Ang Imo Pagtamod sa Kalag Nagaapektar sa Imo Kabuhi

“Ang tawo nangin buhi nga kalag.”​—⁠GENESIS 2:⁠7.

1, 2. Ano ang ginapatihan sang kalabanan nga relihion tuhoy sa tawo kag sa kalag?

GINATUDLO sang halos tanan nga relihion nga ang tawo may dimamalatyon nga kalag. Ang New Catholic Encyclopedia nagasiling nga ang kalag “gintuga sang Dios kag ginpasulod sa lawas sa pagpanamkon.” Nagasiling man ini nga ang doktrina sang dimamalatyon nga kalag “isa sang mga pamakod nga bato” sang mga iglesia sang Cristiandad. Sing kaanggid, “ang ideya sang Moslem,” siling sang The New Encyclopædia Britannica, “nagapati nga ang kalag nagluntad sing dungan sa lawas; busa, may kaugalingon ini nga kabuhi, ang paghiusa sini sa lawas temporaryo lamang.”

² Ina nga mga relihion nagapati nga ang kalag nagabiya sa lawas sa kamatayon kag nagakabuhi sing dayon, ang destinasyon sini amo ang langitnon nga kalipay, temporaryo nga pagtener sa purgatoryo, ukon dayon nga pag-antos sa kalayuhon nga impierno. Ang kamatayon ginatamod subong ganhaan padulong sa dayon nga kabuhi sa duog sang mga espiritu. Suno sa ginsiling sang isa ka manunulat sa libro nga We Believe in Immortality: “Ginatamod ko ang Kamatayon subong isa ka daku kag mahimayaon nga pagpasimpalad. Ginatamod ko ang Kamatayon subong isa ka balaan nga promosyon.”

3. Ano ang pagpati sang nanuhaytuhay nga relihion sang Sidlangan?

³ Ang mga Hindu, mga Budhista, kag iban pa nagapati sa trans­mi­gra­tion ukon pagsulod sang kalag sa iban nga lawas sa tapos sang kamatayon. Nagalakip ini sang pagpati nga ang kalag may reinkarnasyon sa tapos sang kamatayon, ginabun-ag liwat subong tuhay nga tawo ukon isa pa ka buhi nga butang. Kon maayo ang isa ka tawo, ginasiling nga ang iya kalag mabun-ag liwat subong isa ka tawo nga may mas mataas nga kahimtangan. Apang kon malain sia, mabun-ag sia liwat subong isa ka tawo nga may mas manubo nga kahimtangan ukon subong sapat pa gani ukon insekto.

4, 5. Ngaa importante nga mahibaluan ang kamatuoran nahanungod sa kalag?

⁴ Apang, ano kon ang mga tawo wala sing dimamalatyon nga kalag? Ano kon ang kamatayon indi “isa ka balaan nga promosyon,” indi ang gilayon nga ganhaan padulong sa dayon nga kabuhi bilang espiritu ukon sa reinkarnasyon, para sa tanan nga mapatay? Nian ang pagtuo sa dimamalatyon nga kalag magadul-ong sa isa sa sayop nga direksion. Ang libro nga Official Catholic Teachings nagasiling nga ang iglesia nagapamilit sa pagtuo sa dimamalatyon nga kalag bangod ang indi pagpati sa sini “magahimo sang iya mga pangamuyo, sang iya mga rito para sa lubong kag sang iya relihioso nga mga buhat para sa mga patay nga wala sing kahulugan ukon indi mahangpan.” Gani nadalahig ang dalanon sang kabuhi sang isa, ang iya pagsimba, kag ang iya dayon nga palaabuton.​—⁠Hulubaton 14:​12; Mateo 15:⁠9.

⁵ Importante nga mahibaluan ang kamatuoran nahanungod sini nga pagtuluuhan. Si Jesus nagsiling: “Ang mga nagasimba [sa Dios] dapat magsimba sa espiritu kag kamatuoran.” (Juan 4:24) Ang kamatuoran nahanungod sa tawhanon nga kalag masapwan sa Pulong sang Dios, ang Biblia. Ang inspirado nga Kasulatan nagaunod sang pagbugna sang Dios sang iya mga katuyuan, gani makasalig kita nga nagasugid ini sa aton sing kamatuoran. (1 Tesalonica 2:​13; 2 Timoteo 3:16, 17) Si Jesus nagsiling sa pangamuyo sa Dios: “Ang imo Pulong kamatuoran.”​—⁠Juan 17:​17.

