto sa Roma. Luyag niya dalhon ang maayong balita sa Roma kag ayhan gikan didto padulong sa iban nga duog.—Roma 15:23, 24.
8. Paano si Pablo ‘nasablagan’ sa pagkadto sa Roma?
8 “Apang tubtob karon ginasablagan ako,” siling ni Pablo. Ginasablagan sang ano? Masako gid bala sia sa personal nga mga butang nga indi sia makakadto? Bueno, si Pablo isa ka masako nga tawo apang indi sa personal nga mga interes. Sang magsulat sia sa mga taga-Roma (mga 56 C.E.), natapos na niya ang duha ka masangkad nga paglakbay subong misyonero kag masako nga nagahimo sang iya ikatlo. Sa masami, sa sining mga paglakbay gintuytuyan sia sang balaan nga espiritu sa espisipiko nga mga teritoryo. (Tan-awa ang Binuhatan 16:6-9.) Bisan sang ginasulat niya ang iya sulat, nahuman na ang plano nga magkadto sia sa Jerusalem “agod mag-alagad sa mga balaan” didto. (Roma 15:25, 26) Kag nakaeksperiensia man sia sing iban pa nga mga ‘kasablagan’ nga subong sini.—Tan-awa ang 2 Corinto 11:23-28.
9. Paano si Pablo nagpakita sing kalangkag sa pagwali sing maayong balita?
9 Walay sapayan sina, wala magbatyag si Pablo nga madamo na sia sing hilikuton, ukon nangatarungan sia nga may asaynment na sia kag kadamo sadto. Luyag niya maghimo sing dugang pa. Sa kamatuoran, sia nagsiling: “Nalangkag gid ako nga iwali ang maayong balita sa inyo man nga yara sa Roma.” Amo sadto ang iya ginakalangkagan! Sing nagakaigo, si Propesor F. F. Bruce sa iya libro nga The Epistle of Paul to the Romans nagsiling sini tuhoy sa apostol: “Ang pagbantala sing ebanghelyo yara sa iya dugo, kag indi niya malikawan ini; wala gid sia nagapahuway kundi pirme niya ginahimo ini, nga nagabayad sing dugang pa sa sina nga utang nga iya nautang sa tanan nga katawhan—utang nga indi gid niya mabayaran sing bug-os tubtob nagakabuhi sia.” Amo bala sina ang pagtamod mo sa ministeryo?
10. Ano nga mga ‘kasablagan’ ang mahimo yara sa aton dalanon, apang paano naton ini atubangon?
10 Ang tanan nga katawhan ni Jehova masako karon sa madamo nga salabton. Ang iban may mga pamilya nga talatapon. Ang iban may mga obligasyon sa iban nga mga duog. Ang iban pa limitado sa ila masarangan bangod sang edad ukon maluya nga panglawas. Kag ang iban pa gid may mabug-at nga mga tulumanon sa Cristianong kongregasyon. Apang, narealisar man naton nga ang tion nagakaubos para sa sistema sang mga butang karon, kag dapat ihatag ang pagpanaksi sa Ginharian. (Marcos 13:10) Sa amo, kaangay ni Pablo, dapat kita magpakita sing kalangkag nga mag-uswag sa pagbantala nga hilikuton walay sapayan sang mga ‘kasablagan’ nga yara sa aton dalanon. Indi kita dapat maayawan, nga basi nagadumdom nga madamo kita sing hilimuon.—1 Corinto 15:58.
“May Utang” sa Tanan
11. Ano ang buot silingon sang “May utang ako”?
11 May isa pa ka nagapahulag nga kusog sa walay kalapyo nga mga panikasog ni Pablo sa pagwali sing maayong balita. “May utang ako sa mga Griego kag sa mga Barbaro, sa mga maalam kag sa mga buangbuang,” siling ni Pablo. (Roma 1:14) Sa anong paagi ‘nakautang’ si Pablo? Ang iban nga mga badbad nagabadbad sining ekspresyon subong “Obligado ako” (New English Bible), “May obligasyon ako” (Today’s English Version), ukon “May katungdanan ako” (Jerusalem Bible). Nagasiling bala sia nga ang pagbantala nga hilikuton isa ka pabug-at nga katungdanan ukon obligasyon nga dapat niya tumanon sa atubangan sang Dios? Mahapos palambuon ina nga panimuot kon kalimtan naton ang pagkahilingagawon ukon malingaw kita sang mga ganyat sang kalibutan. Apang indi amo sina ang ginhunahuna ni Pablo.
