Ang Makakulunyag nga mga Kombension Nagapasanyog sang Balaan nga Panudlo

KARON, nakita sang kalibutan ang madasig nga pagdamo sang impormasyon. Sa telebisyon kag radyo, sa mga libro ukon paagi sa mga kompyuter, halos wala sing latid ang suplay sang ihibalo sa halos bisan anong topiko nga mahunahuna. Sa gihapon, ang mga tawo nagabalatian kag nagakapatay. Ang krimen, gutom, kag kaimulon nagaluntad gihapon sa bug-os nga duta, kag ang mga problema sa emosyon nagaapektar sa mas madamo pa nga tawo sangsa nagligad. Ang tanan nga ihibalo nga matigayon wala makatadlong sang mga butang. Ngaa? Bangod wala pagsapaka sang katawhan ang kaalam sang Dios.

Daw ano ka nagakaigo, nian, nga ang “Balaan nga Panudlo” amo ang tema nga ginpili para sa sining ulihi nga mga kombension sang mga Saksi ni Jehova! Ang programa nagpahanumdom sa mga nagtambong nga ang panudlo lamang nga masapwan sa Pulong sang Dios, ang Biblia, ang may tunay, nagaluwas-kabuhi nga balor.

Ang nahauna nga kombension nagsugod sang Huwebes, Hunyo 3, sa Union­dale, New York, E.U.A. Halin sadto, ang programa ginpresentar sa lainlain nga mga siudad sa lainlain nga mga pungsod, nga natapos sa mga kontinente sang Aprika kag South America.

Hapon sang Nahauna nga Adlaw

Ang tagsa ka adlaw may tema nga nagpadaku sang isa ka bahin sang balaan nga panudlo. Halimbawa, ang programa para sa nahauna nga adlaw ginpasad sa tema nga “Paghibalo sang Panudlo nga Gikan sa Dios.” (Juan 7:17) Ini nga panghunahuna ginhambalan samtang nagaligad ang adlaw.

Pagkatapos sang ambahanon kag pangamuyo, ginbuksan sang tsirman sang kombension ang programa paagi sa pamulongpulong nga natig-uluhan, “Ang Balaan nga Panudlo Nagahugpong sa Aton.” Ginpakita niya nga ang katawhan ni Jehova nahiusa paagi sa pagtuon sang Iya mga dalanon kag paglakat sa Iya mga banas. (Miqueas 4:​1-5) Ang balaan nga panudlo nagapabakod sang ila paghiusa. Ang mga kombensionista ginpalig-on nga magkasadya sa ila nahiusa nga pag-inupdanay.​—⁠Salmo 133:​1-3.

Pagkahaponhapon, ang regular nga mga miting sa kongregasyon ginhambalan sa isa ka simposium nga gintig-uluhan, “Mga Miting nga Nagatudlo sa Aton Tuhoy sa mga Dalanon ni Jehova.” Ginpahanumdom sang nahaunang humalambal ang mga kombensionista nga kon kita nagatipon, ginapadunggan naton si Jehova kag busa nagabaton sang Iya pagpakamaayo. Ginpadaku sang masunod nga humalambal ang kinahanglanon nga makigbahin sa mga miting. Sa sini, ginadayaw naton si Jehova sing dayag, ginapakita ang aton pagtuo, kag ginapabakod ang pagtuo sang iban. Ginpakita sang ikatlo nga humalambal sa simposium ang kinahanglanon nga iaplikar kon ano ang aton natun-an sa mga miting. Dapat kita “magmanugtuman sang pulong, kag dili manugpalamati lamang.”​—⁠Santiago 1:⁠22.

Ang matahom nga paghinun-anon sa pag-amba sing mga kadayawan kay Jehova amo ang nagsunod. Ang tinagipusuon nga ambahanon isa ka importante nga bahin sang aton pagsimba. Ini nga pamulongpulong ginsundan sang key­note address, “Ang Balaan nga Panudlo Nagamadinalag-on.” Daw ano kaayo nga tema! “Si Jehova amo ang Ginhalinan sang pinakamaayo nga panudlo nga matigayon ni bisan sin-o,” siling sang humalambal. Nian, pagkatapos sang malip-ot nga paghinun-anon sa milagro sang tawhanon nga utok, sia nagsiling: “Dapat naton gamiton ang aton mga ikasarang sa paghunahuna una sa pagbaton sing balaan nga panudlo. Ini lamang ang nagaresulta sa matuod nga kaalam.” Matuod gid!