Gintuga nga May Dimamalatyon nga Kalag?

6. Ano ang maathag nga ginasugid sa aton sang rekord sang Genesis nahanungod sa pagtuga sa tawo?

⁶ Ang Genesis 2:7 nagasugid sa aton: “Ginhimo ni Jehova nga Dios ang tawo gikan sa yab-ok sang duta kag ginhuypan ang iya ilong sing ginhawa sang kabuhi, kag ang tawo nangin buhi nga kalag.” Wala nagasiling ang rekord nga ang Dios nagsangkap sa tawo sing dimamalatyon nga kalag. Nagasiling ini nga sang ginpapagsik sang gahom sang Dios ang lawas ni Adan, sia “nangin buhi nga kalag.” Gani ang tawo amo ang kalag. Wala sia nagapanag-iya sing kalag.

7. Ngaa ginbutang ang mga tawo sa duta?

⁷ Gintuga sang Dios si Adan agod magkabuhi sa duta, indi sa langit. Ang duta indi isa ka tililawan lamang nga duog agod tan-awon kon kalipikado si Adan para sa langit. Ginhimo sang Dios ang duta agod “puy-an,” kag si Adan amo ang nahanuna nga tawhanon nga pumuluyo. (Isaias 45:​18; 1 Corinto 15:45) Sang ulihi, sang gintuga sang Dios si Eva subong asawa para kay Adan, ang katuyuan sang Dios para sa ila amo nga tugbon nila ang duta kag himuon ini nga paraiso subong amo ang dayon nga puluy-an sang katawhan.​—⁠Genesis 1:​26-31; Salmo 37:⁠29.

8. (a) Ano ang kondisyon sang pagkabuhi ni Adan? (b) Kon wala makasala si Adan, sa diin sia kuntani nagpadayon sa pagkabuhi?

⁸ Wala gid nagasiling ang Biblia nga ang isa ka bahin ni Adan dimamalatyon. Sa kabaliskaran, ang iya pagluntad may kondisyon, pasad sa pagkamatinumanon sa sugo sang Dios. Kon lapason niya yadto nga sugo, ano nian? Dayon nga kabuhi bala sa duog sang mga espiritu? Indi gid. Sa baylo, sia “mapatay nga totoo.” (Genesis 2:17) Magabalik sia sa iya ginhalinan: “Yab-ok ka kag sa yab-ok magabalik ka.” (Genesis 2:​7; 3:19) Si Adan wala nagaluntad sa wala pa sia gintuga, kag wala sia magluntad sa tapos sia mapatay. Gani duha lamang ang iya pililian: (1) pagkamatinumanon kag kabuhi ukon (2) paglalis kag kamatayon. Kon si Adan wala magpakasala, nabuhi kuntani sia sa duta sing dayon. Indi gid sia magakadto sa langit.

9. Ano ang husto nga pagtawag sang Biblia sa kamatayon, kag ngaa?

⁹ Si Adan naglalis, kag napatay sia. (Genesis 5:5) Kamatayon ang ginsilot sa iya. Indi yadto ganhaan padulong sa “mahimayaon nga pagpasimpalad” kundi isa ka ganhaan padulong sa indi pagluntad. Sa amo, ang kamatayon indi isa ka abyan kundi suno sa pagtawag sang Biblia, isa ka “kaaway.” (1 Corinto 15:26) Kon si Adan nangin isa ka dimamalatyon nga kalag nga magakadto sa langit kon matinumanon sia, nian ang kamatayon isa ka pagpakamaayo. Apang indi amo sini. Isa yadto ka sumpa. Kag bangod sang sala ni Adan, ang sumpa sang kamatayon naglapta sa tanan nga tawo bangod ang tanan mga anak niya.​—⁠Roma 5:⁠12.

10. Anong serioso nga palaligban ang nagautwas sa pagpati nga si Adan may dimamalatyon nga kalag?

¹⁰ Dugang pa, kon si Adan gintuga nga may dimamalatyon nga kalag nga paantuson sing dayon sa isa ka kalayuhon nga impierno kon makasala sia, ngaa wala sia ginpaandaman nahanungod sini? Ngaa ginsugiran lamang sia nga mapatay sia kag magabalik sa yab-ok? Daw ano ka indi makatarunganon nga pakamalauton si Adan sa dayon nga pag-antos bangod sa paglalis, nga wala man lang sia pagpaandami nahanungod sini! Apang, “wala sing inhustisya” sa Dios. (Deuteronomio 32:4) Indi kinahanglan nga paandaman si Adan nahanungod sa kalayuhon nga impierno para sa dimamalatyon nga mga kalag sang malauton. Ina nga impierno wala magluntad, amo man ang dimamalatyon nga mga kalag. (Jeremias 19:​5; 32:35) Wala sing dayon nga pag-antos sa yab-ok sang duta.