12. Sa kay sin-o “may utang” si Pablo, kag ngaa?
12 Subong “galamiton nga pinili” kag “apostol sa mga pungsod,” matuod gid nga may mabug-at nga salabton si Pablo sa atubangan sang Dios. (Binuhatan 9:15; Roma 11:13) Apang ang iya pagbatyag sing obligasyon indi lamang sa Dios. Nagsiling sia nga may ‘utang’ sia ‘sa mga Griego, sa mga Barbaro, sa mga maalam kag sa mga buangbuang.’ Bangod sang kaluoy kag pribilehiyo nga ginhatag sa iya, ginbatyag niya nga may katungdanan sia sa pagbantala agod nga ang tanan nga tawo makabati sing maayong balita. Narealisar man niya nga kabubut-on sang Dios nga ang “tanan nga tawo maluwas kag makadangat sa sibu nga ihibalo sang kamatuoran.” (1 Timoteo 1:12-16; 2:3, 4) Amo kon ngaa nagpangabudlay sia sing walay untat, indi lamang agod tumanon ang iya salabton sa Dios kundi agod bayaran man ang iya utang sa iya mga isigkatawo. Nagabatyag ka bala sinang personal nga utang sa katawhan sa inyo teritoryo? Ginabatyag mo bala nga utang mo sa ila nga manikasog ikaw sa pagdala sa ila sing maayong balita?
“Wala Ko Ginakahuya ang Maayong Balita”
13. Ano ang pagtamod ni Pablo sa maayong balita?
13 Si Pablo isa gid ka talalupangdon nga huwaran sa pagpakita sing kalangkag sa pagwali sing maayong balita. Hanuot nga gin-apresyar niya ang dibagay nga kaluoy nga ginpakita sa iya sang Dios, kag indi niya luyag nga wasihon ini. (1 Corinto 15:9, 10) Amo kon ngaa nagsiling pa sia: “Wala ko ginakahuya ang maayong balita.” (Roma 1:16) Gikan sa tawhanon nga pagtamod, ang mga Cristiano wala lamang ginakaugtan kundi ginatamay man. “Ginhimo kami nga subong sang higko sang kalibutan, nga sagbot sang tanan nga butang,” siling ni Pablo. (1 Corinto 4:13) Apang wala sia mahuya nga dalhon ang maayong balita sa Roma, ang sentro sang edukado nga kalibutan kag ang lingkuranan sang imperyal nga Emperyo sang Roma. Kon ginaatubang sang indi pagsapak, pag-abuso, ukon pagpamatok sa aton pagbantala nga hilikuton, dumdumon naton ang makapalig-on nga huwaran ni Pablo.
14. Ngaa ‘wala ginkahuya [ni Pablo] ang maayong balita’?
14 Ang “wala ko ginakahuya ang maayong balita” isa pa ka paagi sa pagsiling sing “ginapabugal ko ang maayong balita,” kag dapat amo kita sina. Ngaa? Bangod “ini, sa pagkamatuod, amo ang gahom sang Dios sa pagluwas sa bisan kay sin-o nga may pagtuo,” paathag ni Pablo. Madamo sia sing personal nga eksperiensia sa pagsakdag sang iya ginhambal. Paagi sa maayong balita, si Pablo nagsiling, “kami nagalumpag sang mga pagbais kag sang tagsa ka bugalon nga kaulangan batok sa ihibalo sa Dios; kag ginabihag namon ang tagsa ka hunahuna agod magtuman ini kay Cristo.” (2 Corinto 10:5) Kon bala batok yadto sa tradisyon sang mga Judiyo, sa pilosopiya sang mga Griego, ukon sa gahom sang mga Romano, ang maayong balita nagmadinalag-on.
