Kon Ngaa ang Iban Nagabag-o sang Ila Relihion

Para sa madamo, ang relihion isa lamang ka etiketa. Ayhan ginapakita sini kon diin nagakadto kon kaisa ang isa ka tawo kon Domingo, kon diin sia nagapakasal, kag kon diin sia ilubong. Apang wala sini ginasugid kon ano sia nga sahi sang tawo ukon kon ano ang iya nahibaluan kag ginapatihan. Halimbawa, ginpakita sang isa ka surbe nga 50 porsiento sang nagapangangkon nga mga Cristiano ang wala makahibalo kon sin-o ang naghatag sing Sermon sa Bukid. Ti, bisan gani ang bantog nga lider sang India nga si Mohandas Gandhi, nga isa ka Hindu, nakahibalo sina!

MAKATILINGALA bala nga ang mga tawo nagabiya sa relihion samtang madamo sa ila ang halos wala sing nahibaluan tuhoy sa ila relihion? Indi, indi ini makatilingala. Apang, indi man ini malikawan. Ang mga nagbaton sing bulig nga matun-an ang Biblia masami nga nagakakibot sa daku nga mga kapuslanan sini sa ila. Ang Biblia mismo nagasiling: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo.”​—⁠Isaias 48:⁠17.

Ano ang dapat himuon sadtong wala mabusog sa ila espirituwal nga pagkagutom? Indi sila dapat mag-untat sa pag-alagad sa Dios! Sa baylo, dapat nila usisaon ang Biblia kag tan-awon kon ano ang ginaaman mismo sang Dios sa ila.

Mga Sabat sa Mabudlay nga mga Pamangkot

Sa edad nga pito ka tuig, nakita ni Bernd ang pagkapatay sang iya iloy.a Sa bug-os niya nga pagkabata, nagpalibog sia, ‘Diin na ang akon iloy? Ngaa kinahanglan ako magdaku nga wala sia?’ Subong isa ka tin-edyer, si Bernd aktibo nga katapo sang simbahan. Bangod nabalaka tuhoy sa pag-antos sang katawhan, handum niya nga magbulig subong isa ka trabahador sa imol nga pungsod. Apang, natublag sia sang mga pamangkot nga wala masabat sing makaalayaw sang iya simbahan.

Nian nasugilanon ni Bernd ang isa ka kabutho nga natabuan nga isa gali sang mga Saksi ni Jehova. Ginpakita sining pamatan-on kay Bernd halin sa Biblia nga ang iya iloy wala sing pangalibutan, nagakatulog sa kamatayon. Natun-an ni Bernd ang madamo nga bersikulo sa Biblia nga nagapaathag sini, subong sang Manugwali 9:5: “Nahanungod sa mga patay, wala sila makahibalo sing bisan ano.” Gani wala sing dapat kabalak-an si Bernd tuhoy sa kon bala ang iya iloy nagaantos sa purgatoryo​—⁠ukon sa mas malain pa. Bisan pa ang doktrina tuhoy sa dimamalatyon nga kalag ginatudlo sa kalabanan nga relihion, nakita ni Bernd sa Biblia nga ang tawhanon nga kalag amo mismo ang tawo. Kon ang tawo mapatay, ang kalag nagakapatay. “Ang kalag nga nagapakasala​—⁠ini mismo mapatay.”​—⁠Ezequiel 18:⁠4.

Natun-an man ni Bernd ang makalilipay nga paglaum para sa mga patay. Nabasa niya mismo sa tulun-an sang Biblia nga Binuhatan: “May pagkabanhaw sang mga matarong kag dimatarong.” (Binuhatan 24:15) Nalipay gid sia mahibaluan nga ining pagkabanhaw mahanabo diri sa duta, diin ipasag-uli sang Dios sa isa ka paraiso!​—⁠Salmo 37:29; Bugna 21:​3, 4.

Wala magdugay kag napaayawan ang espirituwal nga mga kinahanglanon ni Bernd paagi sa matuod nga ihibalo sa Biblia. Wala ginsikway ni Bernd ang relihion. Sa baylo, nagbiya sia sa simbahan nga indi makabusog sang iya kagutom kag ginbaton ang porma sang pagsimba nga napasad sing malig-on sa Biblia. Sia nagsiling: “Katorse ka tuig na yadto nga nagligad, kag wala ko gid ginhinulsulan ang akon ginhimo. Nahibaluan ko karon nga ang Manunuga indi ang ginatunaan sang pag-antos. Si Satanas amo ang dios sining sistema, kag sia ang balasulon sa mga kahimtangan sa palibot naton. Apang sa indi madugay tadlungon sang Dios ang tanan nga kahalitan nga ginhimo sang kalibutan ni Satanas. Ang akon iloy magabalik man sa pagkabanhaw. Mangin makalilipay gid ina!”