Ang Paggamit sang Biblia sa “Kalag”

11. (a) Sa Biblia ang Hiligaynon nga tinaga nga “kalag” naghalin sa anong Hebreo kag Griego nga mga tinaga? (b) Paano ginabadbad sang King James Version ang Hebreo kag Griego nga mga tinaga para sa “kalag”

¹¹ Sa Hebreong Kasulatan, ang Hiligaynon nga tinaga nga “kalag” naghalin sa Hebreong tinaga nga neʹphesh, nga nagalutaw sing 750 ka beses. Ang katumbas sini sa Griegong Kasulatan amo ang psy·kheʹ, nga nagalutaw sing kapin sa 100 ka beses. Ang New World Translation of the Holy Scriptures pirme nagabadbad sining mga tinaga subong “kalag.” Ang iban nga Biblia mahimo nagagamit sing nanuhaytuhay nga mga tinaga. Ginabadbad sang King James Version ang neʹphesh sa nanuhaytuhay nga paagi subong sang: gana, sapat, lawas, ginhawa, tinuga, patay (lawas), handum, tagipusuon, kabuhi, tawo, hunahuna, persona, kaugalingon, kalag, butang. Kag ginabadbad sini ang psy·kheʹ subong: tagipusuon, kabuhi, hunahuna, kalag.

12. Paano ginagamit sang Biblia ang Hebreo kag Griego nga mga tinaga para sa “kalag”?

¹² Ginatawag sang Biblia ang mga tinuga sa dagat nga neʹphesh: “Ang tagsa ka buhi nga kalag nga yara sa mga tubig.” (Levitico 11:10) Ang tinaga mahimo magpatuhoy sa mga sapat sa duta: “Magpatubo ang duta sing buhi nga mga kalag suno sa ila mga sari, kahayupan kag nagasaog nga mga butang kag kasapatan.” (Genesis 1:24) Ginatos ka beses nga ang neʹphesh nagakahulugan sing katawhan. “Ang tanan nga kalag gikan kay Jacob kapituan ka kalag.” (Exodo 1:5) Ang isa ka halimbawa sang psy·kheʹ nga ginagamit sa sining paagi amo ang 1 Pedro 3:⁠20. Nagasugid ini tuhoy sa arka ni Noe, “nga sa diin pila lamang ka tawo, kon sayoron, walo ka kalag, ang naluwas sa tubig.”

13. Sa anong mga paagi ginagamit sang Biblia ang tinaga nga “kalag”?

¹³ Ginagamit sang Biblia ang tinaga nga “kalag” sa madamo nga paagi. Ang Genesis 9:5 nagasiling: “Kinahanglanon ko ang dugo sang inyo kalag.” Ang kalag ginasiling diri nga may dugo. Ang Exodo 12:​16 nagasiling: “Luwas sang kinahanglan kaunon sang tagsa ka kalag, ina lamang ang maaman ninyo.” Sa sini nga bahin ang kalag ginasiling nga nagakaon. Ang Deuteronomio 24:7 nagahambal tuhoy sa isa ka tawo nga “nagkidnap sa kalag sang iya mga utod.” Sa pagkamatuod indi ang dimamalatyon nga kalag ang ginkidnap. Ang Salmo 119:​28 nagasiling: “Ang akon kalag indi makatulog bangod sang kalisod.” Gani ang kalag mahimo indi makatulog. Ginapakita man sang Biblia nga ang kalag mamalatyon. Mapatay ini. “Ina nga kalag dapat utdon gikan sa iya katawhan.” (Levitico 7:20) “Dili sia magpalapit sa patay nga kalag.” (Numeros 6:6) “Ang aton kalag mapatay.” (Josue 2:14) “Ang tagsa ka kalag nga indi magpamati sa sadtong Manalagna laglagon sing bug-os.” (Binuhatan 3:23) “Ang tagsa ka buhi nga kalag nagkalamatay.”​—⁠Bugna 16:⁠3.