15. Paano ang pagkalangkag isa ka nagapahulag nga kusog sa kabuhi ni Pablo?
15 Daw ano kaayo nga sa baylo nga batyagon ini nga isa ka lulan, si Pablo ‘nalangkag’ sa pagtuman sang salabton nga ginhatag sa iya sang Dios! Subong iya ginpabutyag mismo: “Kay kinahanglan gid nga magwali ako. Kailo ako kon indi ko pag-iwali ang maayong balita!” (1 Corinto 9:16) Ining kalangkag nagbulig sa iya sa pagpadayon sa sulod sang madamo nga tuig sang walay kalapyo nga pag-alagad, amo nga kon ngaa nakasiling sia sang ulihi: “Nakapakig-away ako sang maayong pag-away, natapos ko ang dalaganon, natipigan ko ang pagtuo.”—2 Timoteo 4:7.
Ang Pagkaepektibo Nagadugang sa mga Resulta
16. Anong posible nga mga hangkat sa banta mo ang gin-atubang sang tawo nga may tintirohan sang sekretaryo sa palanan-awon ni Ezequiel?
16 Kaangay ni Pablo, wala sing duhaduha nga ang tawo nga may tintirohan sang sekretaryo sa palanan-awon ni Ezequiel nalangkag nahanungod sa iya tulumanon. Nagbalik sia nga may maayong report: Natuman ang misyon! Wala ginasugid sa aton sang rekord kon paano niya ginpangita ang mga “nagapanghayhay kag nagabakho sa tanan nga kalangil-aran nga ginhimo.” (Ezequiel 9:4) Bisan pa wala sing ginasambit kon paano nahimo ining tanan nga pagtanda, maathag nga indi yadto mahapos nga hilikuton.
17. (a) Anong mga hangkat ang ginaatubang mo sa paghimo-disipulo nga hilikuton, kag paano mo ini ginaatubang? (b) Takos bala ang ginakinahanglan nga mga panikasog?
17 Sa karon man, ang aton komisyon indi mahapos. Busa, ang pamangkot amo: Daw ano kita ka epektibo sa sining nagaluwas-kabuhi nga hilikuton? Agod madamo ang aton mahimo nga disipulo, dapat kita makigbahin sa sining hilikuton sing regular kag sing sistematiko, nga wala ginapaligad ang bisan anong kahigayunan sa pagpaambit sing maayong balita. Kaangay naton, ang mga tawo sa aton komunidad masako; mahimo nga talagsa lang sila maabtan sa balay kon magduaw kita, kag bisan pa kon yara sila, masami nga masako sila. Ano ang aton mahimo? Bueno, dapat kita magtipig sing sibu nga mga rekord kag magbalik sa nanuhaytuhay nga mga oras, sa liwat kag liwat, nga nagalaum may maabtan kita nga makahambal naton. Takus bala ina nga mga panikasog? Tuguti sa pagsabat ang masunod nga malip-ot nga sulat gikan sa duha ka tagbalay:
“Luyag ko ipabutyag ang akon apresasyon sa mga Saksi ni Jehova bangod sang ila madamo nga pagduaw sa akon balay. Nahibaloan ko nga kon kaisa ang inyo misyon wala ginatamod sang mga tawo sa guwa sang inyo iglesia nga may kapagsik nga takus sa sini. Gani nahunahuna ko nga ipaambit sa inyo ang akon mga naeksperiensiahan kag pasalamatan kamo!”
“Madamo kami nga ginagutom sa kamatuoran, madamo sa amon ang nagapati nga ang tanan nga dalan nagadul-ong sa kaluwasan. Kamo nga nagapangahas sa pagpangita sing iban nga maministrohan ninyo, indi kamo mag-untat sa amon! Indi kami malain nga mga tawo, bisan pa ginainsulto namon kamo, ginapakahuy-an, kag ginasikway kamo. Indi kamo mag-untat, bangod madamo nga kabutigan ang gintudlo sa amon, madamo sang makahaladlok nga mga sugilanon ang ginsugid sa amon, kag gintudloan kami nga dumtan kamo, agod ilikaw sa amon ang mensahe sang mga Saksi ni Jehova.”
