Kon Ngaa ang Cristianong Pagsimba Superyor
Mga Pangunang Punto Gikan sa Mga Hebreo
SI Jehova nga Dios nagpakilala sang superyor nga bahin sang pagsimba sang ginpadala niya sa duta ang iya Anak nga si Jesucristo. Ina bangod kay si Jesus, ang Tagpasad sang Cristianismo, superyor sa mga anghel kag kay manalagna Moises. Ang pagkasaserdote ni Cristo superyor katama kon ipaanggid sa iya sang mga Levinhon sa dumaan nga Israel. Kag ang halad ni Jesus mas superyor sang sa mga sapat nga ginhalad sa idalom sang Mosaikong Kasuguan.
Ining mga punto gin-athag sa sulat sa Mga Hebreo. Ginsulat ini ni apostol Pablo sa Roma sang mga 61 C.E. kag ginpadala sa Hebreo nga mga tumuluo sa Judea. Kutob sang unang panahon, ginpatihan sang Griego kag Asiatiko nga mga Cristiano nga si Pablo amo ang nagsulat, kag ginsupurtahan ini sang komprehensibo nga pagkapamilyar sang manunulat sa Hebreong Kasulatan kag sa iya lohiko nga pagkahuman, nga tipiko sa apostol. Mahimo nga wala niya ginsulat ang iya ngalan bangod sang pagkaugot sang mga Judiyo sa iya kag bangod kilala sia subong “apostol sa mga pungsod.” (Roma 11:13) Tan-awon naton karon sing maayo ang superyor nga mga bahin sang Cristianismo, subong sang ginapakita sang sulat ni Pablo sa Mga Hebreo.
Si Cristo Superyor sa mga Anghel kag kay Moises
Ginpakita primero ang superyor nga tindog sang Anak sang Dios. (1:1–3:6) Ang mga anghel nagasimba sa iya, kag ang iya harianon nga paggahom nasandig sa Dios. Gani hatagan naton sing dikinaandan nga igtalupangod ang ginapamulong sang Anak. Dugang pa, dapat naton dumdumon nga bisan pa nga ang kubos nga si Jesus mas manubo sa mga anghel, ginpakataas sia labaw sa ila kag ginhatagan sing gahom sa ibabaw sang bug-os napuy-an nga duta.
Si Jesucristo superyor man kay Moises. Paano? Ti, si Moises suluguon lamang sa Israelinhon nga balay sang Dios. Apang, ginpadumala ni Jehova si Jesus sa bug-os nga balay, ukon sa kongregasyon sang katawhan sang Dios.
Ang mga Cristiano Nagsulod sa Kapahuwayan sang Dios
Masunod nga ginpakita sang apostol nga posible ang magsulod sa kapahuwayan sang Dios. (3:7–4:13) Ang mga Israelinhon nga ginhilway sa pagkaulipon sa Egipto wala makasulod sa sini bangod dimatinumanon sila kag kulang sing pagtuo. Apang makasulod kita sa sinang kapahuwayan kon magtuo kita sa Dios kag matinumanon nga magsunod kay Cristo. Nian, sa baylo sang pagsaulog lamang sa semanal nga Inugpahuway, matigayon naton adlaw-adlaw ang superyor nga pagpakamaayo nga makapahuway gikan sa tanan makagod nga mga buhat.
Ang pagsulod sa kapahuwayan sang Dios isa ka saad sang iya pulong, nga “matalom pa sa bisan ano nga espada nga duha sing sulab kag nagalapus tubtob sa nautlan sang kalag kag espiritu.” Nagalapus ini sa bagay nga mahantop ang mga motibo kag mga panimuot, nagatunga sang undanon nga mga kailigbon kag panghunahuna. (Ipaanggid ang Roma 7:25.) Kon ang aton “kalag,” ukon kabuhi subong indibiduwal, ginaupdan sang diosnon nga “espiritu,” ukon disposisyon, makasulod kita sa kapahuwayan sang Dios.