14. Maathag nga ginapakita sang Biblia ang kalag subong ano?

¹⁴ Sing maathag, ang paggamit sang Biblia sa neʹphesh kag psy·kheʹ nagapakita nga ang kalag amo ang tawo ukon, sa bahin sang mga sapat, amo ang tinuga. Indi ini isa ka bahin sang indibiduwal nga indi mapatay. Sa pagkamatuod, ang neʹphesh ginagamit gani sa Dios mismo: “Ang Iya kalag nagadumot sa bisan sin-o nga nagahigugma sa kasingki.”​—⁠Salmo 11:⁠5.

Madamo nga Eskolar ang Nagaugyon

15. Paano ginapabutyag sang pila ka libro sang mga eskolar ang ila kaugalingon nahanungod sa panudlo nga pagkadimamalatyon sang kalag?

¹⁵ Madamo nga eskolar ang nagaugyon nga ang Biblia wala nagahambal tuhoy sa dimamalatyon nga kalag. Ang The Concise Jewish Encyclopedia nagasiling: “Ang Biblia wala nagasiling sing doktrina tuhoy sa pagkadimamalatyon sang kalag, maathag man nga wala ini nagalutaw sa una nga mga literatura sang mga rabbi.” Ang The Jewish Encyclopedia nagasiling: “Ang pagpati nga ang kalag nagapadayon sa pagluntad sa tapos sang pagkahagas sang lawas isa ka pilosopiko ukon teolohiko nga ispikulasyon sa baylo nga isa ka simple nga pagtuo, kag wala gid ginatudlo sa Balaan nga Kasulatan.” Ang The Interpreter’s Dictionary of the Bible nagasiling: “Ang nephesh . . . wala nagapadayon sa pagluntad nga nabulag sa lawas, kundi nagakapatay ini upod sa sini. . . . Wala sing biblikanhon nga teksto ang nagasakdag sa pinamulong nga ang ‘kalag’ nagabulag sa lawas sa kamatayon.”

16. Paano ginapabutyag sang pila ka awtoridad ang ila kaugalingon nahanungod sa kalag?

¹⁶ Subong man, ang Expository Dictionary of Bible Words nagasiling: “Sa amo, ang ‘kalag’ sa D[aan] nga T[estamento], wala nagapakita sing indi materyal nga bahin sang mga tawo nga nagapadayon sa pagluntad sa tapos sang kamatayon. Ang [neʹphesh] nagakahulugan lamang sing kabuhi kay isa ini ka tumalagsahon nga eksperiensia sang personal nga mga tawo. . . . Ang sadsaran nga kahulugan sang [psy·kheʹ] ginapalig-on sang katumbas sini sa D[aan] nga T[estamento], sa baylo sang kahulugan sini sa Griegong kultura.” Kag ang The Eerdmans Bible Dictionary nagasiling nga sa Biblia, ang tinaga nga kalag “wala nagakahulugan sing isa ka bahin sang tawo, kundi sa baylo sang bug-os nga persona. . . . Sa sining kahulugan ang mga tawo wala sing mga kalag​—⁠sila ang mga kalag.”​—⁠Italiko amon.

17. Ano ang ginabaton sang duha ka Katoliko nga balasahon nahanungod sa “kalag”?

¹⁷ Bisan ang New Catholic Encyclopedia nagabaton: “Ang Biblikanhon nga mga tinaga para sa kalag masami nga nagakahulugan sing bug-os nga persona.” Nagadugang pa ini: “Wala sing dichotomy [pagtunga] sang lawas kag sang kalag sa D[aan] nga T[estamento]. . . . Ang termino nga [neʹphesh], bisan pa ginbadbad sa aton tinaga nga kalag, wala gid nagakahulugan sing kalag nga tuhay sa lawas ukon sa indibiduwal nga persona. . . . Ang termino nga [psy·kheʹ] amo ang tinaga sang B[ag-ong] T[estamento] nga katumbas sa [neʹphesh]. . . . Ang ideya nga ang kalag nagapadayon sa pagluntad sa tapos sang kamatayon indi mahantop sa Biblia.” Kag si Georges Auzou, Pranses nga Katolikong Propesor sang Balaan nga Kasulatan, nagsulat sa iya libro nga La Parole de Dieu (Ang Pulong sang Dios): “Ang ideya nga ang ‘kalag,’ nagakahulugan sing espirituwal lamang, indi materyal nga katunayan, kag napain sa ‘lawas,’ . . . wala sa Biblia.”

18. (a) Ano ang komento sang isa ka insiklopedia tuhoy sa paggamit sang Biblia sa tinaga nga “kalag”? (b) Sa diin ginkuha sang mga teologo ang ideya nga may butang nga nagapadayon sa pagkabuhi sa pagkapatay sang lawas?