Subong man, natuman ni Bernd ang iya handum nga magtrabaho sa iban nga pungsod agod mabuligan ang iban. Ginbuligan niya ang iban sa pungsod sa luwas nga matun-an ang tuhoy sa Ginharian sang Dios, ang matuod nga solusyon sa ila pag-antos. Kaangay ni Bernd, natun-an sang minilyon nga sa indi madugay dulaon sang Dios ang pag-antos sang mga tawo. Nalipay sila mahibaluan nga may isa ka relihion nga nagapaayaw sang ila espirituwal nga kinahanglanon.​—⁠Mateo 5:⁠3.

Ano ang Katuyuan sang Kabuhi?

Samtang ang mga pungsod sa Nakatundan labi pa gid nga wala nagasapak sa relihion, madamo ang nagapamangkot, ‘Ano ang katuyuan sang kabuhi?’ Ang sabat masapwan sa Biblia, subong sang natukiban ni Michael. Sadtong tungatunga sang katuigan 1970, luyag ni Michael nga magbuylog sa isa ka terorista nga grupo. Isa lamang ang iya katuyuan sa kabuhi​—⁠hingabuton ang mga tawo nga sa banta niya, amo ang may salabton sa mga inhustisya sang kapitalista nga sistema. “Wala ako nagahalin sa balay nga indi dala ang akon pusil,” siling niya. “Ang akon plano amo nga patyon ang madamong dalagku nga mga politiko kag mga kapitalista tubtob sa masarangan ko. Handa ako mapatay para sa kausa.”

Palasimba si Michael, apang wala sing bisan isa sa iya simbahan ang makapaathag sang matuod nga katuyuan sang kabuhi. Gani sang magduaw ang mga Saksi ni Jehova sa iya puluy-an kag ginpakita sa iya ang mga sabat sang Biblia sa iya mga pamangkot, namati sing maayo si Michael. Nagsugod sia sa pagtambong sa mga miting para sa pagsimba sa lokal nga Kingdom Hall sang mga Saksi ni Jehova.

Ang mga abyan ni Michael interesado tuhoy sa iya karon nga pagkawili sa Biblia. “Magtambong kamo sa miting sini nga Domingo,” siling ni Michael sa ila. “Magpabilin kamo sing makadali. Kon indi ninyo maluyagan ang inyo mabatian, nian magpauli kamo.” Kag amo gid ang natabo, pagkatapos sang 45-minutos nga pamulongpulong pasad sa Biblia, ang kalabanan sang iya abyan nagbiya sa tilipunan. Apang ang isa​—⁠si Susan​—⁠nagpabilin. Naluyagan sining lamharon nga babayi ang iya nabatian. Nag-asawahay sang ulihi si Michael kag si Susan kag nabawtismuhan subong mga Saksi ni Jehova. “Nahibaluan ko na karon kon ngaa yari kita diri sa duta,” siling ni Michael. “Gintuga kita ni Jehova. Ang aton matuod gid nga katuyuan sa kabuhi amo ang pagkilala sa iya kag paghimo sang iya kabubut-on. Amo ina ang nagahatag sing matuod nga kaayawan!”

Minilyon ang may pareho nga pagpati kay Michael. Tinagipusuon nga ginabaton nila ang mga pulong sang Biblia: “Ang katapusan sang butang, sang nabatian na ang tanan, amo: Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.”​—⁠Manugwali 12:⁠13.

Paglandas sa mga Problema sang Kabuhi

Naeksperiensiahan naton tanan ang katumanan sang tagna nga makita sa 2 Timoteo 3:1: “Sa katapusan nga mga adlaw magaabot ang makahalanguyos nga mga tion nga mabudlay pakigbagayan.” Wala sing makalikaw sa mga problema sining “makahalanguyos nga mga tion.” Apang ginabuligan kita sang Biblia nga malandas ini.

