Report sang mga Manugbantala sang Ginharian

Padya sa Katutom

SA Italya, sang nagligad nga 15 ka tuig, nakilala ni Gng. B—— ang kamatuoran, nga sadto 15 anyos ang panuigon. Apang, wala sia mag-uswag, gani namana sia sing ditumuluo. Apang ang mga binhi sang kamatuoran nagpabilin sa iya tagipusuon, kag sang nagligad nga isa ka tuig nagbaton sia sing pagtuon sa Biblia upod sa isa sang mga Saksi ni Jehova kag nagsugod sa pagtambong sa mga miting. Ang iya bana masingki nga nagpamatok kag namahog nga palayason sia. Ginatapungol sia sang iya bana sing mabaskog amo kon ngaa nagapabulong sia. Sang isa ka gab-i hinali sia nga nagsulod sa Kingdom Hall sa tion sang miting, ginsumbag niya ang isa ka utod nga lalaki, ginbuong ang kristal sa puertahan, kag nagsinggit nga may kaakig.

Sang pagpauli niya, nakita niya nga ginkandaduhan sang iya bana ang balay agod indi sia makasulod. Wala madulai sing kaisog, nagkadto sia sa estasyon sang carabinieri (polis) agod pahibaluon sila sang natabo kag dayon nagtulog sia sa balay sang iya tiya. Pagligad sang duha ka adlaw ginpapuli sia sang iya bana.

Kilala ang bana sa banwa. Ginpakamalaut niya ang mga Saksi ni Jehova sa publiko, nga nagasiling nga ginpierdi nila ang iya pamilya. Sa sining kampanya batok sa mga Saksi, ginsakdag sia sang mga klero. Ang isa ka pari nagpabuhat sing mga stick­er nga may masunod nga mga pulong: “MGA SAKSI NI JEHOVA: Indi pagtublaga ang paghidait sining pamilya. SALAMAT GID!” Ginpapatapik niya ining mga stick­er sa mga ganhaan sa banwa. Ang tanan nagahambal nahanungod sa mga Saksi ni Jehova kag ginhimo nila sila nga sentro sang ila pagyaguta kag pagyubit. Walay sapayan sini, ang kauturan nagpakaisog kag nagpadayon sang ila ministeryo nga may labi pa nga kakugi. Indi luyag sang kalabanan nga pamilya ang mga stick­er sa ila mga ganhaan. Ang pila ka mga bata nga lalaki, nga ginpadala sang pari, ginhatagan sing 100 ka lire sa pagpatapik sini sa mga ganhaan, suno sa report.

Samtang, ginpahibalo ni G. B——ang iya asawa nga dapat sia magbiya sa balay, bangod nakahimo na sia sing mga tikang para sa legal nga pagbulagay. Apang ang mga butang nagsugod sa pagbalhin sa sini nga banwa. Ang lokal nga estasyon sang radyo nagpresentar sing programa, kag ginlaragway sang reporter ang kaso subong “indi maayo nga maniobra, malaw-ay nga mga batasan.” Sa tion sang programa, ginpaathag sang aton kauturan nga madamo nga pamilya ang ginpilit sa pagpatapik sang mga stick­er. Ginpamatud-an ini sang kamatuoran nga sa tion sang kagab-ihon ginpatapik ini bisan sa pila ka ganhaan sang mga Saksi ni Jehova kag sang mga pamilya nga nagaabiabi sang ila pagduaw. Gindayaw sang reporter sa radyo ang mga Saksi ni Jehova kag nagsiling nga sila mga tawo nga “may tumalagsahon nga pagkabuot, kag nagagawi sila nga may daku nga kaluoy.”

Sang ulihi, nag-abot ang tion nga ang mag-asawa magpakita sa atubangan sang hukom agod sugdan ang legal nga pagbulagay nga ginpangabay sang bana. Gindayaw sang hukom si Gng. B   bangod sang iya handum nga indi makigbulag, kag samtang ginahulat niya ang asunto, ginpatatap sang hukom ang kabataan sa iya. Makapadayon sila sa pagpuyo sa ila puluy-an, kag ang iya bana dapat maghatag sa iya sing 250,000 ka lire kada bulan. Nagpamatok ang bana, nga nagasiling: “Ang balay propiedad sang akon iloy, kag ang akon asawa indi makaistar didto.” Ang hukom nagsabat: “Luyag mo nga mangin bana kag boss. Ang imo asawa dapat pirme maghuo, kag sing makaisa nangindi sia. Gani gin­gamo mo ang bug-os nga banwa. Kon ang imo asawa nangin dimatutom sa imo, mahangpan ko kuntani, apang wala ka sing labot sa butang nga lain nga pagtuluohan ang iya ginsunod.”

Si Gng. B—— malipayon nga nagaalagad karon kay Jehova. (Mateo 5:10) Ang katawhan sang banwa nagbag-o sang ila panimuot, kag nagakatabo ang makadalayaw nga paghambalanay sa Biblia. Nagaugyon sila nga indi mga Saksi ni Jehova ang nagatublag sang paghidait sang pamilya. Kon may yara pa mga stick­er sa mga ganhaan, wala na sila sing kahulugan.