Ang Ikaduha nga Aga

“Padayon nga Punihi ang Panudlo sang Aton Manluluwas, ang Dios” amo ang tema sang ikaduhang adlaw sang kombension. (Tito 2:10) Ini nga prinsipio nangibabaw sa pamulongpulong nga “Balaan nga Panudlo Kontra sa mga Panudlo sang mga Demonyo.” Huo ang mga demonyo may ila mga panudlo. (1 Timoteo 4:⁠1) Subong sang ginpaathag sang humalambal, ang balaan nga panudlo nagamadinalag-on sa “kaalam” ni Satanas paagi sa pagbuyagyag sa butig nga mga panudlo kag malimbungon nga mga paagi sang Yawa. Bangod sini, mga 4,500,000 ka matarong sing tagipusuon nga mga Cristiano ang indi na mga ulipon sang kadudulman ni Satanas.​—⁠Juan 8:⁠32.

Apang, dapat naton padayon nga batuan si Satanas. Amo ini ang ginpadaku sa pamulongpulong nga “Ginabatuan Mo Bala ang Espiritu sang Kalibutan?” Ang espiritu sining kalibutan makamamatay. Ginapalig-on sini ang malaut nga moralidad, ang rebelyuso nga pagtamod sa awtoridad, kag ang mahamkunon nga paghandum sa materyal nga mga butang. Dapat pirme usisaon sang isa ka Cristiano ang iya kaugalingon. Mataas bala gihapon ang iya mga talaksan sa kon ano ang iya ginatan-aw, ginapamatian, ukon ginabasa? Sing makapalig-on, ang humalambal nagsiling: “Ginadayaw namon kamo, mga kauturan nga lalaki, babayi, kag kabataan, tungod sa hanuot nga panikasog nga ginahimo na ninyo may kaangtanan sini.”​—⁠1 Juan 2:​15-17.

May isa ka butang nga nagapabudlay sang pagbatu sa espiritu sang kalibutan. Ano ina? Kita tanan dihimpit. Matuod, si Jesus napatay tungod sang aton mga kasal-anan, apang dapat gihapon naton awayon ang huyog sa pagpakasala. Ginbinagbinag ini sa pamulongpulong nga “Pag-away sa Pagpanguyapot sang Sala sa Makasasala nga Unod.” Lakip sa iban nga mga butang, ang humalambal nagsiling nga magadaug kita sa aton pagpakigsumpong sa sala kon isuklob naton ang bag-ong personalidad kag likawan ang bisan ano nga nagabuyo sang aton makasasala nga mga huyog.

“Himua ang Maayo nga Panudlo nga Inyo Dalanon sang Kabuhi” amo ang titulo sang masunod nga pamulongpulong. Ginkabalak-an sing sobra sang iban ang ila pisikal nga panglawas. Apang, sa katunayan, ang espirituwal nga kapagros amo ang mas importante. Ginpadaku sang humalambal ang kinahanglanon nga himuon sing serioso ang aton mga responsabilidad may kaangtanan sa sini, kag may yara sia makapalig-on nga pulong ilabi na para sa Cristianong kababayin-an. Sia nagsiling: “Ginaapresyar gid namon ang tigulang kag batan-on nga mga utod nga babayi nga timbang sa ila kakugi sa ministeryo kag sa ila pag-atipan sa personal nga mga responsabilidad.” Huo, kag ginapasalamatan naton tanan si Jehova tungod sang maayo nga panudlo nga nagahamulag sa aton gikan sa kalibutan.

