Report sang mga Manugbantala sang Ginharian

Ang Nagatinlo nga Gahom sang Pulong sang Dios

GINAREPORT nga kalabanan sang mga giyan sa droga nagabalik sa ila bisyo matapos makaguwa sa mga sentro sang rehabilitasyon. Apang ang Pulong sang Dios makahimo sang kon ano ang indi mahimo sang mga klinika. (Hebreo 4:​12) Madamo ang nabuligan sang Pulong kag espiritu sang Dios nga madaug ang pagkagiyan sa droga kag mapadapat ang laygay: “Tinluan naton ang aton kaugalingon sa tagsa ka kahigkuan sa unod kag espiritu, nga nagahimpit sang pagkabalaan sa kahadlok sa Dios.”​—⁠2 Corinto 7:⁠1.

Ginpamatud-an ini sang isa ka eksperiensia halin sa Myanmar. Ang isa ka tawo nga nagapakig-away sa pagkagiyan sa droga sa sulod sang madamo nga tuig nagsiling: “Nagiyan ako sa droga sang tin-edyer pa ako. Pila ka beses na nga gintinguhaan ko nga mag-untat, apang napaslawan ako. Nagpangawat ako agod masakdag ko ang akon bisyo. Subong resulta, sang 1988, napriso ako sing isa ka tuig.

“Sa tapos makaguwa sa prisuhan, nagpakig-upod ako liwat sa akon mga abyan. Wala madugay nagbalik ako sa bisyo. Bangod sining makahalalit nga bisyo, ginsikway ako sang akon pamilya. Dugang pa, bangod sang akon rebelyuso nga panimuot, madamo sa komunidad ang nahadlok sa akon kag sila man naglikaw sa akon.

“Nian isa ka adlaw natabo ang indi malikawan​—nasobrahan ako sang droga. Ginpriso ako liwat sa sulod sang tatlo ka tuig. Walay sapayan nga ang kabuhi sa prisuhan mabudlay kaayo, bisan paano nakalampuwas ako.

“Sang nakaguwa sa prisuhan, nangayo ako sing pasaylo sa akon pamilya bangod sang nagligad nga mga kasal-anan. Maluluy-on nga ginbaton nila ako, apang ginasulay ako gihapon sang akon mga abyan nga magbalik sa daan nga pagginawi.

“Sang ulihi, ginrekomendar sang akon lola sa isa ka lokal nga pastor nga matambong ako sa isa ka eskwelahan sa Biblia. Nagpasugot ang pastor. Apang, sang wala pa ako makatambong, ang akon tiya nga isa sang mga Saksi ni Jehova, nagsiling nga kon luyag ko magtuon sa Biblia, dapat nga magtuon ako sa mga Saksi.

“Nagkadto ako sa Kingdom Hall kag ginpakilala sa isa ka tawo nga nagpasugot nga magtuon sing Biblia upod sa akon. Madamo sa nagtambong ang mainit nga nagtamyaw kag nag-abiabi sa akon.

“Sa tapos nga nakatuon ako sa Biblia kag nagtambong sa Cristianong mga miting, ang handum sa droga ginbuslan sang handum nga mangin suod sa Dios. Isa ka tuig sang ulihi, nag-uswag ako tubtob nga gindedikar ko ang akon kabuhi kay Jehova nga Dios, kag ginsimbolohan ini paagi sa pagpabawtismo sa tubig.

“Sining karon lang, samtang nagapamalaybalay, nagkitaay kami sang akon anay kaupod sa paggamit sing droga. Indi sia makapati sa akon daku nga pagbag-o. Nagbukas ini sang kahigayunan nga makapanaksi, kag nasugid ko sa iya ang tuhoy sa paglaum sa Ginharian.

“Sa katapusan, nakita ko gid man ang matuod nga katuyuan kag kahulugan sang kabuhi. Bangod sa bulig sang Dios kag sang laygay halin sa iya Pulong, nabuligan ko karon ang iban nga bayaan ang makahalalit nga bisyo sang pag-abuso sa droga.”