Superyor nga Pagkasaserdote kag Katipan
Masunod nga ginpakita ni Pablo ang pagkasuperyor sang pagkasaserdote ni Cristo sa bag-ong katipan. (4:14–10:31) Ang wala sing sala nga si Jesucristo maluluy-on sa makasasala nga mga tawo bangod, kaangay naton, natilawan sia sa tanan nga bagay. Dugang pa, gintangdo sia sang Dios nga “saserdote sa walay katubtuban sa paagi ni Melquisedec.” Indi kaangay sang Levinhon nga saserdote, si Jesus nagakabuhi sing dayon kag busa wala nagakinahanglan sing tal-us sa iya hilikuton sa pagluwas. Indi kinahanglan nga maghalad sia sing sapat, kay ginhalad niya ang iya labaw gid katama nga walay sala nga lawas kag nagsulod sa langit dala ang balor sang iya dugo.
Ang bag-ong katipan, nga ginpatuman paagi sa dugo ni Jesus, superyor sa Kasuguan nga katipan. Ang yara sa bag-ong katipan may mga kasuguan sang Dios sa ila tagipusuon kag nagaagom sing kapatawaran sa mga sala. (Jeremias 31:31-34) Ang pagpasalamat sa sini nagapahulag sa ila nga itu-ad sing dayag ang ila paglaum kag makig-upod sa mga masigkatumuluo. Indi kaangay nila, ang hungod nga mga makasasala wala na sing halad para sa sala.
Importante ang Pagtuo!
Agod makabenepisyo gikan sa superyor nga bag-ong katipan, kinahanglan naton ang pagtuo. (10:32–12:29) Kinahanglan man ang pagbatas agod matigayon naton ang ginsaad ni Jehova. Subong pagpalig-on sa pagbatas, yara ang ‘dakung panganud’ sang wala pa ang Cristiano nga mga saksi nga nagalibot sa aton. Apang, dapat naton labi na nga binagbinagon sing maayo ang walay kasawayan nga dalanon ni Jesus sa idalom sang pagbatas. Ang pag-antos nga ginatugot sang Dios nga mahanabo sa aton dapat tamdon subong disiplina nga makapamunga sing mahidaiton nga bunga sang pagkamatarong. Ang pagkamasaligan sang mga saad ni Jehova dapat magapauswag sang aton handum nga maghimo sing balaan nga pag-alagad sa iya “upod ang diosnon nga kahadlok kag kahayanghag.”
Si Pablo naghinakop paagi sa mga laygay. (13:1-25) Ang pagtuo dapat magpahulag sa aton nga ipakita ang paghiliutod nga gugma, mangin mabiabiahon, nagadumdom sang nagaantos nga mga masigkatumuluo, nagahimo sang pag-asawahay nga dungganon, kag mangin “kontento sa karon nga mga butang.” Dapat naton ilugon ang pagtuo sadtong nagapanguna sa kongregasyon kag dapat sila tumanon. Dugang pa, dapat naton likawan ang apostasya, batason ang pasipala nga ginbatas ni Jesus, “maghalad kita sing dalayon sa Dios sing halad sang pagdayaw,” kag padayon sa paghimo sing maayo. Ina nga paggawi isa man sang superyor nga mga kinaiya sang matuod nga Cristianismo.
[Kahon/Laragway sa pahina 24]
Sarisari nga mga Bawtismo: Ang bahin sang mga pagsimba sa tabernakulo sang Israel may kaangtanan lamang sa “kalan-on kag ilimnon kag sarisari nga bawtismo.” (Hebreo 9:9, 10) Ining mga bawtismo ritwal nga mga pagpanghugas nga ginapatuman sang Mosaikong Kasuguan. Ang mga suludlan nga mahigko ginhugasan, kag ang seremonyal nga pagtinlo nagalakip sang paglaba sa mga panapton kag pagpaligo. (Levitico 11:32; 14:8, 9; 15:5) Ang mga saserdote nagpaligo, kag ang mga butang nga may labot sa mga halad nga sinunog ginbunlawan sa tubig. (Exodo 29:4; 30:17-21; Levitico 1:13; 2 Cronica 4:6) Apang ang “sarisari nga bawtismo” wala nagalakip sang ritwalistiko nga ‘pagbawtismo sa mga tagayan, mga pitsel, kag saway nga mga suludlan’ nga ginahimo sang iban nga mga Judiyo sang tion nga nag-abot ang Mesias; ni ginapatuhuyan sang Hebreo 9:10 ang pagtugmaw sa tubig nga ginhimo ni Juan Bautista ukon ang pagpabawtismo sadtong nagsimbulo sang ila dedikasyon sa Dios subong mga Cristiano.—Mateo 28:19, 20; Marcos 7:4; Lucas 3:3.