Nagtakop sang programa sa aga amo ang pamulongpulong nga “Ang Balaan nga Panudlo Nagabuyagyag sang Katuyuan sang Kabuhi.” Ang humalambal nagsiling: “Sa ulihi, halos ang tanan magapamangkot, ‘Ano ang katuyuan sang kabuhi?’ ” Paagi sa makusog nga mga argumento, ginpamatud-an niya nga ang Biblia lamang ang nagahatag sing matuod nga sabat sa sinang pamangkot. Nian, ginpakita sang humalambal nga ang makalilipay nga mga saad sang Dios epektibo nga nagahatag sa aton sing katuyuan sa kabuhi. Ayhan madamo sa tumalambong ang naghunahuna, ‘Amo gid ini ang dapat mabatian sang mga tawo sa akon teritoryo.’ Amo man ang opinyon sang Nagagahom nga Hubon. Ang bag-ong brosyur, nga natig-uluhan Ano ang Katuyuan sang Kabuhi? ginpaguwa pagkatapos sini nga pamulongpulong. Malipayon gid ang tanan! Ang pahuway sa udto naghatag sing kahigayunan nga matan-aw ang bag-ong publikasyon.

Ang Ikaduha nga Hapon

Ang nahaunang pamulongpulong sa hapon may yara makalulugpay nga tema nga “Itugyan ang Inyo Tanan nga Paghimud-os kay Jehova.” Madamong butang ang nagatuga sang paghimud-os; apang, ang Pulong sang Dios nagasiling nga dapat naton itugyan ang aton tanan nga paghimud-os sa iya. (1 Pedro 5:​6, 7) Matuod, ang pila ka problema nagapabilin, kag nahanungod sini ang humalambal naglaygay: ‘Magpailob. Maghulat kay Jehova. Patihi sing malig-on nga ang pagsunod sa Biblia amo pirme ang pinakamaayo. Kon ginahuptan naton ang aton mga tagipusuon nga nasentro kay Jehova, maagom naton “ang paghidait sang Dios” nga nagalabaw sa tanan nga panghunahuna.’​—⁠Filipos 4:​6, 7.

Ginpakita sang nagsunod nga apat ka pamulongpulong nga ang balaan nga panudlo naaplikar sa pagkabuhi sang pamilya. Ang una, “Paghimo sang Pag-asawahay nga Isa ka Mapinadayunon nga Paghiusa,” nagpahanumdom sa mga kombensionista nga sa mata ni Jehova ang pag-asawahay indi dapat tamdon subong isa ka matalikdan nga kahimusan, subong sang pagtamod sa sini sang madamo sa kalibutan. Apang, agod magmadinalag-on ang pag-asawahay, dapat naton sundon ang mga panuytoy ni Jehova. Sia ang naghimo sa aton. Gani, ang iya inspirado nga Pulong nagaunod sang labing maayo nga laygay sa pag-asawahay nga matigayon.

Ang pamulongpulong nga “Pangabudlayi sing Lakas ang Kaluwasan sang Inyo Panimalay” naghinun-anon sang mga hangkat sa pag-atipan sa isa ka pamilya sa sining makahalanguyos nga mga tion. (2 Timoteo 3:⁠1) Ginatudluan sang mga ginikanan ang ila mga kabataan sing pisikal nga katinlo, maayo nga mga pamatasan, kon paano magtrabaho, kag kon paano magmaalwan kag magmainulikdon sa iban. Sing mas importante pa, dapat nila tudluan ang ila mga kabataan nga mangin debotado nga mga alagad ni Jehova.​—⁠Hulubaton 22:⁠6.

Sa masunod nga paghinun-anon, “Mga Ginikanan, ang Inyo Kabataan Nagakinahanglan sing Pinasahi nga Igtalupangod,” ginpahanumdom sang humalambal ang mga kombensionista tuhoy sa kinahanglanon nga hatagan sing komendasyon ang mga kabataan, samtang wala ginapiyong ang mga mata sa ila mga kaluyahon. Ang mga ginikanan dapat ilabi na nga magmangin alisto sa mga huyog padulong sa pagkadibunayag, materyalismo, ukon kakagod.

