Report sang mga Manugbantala sang Ginharian

Ang Pagpangita sing Kamatuoran sang Biblia Ginpadyaan sa Israel

KAPIN kag kapin nga mga tawo sa Israel subong sang sa iban nga duog ang nakahangop sa pagkawalay pulos sang mga panikasog sang tawo sa pagdala sing dayon nga paghidait kag pag-aman sing paglaum para sa palaabuton. Ang 370 ka Saksi ni Jehova sa sadtong matahom kag maragtason nga pungsod nagadala sing nagahatag kabuhi nga paglaum sa mga nagapangita sa Dios. (Isaias 55:​2, 3) Ang masunod nga mga report gikan sa sanga talatapan sang Watch Tower Society sa Tel Aviv nagapakita nga ginapadyaan sang Dios ang mga nagapangita sing kamatuoran sang Biblia.

“Ang mga pangdisturbo sang magamo nga relihiosong mga panatiko nag-untat, kag ang ila anay mga panikasog nga tublagon ang amon mga miting padayon nga nagabalandra sa ila. Halimbawa, ang isa ka tigulang nga Ruso nga mag-asawa nagapakig-upod anay sa isa ka grupo sang mga Adventista apang wala sila maayawi sa ila ginaton-an. Wala sila sing nakita nga pamatuod sang mga paghingabot nga gintagna nga magatanda sa matuod nga Cristianismo. Nian nakita nila isa ka adlaw ang isa ka daan kag ginhaboy nga magasin sang balita sa Romanianhon nga hambal nga nagaunod sing report nahanungod sa masingki nga pagsalakay sang akig nga grupo sang 1985 batok sa tinukod sang sanga talatapan sang Sosiedad kag sa King­dom Hall sa Tel Aviv. Bangod napukaw ang ila interes, nagkadto sila sa Tel Aviv kag apat ka oras nila ginpangita ang tinukod nga ginlaragway sa artikulo sang pamantalaan. Nalipay sila sa mga sabat sa pila nila ka pamangkot kag nagpabilin sila agod magtambong sa miting sadto nga gab-i, nga sa diin nalipay sila nga makilala ang pila ka Saksi nga nagahambal sing Ruso. Sugod sadto, ginhiwat ang regular nga pagtuon sa Biblia upod sa ila. Sa dugang nga pagtuon nila, dugang pa nga nakombinse sila nga nasapwan gid nila ang ila ginapangita​—⁠ang kamatuoran!

“Sa isa pa ka hitabo, ang isa ka utod nga lalaki nagpanaksi sa isa ka hoben pa nga lalaki nga may pamilya kag wala nagaugyon sa pila ka punto nga ginpaathag niya amo kon ngaa nagpadayon sia sa pag-usisa sang mensahe sang Ginharian. Pagligad sang pila ka tuig, ang anak nga babayi sining tawo nagmasakit, kag ginsilingan sang iya superstisyuso nga mga abyan nga ang problema mahimo gid nga may kaangtanan sa mezuzah nga natapik sa iya ganhaan. Ginrekomendar nila nga ipatan-aw ini sa rabbi. Ginhimo niya ini. Sa amo man nga tion, hanuot sia nga nangamuyo sa Dios sing tuytoy nga makita niya ang kamatuoran.

“Sang nagapadulong sia sa puluy-an sang rabbi, hinali nga namat-od ang lalaki nga maghapit anay sa klinika kag mangayo sing resita. Pag-abot niya didto, sin-o pa ang nakita niya nga nagapungko didto kundi ang Saksi nga nagbantala anay sa iya sang nagligad nga mga tinuig! Nagsiling ang utod nga wala sia sing plano nga magkadto sa klinika sadto nga gab-i sang sa hinali may nadumduman sia nga kinahanglanon niya. Ang utod kag ang lalaki nagpungko kag naghambalanay sila sa sulod sang duha ka oras sadto nga gab-i, kag ang pagtuon sa Biblia ginhimos upod sa sining hoben pa nga lalaki. Nagsugod sia sa pagtambong sa mga miting, ang iya pag-uswag dalayon, kag nagbuylog sia sa Teokratikong Eskwelahan sa Ministeryo. Wala madugay nag-upod sia sa pag-alagad sa latagon, kag sia karon isa na ka bawtismado nga utod. Wala na gid sia makalab-ot sa balay sang rabbi!”

Ang pagpangita sing kamatuoran sang Biblia sining mga tawo bugana nga ginpadyaan, kay nakakita sila sing bahandi nga hamili pa sa ulay nga bulawan.​—⁠Hulubaton 3:​13-18.