Mga Babayi sa Ulubrahan—Mga Pagtilaw kag mga Hangkat

“ANG mga babayi nagsulod sa pormal nga puersa sang pangabudlay sa dimatupongan nga kadamuon sang nagligad nga tatlo ka dekada.” Amo sina ang report sang organisasyon sa panalawsaw nga World­watch Insti­tute. “Sa manggaranon kag imol nga mga pungsod,” padayon sang report, “ang implasyon nagapalig-on sa mga babayi nga magtrabaho bangod sa sueldo.” Subong sang ginasiling sang isa ka taga-Nigeria nga babayi: “Ang pag-ipit sa palangabuhian daku amo kon ngaa nagguwa ako kag magtrabaho.”

Kaangay sang “sangkol nga babayi” sang panahon sang Biblia, madamong babayi ang malipay sa paghatag sing nagakaigo nga bulig sa palangabuhian sa kaayuhan sang ila pamilya. (Hulubaton 31:10, 16, 24) Kag nasapwan sang iban nga ang pagtigayon sang trabaho makahalangkat kag makaalayaw. Apang samtang ang sekular nga palamugnan may mga benepisyo, mahimo nga may mga disbentaha man ini.

Halimbawa, ang isa ka babayi nga manedyer sa tindahan nagsiling: “Mahal ko ang akon obra. Ang akon boss maayo, ang akon opisina matahom. Apang naugot ako sa sini kon ina nga obra nagakuha sing dugang pa sa tion nga mahatag ko, bangod sa tapos sina may nagahulat sa akon nga isa pa ka obra sa balay—subong asawa kag iloy.” Apang, ginatatap sing maayo sang madamong babayi ang obra, puluy-an, kag pamilya, kag bangod sina ginadayaw sila sing mainit.a

Apang, ang sekular nga palamugnan nagapadayag man sa mga babayi sa madamong palaligban nga pinasahi sa ulubrahan. Para sa madamo, ang hangkat amo ang paghupot sing timbang nga panimuot kon mapilitan sa pag-obra sa isa ka palibot nga puno sang mainit nga kompetinsia ukon madamo sing dipagsapak. Ang handum nga mag-uswag, nga mag-abante, ang nagtiklod sa iban nga babayi nga himuon ang ila mga obra nga panguna sa ila kabuhi.

Kon kaisa ang ulubrahan tuburan man sang mga pag-ipit sa moral. Ang pagkanadayag sa matag-adlaw nga pagpamati sa malaw-ay nga hambal isa ka kinaandan nga reklamo sang nagaobra nga mga babayi. Sing malain pa gid, nasapwan sang iban ang ila kaugalingon nga mga biktima sang walay kaluoy seksuwal nga pagpanggamo. “Sang magsugod ako primero sa pag-obra,” sugid sang isa ka Cristianong babayi, “ako lang ang babayi sa opisina. Ang mga lalaki nagahimo sing malisyuso nga komento, kag mabudlay gid ini para sa akon.”

Ina nga palaligban tunay nga ginakabalak-an sang mga babayi nga dapat mag-atubang sini adlaw-adlaw, labi na yadtong maluyag sa paghupot sang Cristianong mga talaksan. Sing malipayon, may tuburan sang matuod nga bulig para sa ila.

[Footnote]