Ginpamatian sing maayo ilabi na sang batan-on nga mga kombensionista ang pamulongpulong nga “Mga Pamatan-on​—⁠Kay Sin-o mga Panudlo ang Inyo Ginapamatian?” Mabudlay ang kahimtangan sang pamatan-on nga mga Cristiano karon. Ang pag-ugyon sa kalibutan mahapos, apang nagadul-ong ini sa kamatayon. Bisan pa nga ang pagpili nga magpabilin sa balaan nga panudlo nagakinahanglan sing kaisog para sa isa ka lamharon, nagadala ini sing dakung mga pagpakamaayo karon kag kabuhi nga walay katapusan sa palaabuton.​—⁠1 Timoteo 4:⁠8.

Ang ikaduha nga adlaw naghingapos paagi sa makalilipay nga drama nga “Mga Pamatan-on nga Nagadumdom sang Ila Manunuga Karon.” Sa introduksion, gintawag sang direktor ang mga pamatan-on sa organisasyon sang Dios nga “isa ka teokratikong hangaway nga matutom nga nagaalagad kay Jehova nga Dios kag sa iya gintangdo nga Hari, nga si Jesucristo.” Sia nagdugang: “Ang aton mga pamatan-on nagahimo gid sing maayo!” Maathag nga ginpakita sang drama nga kon ang isa ka ginikanan nagahanas sing maayo sa bata, mangin bentaha ini para sa bata kon magdaku sia kag magaalagad kay Jehova sing kinaugalingon.

Aga sang Ikatlo nga Adlaw

Ang tema para sa ikatlo nga adlaw amo ang “Magpadayon sa Pagtudlo sa Katawhan sang Tanan nga Kapungsuran.” (Mateo 28:​19, 20) Walay duhaduha nga ang mga kombensionista nagpaabot sing suno-sa-tion nga laygay tuhoy sa pagbantala nga hilikuton, kag wala sila malugaw-an. Ang simposium nga natig-uluhan sing “Malipayon nga Nagatuman sang Aton Pagbantala kag Pagpanudlo nga Hilikuton” nagpabakod sang ila determinasyon nga padayon nga makigbahin sa pagpanaksi nga hilikuton. Ginhinun-anunan sang nagabukas nga pamulongpulong ang una nga mga pagduaw; sang ikaduha nga pamulongpulong ang mga pagduaw liwat; kag sang ikatlo ang mga pagtuon sa Biblia. Ang mga misyonero sa palibot sang kalibutan gin-agda nga magpauli kag magtambong sa kombension kaupod sang ila mga pamilya kag mga abyan. Sa iban nga mga lugar, ang mga misyonero nakigbahin sa sining bahin sang programa. Makalilipay makabaton sing maathag nga paghangop sa kadalag-an nila sa ila mga asaynment. Ang masunod, “Paglab-ot sa Tanan Paagi sa Maayong Balita” nagbinagbinag sang epekto sang dipormal nga pagpanaksi.

Ang aga natapos paagi sa pamulongpulong sa bawtismo, nga pirme isa ka talalupangdon nga bahin sa dalagku nga mga pagtililipon sang mga Saksi ni Jehova. Sa mga kombension, ang dalagku nga mga grupo sang bag-ong mga dedikado nagtindog sa atubangan sang nagtipon nga kadam-an kag masinaligon nga nagsabat sing huo sa duha ka pamangkot nga ginpamangkot sa ila. Nian ginbawtismuhan sila sing dayag. Daw ano kabakod nga pamatuod sang daku nga epekto sang balaan nga panudlo!