¹⁸ Sa amo, ang The Encyclopedia Americana nagasiling: “Ang ideya sang Daan nga Testamento tuhoy sa tawo amo ang paghiusa, indi ang pag-isa sang kalag kag lawas. Bisan pa ang Hebreo nga tinaga [neʹphesh] masami nga ginabadbad subong ‘kalag,’ indi sibu nga hatagan ini sing Griego nga kahulugan. . . . Ang [neʹphesh] wala gid ginahangop subong nagapanghikot nga napain sa lawas. Sa Bag-ong Testamento ang Griegong tinaga [psy·kheʹ] masami ginabadbad subong ‘kalag’ apang sa liwat indi ini dapat paghangpon nga pareho sa pagpakahulugan sang Griegong mga pilosopo sa sini nga tinaga. . . . Wala ginapaathag sang Biblia kon paano ang tawo makalampuwas sa tapos sang kamatayon.” Nagdugang pa ini: “Ang mga teologo kinahanglan nga magliso sa paathag sang mga pilosopo agod malaragway ang paglampuwas sang indibiduwal sa tapos sang kamatayon.”

Indi ang Biblia Kundi ang Pilosopiya

19. Paano ang Griegong pilosopiya naangot sa pagpati sa pagkadimamalatyon sang kalag?

¹⁹ Matuod nga ginbaton sang mga teologo ang mga ideya sang pagano nga mga pilosopo agod mahimo ang doktrina sang dimamalatyon nga kalag. Ang Pranses nga Dictionnaire Encyclopédique de la Bible (Insiklopediko nga Diksionaryo sang Biblia) nagasiling: “Ang ideya sang pagkadimamalatyon bunga sang Griegong panghunahuna.” Ang The Jewish Encyclopedia nagapamatuod: “Ang pagpati sa pagkadimamalatyon sang kalag nag-abot sa mga Judiyo gikan sa pagpakig-angot sa Griegong panghunahuna kag labi na paagi sa pilosopiya ni Plato, ang una nga sumalakdag sini,” nga nabuhi sang ikap-at nga siglo sa wala pa si Cristo. Si Plato nagpati: “Ang kalag dimamalatyon kag indi malaglag, kag ang aton mga kalag magaluntad sa isa pa ka kalibutan!”​—⁠The Dialogues of Plato.

20. San-o kag paano nakasulod ang paganong pilosopiya sa Cristianismo?

²⁰ San-o ining pagano nga pilosopiya nakasulod sa Cristianismo? Ang The New Encyclopædia Britannica nagasiling: “Kutob sang tungatunga sang ika-2 nga siglo AD ang mga Cristiano nga nahanas sa Griegong pilosopiya nagsugod sa pagbatyag sang kinahanglanon nga ipabutyag ang ila pagtuo nahisuno sa sini, agod iaplikar ang ila kinaalam kag agod makombertir ang edukado nga mga pagano. Ang pilosopiya nga bagay gid sa ila amo ang Platonismo.” Gani, suno sa ginasiling sang Britannica, “ginbaton sang unang Cristianong mga pilosopo ang Griegong ideya tuhoy sa pagkadimamalatyon sang kalag.” Bisan si Papa Juan Paulo II nagbaton nga ang doktrina sang dimamalatyon nga kalag nagalakip sang “mga teoriya sang pila ka eskwelahan sang Griegong pilosopiya.” Apang ang pagbaton sa mga teoriya sang Griegong pilosopiya nagkahulugan nga ginbiyaan sang Cristiandad ang simple nga kamatuoran nga ginpabutyag sa Genesis 2:​7: “Ang tawo nangin buhi nga kalag.”

21. San-o pa nagsugod ang pagpati sa pagkadimamalatyon sang kalag?

²¹ Apang, ang panudlo tuhoy sa pagkadimamalatyon sang kalag, naglutaw bisan sa wala pa si Plato. Sa libro nga The Religion of Babylonia and Assyria, ni Morris Jastrow, aton mabasa: “Ang problema tuhoy sa pagkadimamalatyon . . . serioso nga ginbinagbinag sang Babilonianon nga mga teologo. . . . Ang kamatayon isa ka pagliton padulong sa lain nga sahi sang kabuhi.” Subong man, ang libro nga Egyptian Religion, ni Siegfried Morenz, nagasiling: “Ginkabig sang unang mga Egiptohanon ang kabuhi sa tapos sang kamatayon subong isa lamang ka kasugpon sang kabuhi sa duta.” Ginapatalupangod sang The Jewish Encyclopedia ang kaangtanan sining dumaan nga mga relihion kag ni Plato sang magsiling ini nga si Plato gindul-ong sa ideya sang dimamalatyon nga kalag “paagi sa Orphic kag Eleusinian nga mga tanhaga nga sa diin ang Babilonianhon kag Egiptohanon nga mga pagtamod makatilingala nga ginsamo.”