18. (a) Paano mo mabuligan ang iban agod mahangpan ang maayong balita? (b) Paano nalandas sang isa ka manugbantala ang indi pagsapak?
18 Agod malab-ot ang tagipusuon sang mga indibiduwal kag mabuligan sila nga mahangpan ang maayong balita, kinahanglan ang kapin pa sa hapaw nga pagpakigkita sa ila kag hatagan sila sing ginhanda nga mensahe, ukon bilinan sila sing pila ka literatura sa Biblia. Dapat naton tinguhaan nga hantupon ang ila mga kinahanglanon kag mga kabalaka, mga luyag kag indi luyag, mga kahadlok kag mga ginalikawan. Ini tanan nagakinahanglan sing daku nga paghunahuna kag panikasog—kag sing kalangkag sa aton bahin. Binagbinaga ang masunod nga eksperiensia:
Ang isa ka manugbantala nakighambal sa isa ka babayi sa apartment apang indi interesado. Natalupangdan ang pila ka kabataan, namangkot sia kon pila ang kabataan sang babayi. Nagsabat sia nga indi sia ang iloy kundi mga anak sila sang iya bayaw nga lalaki, nga bag-o lang magsaylo halin sa iban nga pungsod. Ang paghambalanay wala madugay nga nagkadto sa indi bastante nga pamalay. Nag-ugyon ang manugbantala nga mabudlay makakita sing kasarangan nga balay sa dalagku nga mga siudad, kay may mga paryente man sia nga manug-abot, kag nagtanyag sia sa pagbulig. Nakunyag ang tagbalay kag gintawag niya dayon ang iya bayaw nga lalaki. Nagpadayon ang paghambalanay, kag nagbaylohanay sila sing numero sang telepono. Wala nalipat sa katuyoan sang pagduaw, mataktikanhon nga ginbuksan sang manugbantala ang pahina 157 sang libro nga Mabuhi sing Dayon kag ginpaathag nga sa ginsaad nga bag-ong sistema, madula na ang problema tuhoy sa pamalay kag trabaho. Nahamuot gid ang lalaki kag ginbaton niya dayon ang libro. Sang ulihi, ang manugbantala nagbalik agod isugid ang tuhoy sa arkila sa apartment; ginpadayon man niya ang ila paghambalanay sa Biblia.
19. Tion na karon nga maghimo kita sing ano? Kag ano pa ang dapat naton hambalan?
19 Ang tion sa pagbantala sing maayong balita madasig nga nagakaubos. Kon tubtob san-o pa ‘punggan sang apat ka anghel ang apat ka hangin sang duta’ wala kita makahibalo. (Bugna 7:1) Ano man ang matabo, ang “dakung kapipit-an” yara gihapon sa palaabuton, kag ginatipon ang mga tawo nga bunayag sing tagipusuon. Sa pagkamatuod, ang “kaumhan” “maputi para sa tig-alani.” (Mateo 24:21, 22; Juan 4:35) Karon na ang tion nga manikasog kita sing mabaskog sa sining indi na masulit nga hilikuton. Paano naton magamit sing maayo gid ang nabilin nga tion? Ano ang mahimo naton agod makapakigbahin sing bug-os pa sa sining nagaluwas-kabuhi nga hilikuton? Kag ano ang makabulig sa aton sa padayon nga pagpakita sing kalangkag sa pagwali sing maayong balita? Ining mga pamangkot binagbinagon sa masunod nga artikulo.
Binagbinaga ang Huwaran ni Pablo Suno sa Roma 1:13-16—
◻ Ngaa nalangkag sia sa pagkadto sa Roma?
◻ Ano ang nagsablag sa iya sa pagkadto? Apang ano ang iya reaksion?
◻ Sa kay sin-o sia ‘nakautang’ kag ngaa?
◻ Ano ang ginbatyag niya nahanungod sa maayong balita? Ngaa?
◻ Kaangay ni Pablo, ano ang mahimo naton agod mangin epektibo sa pagwali sing maayong balita?