Hapon sang Ikatlo nga Adlaw

Ang programa sang hapon ginsugdan paagi sa isa ka madalom nga paghinun-anon sa Kasulatan. Ang mga Saksi ni Jehova pamilyar sa mga pinamulong sang Mateo kapitulo 24 kag Lucas kapitulo 21. Naghunahuna bala ang iban nga wala na sing bag-o nga masiling nahanungod sining mga kapitulo sa Biblia? Nagsayop gid sila! Ang mga pamulongpulong nga “Ano ang Mangin Tanda sang Imo Presensia?” kag “Sugiri Kami, San-o Bala Mahanabo Ini?” nagdul-ong sa mga kombensionista sa isa ka makawiwili nga paghinun-anon sa mga bahin sadtong duha ka kapitulo kag naghatag sing bag-ong mga paathag sa pila ka bersikulo. May yara buhi nga mga paghambalanay pagkatapos sang sesyon samtang nagapaanggiray sing mga nota ang mga kombensionista agod tan-awon kon nahangpan nila ang mga punto. Sa walay duhaduha, madamong mga pamangkot ang masabat kon ining impormasyon ibalhag sa Ang Lalantawan.

Ang tema sa pagtuon sa Biblia ginpadayon sa pamulongpulong nga “Nagatudlo nga mga Sabat sa Inyo mga Pamangkot sa Biblia.” Nian ginpatuhuyan sing igtalupangod sang programa ang tuhay nga tema. Ang tuig 1993 amo ang ika-50 nga anibersaryo sang Watchtower Bible School of Gilead. Ginapakita sang pamulongpulong nga “Kalim-an ka Tuig sang Pagmisyonero nga Hilikuton kag Pagpanghikot sa Gilead” sa mga kombensionista kon ano ang nahimo sa sina nga panag-on. Kon may mga misyonero nga nagtambong sa pamulongpulong nga “Mga Hinimuan sa Pag-ebanghelyo sa Tugob-globo nga Latagon,” gin-agda sila sa pagsugid sang pila sang ila mga eksperiensia sa tumalambong. Makakulunyag gid mamati sa mga sugilanon sang mga misyonero!

Ang masunod nga pamulongpulong, “Kon Ngaa ang mga Saksi ni Jehova Pirme Nagabantay,” isa pa ka leksion sa maragtas. Ginpakita sini nga ang mga Cristiano madugay na nga nagabantay sugod sang nahaunang siglo C.E. tubtob karon. Nagdul-ong ini sa isa pa ka sopresa. Sa una nga bahin sang nagsunod nga pamulongpulong, nga natig-uluhan sing “Ang mga Manugbantala sang Ginharian Aktibo sa Bug-os nga Duta,” ginbayaw sang humalambal ang isa ka daku nga tomo (kon matigayon na sa lokal nga hambal) kag nagsiling: “Makalilipay ipahibalo diri karon ang pagpaguwa sa sining bag-ong libro, nga natig-uluhan sing Jehovah’s Witnesses​—⁠Proclaimers of God’s Kingdom.” Ang libro nagaunod sang detalyado nga kasaysayan sang modernong-adlaw nga maragtas sang mga Saksi ni Jehova. Nagasugid ini tuhoy sa makakulunyag nga sugilanon sang pagbatas, determinasyon, kag kadalag-an, nagahatag sing makusog nga ebidensia sang espiritu ni Jehova subong nga aktibo sa iya mga alagad.

Ang Ikap-at nga Aga

Katapusan na nga adlaw sang kombension. Ang tema sa sadto nga adlaw, “Pagpanginpulos Mismo sa Balaan nga Panudlo,” nagsaad sing maayo nga talipuspusan sa programa. (Isaias 48:17) Sang aga ang igtalupangod sang mga kombensionista ginwili sang isa ka simposium sang tatlo ka makapulukaw nga mga pamulongpulong. Natig-uluhan sing “Ang Inspirado nga Nagapaandam nga Mensahe ni Jeremias​—⁠Sang Nagligad kag Karon,” ang simposium naglakip sang bersikulo-por-bersikulo nga pagbinagbinag sa Jeremias kapitulo 23, 24, kag 25. Daw ano katigdas nga mensahe ang ginaunod sining mga kapitulo! Ang dimatutom nga Israel sang mga adlaw ni Jeremias mahimo nga nagkurog sa sining prangka, inspirado sang Dios nga mga paandam. Ang bug-os nga kalibutan labi pa nga nagkurog sang natuman yadtong mga paandam. Tuhay bala ini karon? Indi gid. Ang mga Saksi ni Jehova maisugon nga nagabantala sang mensahe sang paghukom sang Dios. Sa ulihi, pagaatubangon sining bug-os nga sistema sang mga butang ang mga buhat sang paghukom ni Jehova. Magakahulugan ini sing bug-os nga kalaglagan sa kalibutan ni Satanas.