Binagbinaga ang mag-asawa nga sanday Steven kag Olive. Sang magtuon sila sing Biblia upod sa mga Saksi ni Jehova, sila, kaangay sang madamo nga iban pa, may mga problema sa pag-asawahay. “Naglayuay ang amon buot,” paathag ni Steven. “Magkatuhay ang amon mga tulumuron kag mga interes.” Ano ang nakabulig sa ila nga magpabilin nga nagaupod? “Ginpakita sa amon sang mga Saksi ni Jehova kon paano namon maaplikar sa amon kabuhi ang mga prinsipio sa Biblia,” padayon ni Steven. “Sa una nga tion, natun-an namon kon ano ang buot silingon sang mangin dimakagod kag mainulikdon. Ang pag-aplikar sing mga prinsipio sa Biblia nagpasuod gid sa amon. Natigayon namon karon ang isa ka malipayon, malig-on nga pag-asawahay.”

Suod nga Kaangtanan sa Dios

Suno sa surbe sang Gallup sining karon lang, 96 porsiento sang mga Amerikano ang nagatuo sa Dios, kag ang kalabanan sa ila nagapangamuyo sa iya. Apang, ginpakita sang lain naman nga surbe nga ang mga nagakadto sa simbahan kag sa mga sinagoga pinakadiutay na karon sa sulod sang tunga sa siglo. Mga 58 porsiento sang mga Amerikano ang nagsiling nga nagasimba sila sing makaisa sa isa ka bulan ukon sing kubos pa. Maathag nga ang relihion wala nagapasuod sa ila sa Dios. Kag ini nga problema indi lamang sa Estados Unidos.

Si Linda nagdaku sa Bavaria. Isa sia ka aktibo nga Katoliko kag tayuyon nga nagapangadi. Sa amo man nga tion, nahadlok sia tuhoy sa palaabuton. Wala gid sia sing nahibaluan tuhoy sa katuyuan sang Dios para sa tawo. Sang 14 anyos pa lamang sia, nakapakigsugilanon si Linda sa mga Saksi ni Jehova, kag sia nagsiling: “Makawiwili ang ila ginsiling, gani ginbaton ko ang duha ka balasahon nga bulig sa pagtuon sa Biblia kag ginbasa ini gilayon.” Duha ka tuig sang ulihi, nagtuon si Linda sa Biblia upod sa mga Saksi ni Jehova. “Ang tanan nga natun-an ko sa Biblia tuhoy sa Dios makatarunganon,” siling niya. Naghalin si Linda sa iya simbahan kag nagpabawtismo subong isa ka Saksi ni Jehova sa edad nga 18.

Ano ang nagpahulag kay Linda nga islan ang iya relihion? Sia nagpaathag: “Ginbuligan ako sang akon simbahan nga mahibaluan nga may Dios, kag nagtuo ako sa iya. Apang malayo sia kag maila sa akon. Ang akon pagtuon sa Biblia wala lamang nagpabakod sang akon pagtuo sa Dios kundi nagbulig man sa akon nga makilala kag mahigugma sia. May hamili personal nga kaangtanan ako karon sa Dios, butang nga labi pa ka malahalon sangsa bisan ano.”

Ang Matuod nga Relihion Mapuslanon!

Ang imo bala relihion nagahatag sa imo sing espirituwal nga panuytoy kag nagapakita sa imo kon paano ang Biblia makabulig sa imo sa paglandas sa mga problema sang kabuhi? Ginatudlo bala sini ang paglaum sa Biblia para sa palaabuton? Nagahatag bala ini sa imo sing suod, personal nga kaangtanan sa Manunuga, pasad sa sibu nga ihibalo sa Biblia? Kon wala, indi mag-untat. Sa baylo nga sikwayon ang relihion, pangitaa ang porma sang pagsimba nga napasad sing malig-on sa Biblia. Nian mangin kaangay ikaw sa mga gintagna sa tulun-an sang Biblia nga Isaias: “Amo ini ang ginasiling sang Soberano nga Ginuong Jehova: ‘Yari karon! Ang akon mga alagad magakaon . . . Ang akon mga alagad magainom . . . Ang akon mga alagad magakalipay . . . Ang akon mga alagad magaamba sa kalipay bangod sang maayo nga kahimtangan sang tagipusuon.’ ”​—⁠Isaias 65:​13, 14.

[Footnote]

[Mga retrato sa pahina 4, 5]

Ang Biblia nagabulig sa aton nga makilala kag mahigugma ang Dios