22. Ngaa masiling nga ang mga binhi sang doktrina nga pagkadimamalatyon sang kalag ginsab-og gid sa pamanagbanag sang tawhanon nga maragtas?

²² Sa amo, ang dimamalatyon nga kalag nga ideya dumaan na. Sa katunayan, naglutaw ini sa pamanagbanag sang tawhanon nga maragtas! Sa tapos ginsugiran si Adan nga mapatay sia kon lalison niya ang Dios, ang baliskad nga pagtamod ginpabutyag sa asawa ni Adan, nga si Eva. Ginsugiran sia: “Dili kamo mapatay nga totoo.” Ginsab-og diri ang mga binhi sang doktrina sang dimamalatyon nga kalag. Kag kutob sadto, ginbaton sang nanuhaytuhay nga kultura ang paganong pagtamod nga ‘sa kamatuoran indi ka mapatay kundi magapadayon sa pagkabuhi.’ Nagalakip ini sa Cristiandad, nga nagdala sang iya mga sumulunod sa apostasya batok sa mga katuyuan kag kabubut-on sang Dios.​—⁠Genesis 3:​1-5; Mateo 7:​15-23; 13:​36-43; Binuhatan 20:​29, 30; 2 Tesalonica 2:​3, 7.

23. Sin-o ang naghimo sang panudlo nga pagkadimamalatyon sang kalag, kag ngaa?

²³ Sin-o ang nagtuytoy sa mga tawo sa pagpati sa sadto nga butig? Ginpakilala sia ni Jesus sang magsiling sia sa relihioso nga mga lider sang iya adlaw: “Kamo iya sang inyo amay nga Yawa, kag luyag ninyo himuon ang mga kailigbon sang inyo amay. . . . Kon nagabutig sia, nagapamulong sia suno sa iya kinaugali, kay butigon sia kag amay sang kabutigan.” (Juan 8:44) Huo, si Satanas ang naghimo sang ideya tuhoy sa pagkadimamalatyon sang kalag agod patalikuron ang katawhan gikan sa matuod nga pagsimba. Gani ang dalanon sang kabuhi kag paglaum sa palaabuton sang isa ginabutang sa sayop nga banas paagi sa pagpati sa mga doktrina nga naghalin sa una nga butig nga narekord sa Biblia, bisan pa sadto nga tion wala sing duhaduha nga ang paghangop ni Eva sa ginsiling sang man-ug amo nga indi gid sia mapatay sa unod.

24. Anong mga pamangkot ang nagakaigo nga ipamangkot tuhoy sa dayon nga kabuhi kag pagkadimamalatyon?

²⁴ Ang Biblia wala nagatudlo nga ang mga tawo may dimamalatyon nga kalag. Ti, ngaa, nian nagahambal ini nahanungod sa paglaum sa dayon nga kabuhi? Dugang pa, wala bala ang Biblia, sa 1 Corinto 15:​53, nagasiling: “Ining mamalatyon kinahanglan magsuklob sang pagkadimamalatyon”? Kag wala bala si Jesus magkayab sa langit sa tapos sang iya pagkabanhaw, kag wala bala sia magtudlo nga ang iban magakadto man sa langit? Ini kag ang iban pa nga mga pamangkot pagausisaon sa amon masunod nga artikulo.

Mga Pamangkot Para sa Repaso

◻ Ano ang ginapatihan sang kalabanan nga relihion tuhoy sa kalag?

◻ Paano ginapakita sang Biblia nga ang tawo wala gintuga nga may dimamalatyon nga kalag?

◻ Ano ang maathag gikan sa paggamit sang Biblia sa Hebreo kag Griegong mga tinaga para sa “kalag”?

◻ Ano ang ginasiling sang madamo nga eskolar nahanungod sa pagtamod sang Biblia sa kalag?

◻ San-o sa maragtas naglutaw ang doktrina nga pagkadimamalatyon sang kalag?

[Piktyur sa pahina 20]

Sila tanan mga kalag