Ginhinakpan ang Domingo sang aga sang ikaduha nga drama, “Dili Magpatalang Ukon Pagtiawtiawi ang Dios.” Sa buhi nga paagi, ginpakita sini kon paano kita maamligan sang balaan nga panudlo nga indi maimpluwensiahan sang malain nga mga vid­eo kag musika kag sang huyog nga magsab-ug sing dipaghiusa sa tunga sang mga masigka-Cristiano. Sa konklusion sang drama, ginbalikwat sang tsirman ining nagapahunahuna nga mga pinamulong sang isa sang mga karakter: “Mahimo kita maimpluwensiahan sang kalibutan. Kon indi kita magbatu, ang kalibutan malalangon nga makapalain sang aton panghunahuna. Kag ang aton pagpabilin nga matutom ukon indi, nasandig sa kon ano ang aton ginasab-ug.” Matuod gid!

Ang Katapusan nga Hapon

Ang kombension madasig nga nagahinampot sa katapusan samtang ang humalambal nagkadto sa podium agod ihatag ang diskurso publiko, nga natig-uluhan sing “Mabuligon nga Panudlo Para sa Aton Makahalanguyos nga mga Tion.” Sa maathag kag lohiko nga paagi, ginpakilala niya ang pangunang mga problema nga nagaapektar sa aton karon kag ginhatag ang pila ka paagi nga ang balaan nga panudlo makabulig sa aton sa pag-agom sing mas maayo nga kabuhi. Nagsiling sia nga kon ginasunod naton karon ang Makasulatanhon nga panudlo, masunod naton ini sing dayon sa bag-ong kalibutan ni Jehova.

Pagkatapos sang sumaryo sang semanal nga pagtinuon sa Lalantawan, tion na para sa katapusan nga pamulongpulong. Madasig nga gintuptupan sang humalambal ang talalupangdon nga mga punto sang apat-ka-adlaw nga programa kag ginpahanumdom ang mga kombensionista tuhoy sa bag-ong mga publikasyon. Ginpahibalo man niya nga ang ikaduhang vid­eo­cas­sette sang mga serye The Bible​—⁠A Book of Fact and Prophecy ipaguwa sa dili madugay. Sa katunayan, yadto nga vid­eo­cas­sette, gintig-uluhan nga The Bible​—⁠Mankind’s Oldest Modern Book matigayon na karon sa Ingles. Ang makatalandog nga mga report ginbasa halin sa mga duog diin may yara malubha nga mga problema, subong sang Bosnia kag Herzegovina. Sa paghinakop, ginbasa sang humalambal ang pinamulong sang Manugwali 12:13: “Ini amo ang katapusan sang butang, ang tanan nabatian na: Magkahadlok sa Dios kag magbantay sa iya mga sugo. Kay amo ini ang bug-os nga katungdanan sang tawo.”

Daw ano katahom nga pahanumdom! Magkabuhi kita sa adlaw nga ang tanan nga katawhan magadayaw sa aton Dakung Instruktor, nga si Jehova, kag magapamati sa iya balaan nga panud⁠lo.

[Mga retrato sa pahina 24, 25]

Ang “Balaan nga Panudlo” nga mga kombension sa Moscow kag Kiev nagresulta sa daku nga kasadya

[Mga retrato sa pahina 26, 27]

1. Paagi sa pagpabawtismo, ginsimbuluhan sang madamo ang ila dedikasyon sa Dios.

2. Ang sien-anyos nga kombensionista nakunyag sa pagbaton sa bag-ong publikasyon

3, 4. Ang makapahunahuna nga mga drama gin-apresyar sing daku

5. Ang mga misyonero nga gin-interbyu sa mga kombension nagpatalupangod sang mga kapuslanan sang balaan nga panudlo