Magpabilin nga May Kalig-unan Subong Bahin sang Organisasyon sang Dios

“Ang ngalan ni Jehova torre nga mabakod. Ang matarong nagadalagan pasulod sini kag ginahatagan sing pangamlig.”—HULUBATON 18:10.

1. Suno sa pangamuyo ni Jesus, anong mabudlay nga kahimtangan ang ginaatubang sang mga Cristiano?

WALA madugay antes sia mapatay, si Jesus nangamuyo sa iya langitnon nga Amay para sa iya mga sumulunod. Sing mainulikdon, sia nagsiling: “Ginhatag ko sa ila ang imo pulong, apang ang kalibutan nagdumot sa ila, bangod indi sila bahin sang kalibutan, subong nga ako indi bahin sang kalibutan. Nagapangabay ako sa imo, indi agod kuhaon sila gikan sa kalibutan, kundi agod bantayan sila bangod sa isa nga malaut.” (Juan 17:14, 15) Nahibaluan ni Jesus nga ang kalibutan mangin makatalagam nga duog para sa mga Cristiano. Magadumot ini paagi sa pagbutangbutang kag paghingabot sa ila. (Mateo 5:11, 12; 10:16, 17) Amo man ini ang halinan sang kagarukan.—2 Timoteo 4:10; 1 Juan 2:15, 16.

2. Diin makasapo ang mga Cristiano sing duog sang espirituwal nga kalig-unan?

² Ang kalibutan nga nagadumot sa mga Cristiano ginahuman sadtong nahamulag sa Dios kag yara sa idalom sang pagkontrol ni Satanas. (1 Juan 5:19) Ining kalibutan daku kaayo sangsa Cristianong kongregasyon, kag si Satanas mismo gamhanan kaayo sangsa kay bisan sin-o nga tawo. Sa amo, ang pagdumot sang kalibutan makatalagam gid. Diin makasapo sing espirituwal nga kalig-unan ang mga sumulunod ni Jesus? Ang dinalan sa Disiembre 1, 1922 nga guwa sang The Watchtower nagasabat: “Yari kita karon sa adlaw nga malaut. May kaawayon sa ulot sang organisasyon ni Satanas kag sa organisasyon sang Dios. Isa ini ka daku gid nga kaawayon.” Sa sini nga inaway, ang organisasyon sang Dios isa ka duog sang espirituwal nga kalig-unan. Ang tinaga nga “organisasyon” indi makit-an sa Biblia, kag sang katuigan 1920, ang “organisasyon sang Dios” isa ka bag-o nga ekspresyon. Ano, nian, ini nga organisasyon? Kag paano kita maamligan sini?

Ang Organisasyon ni Jehova

3, 4. (a) Suno sa isa ka diksionaryo kag sa The Watchtower, ano ang organisasyon? (b) Sa anong kahulugan nga ang internasyonal nga paghiliupod sang mga Saksi ni Jehova matawag nga isa ka organisasyon?

³ Ang organisasyon “isa ka organisado nga hubon,” suno sa Concise Oxford Dictionary. Ginahunahuna ini, nahangpan naton nga sanglit gin-organisar sang mga apostoles ang unang-siglo nga mga Cristiano nga mangin lokal nga mga kongregasyon sa idalom sang pagdumala sang nagadumala nga hubon sa Jerusalem, nagakaigo tawgon ina nga “asosasyon sang mga kauturan” subong organisasyon. (1 Pedro 2:17) Ang mga Saksi ni Jehova karon may kaanggid man nga pag-organisar. Ang paghiusa sang unang siglo nga hubon ginpalig-on sang “dulot sa mga tawo,” subong “mga manugbantay kag mga manunudlo.” Ang pila sa ila nagduaw sa lainlain nga kongregasyon, samtang ang iban mga gulang sa lokal nga mga kongregasyon. (Efeso 4:8, 11, 12; Binuhatan 20:28) Ginapalig-on sang kaanggid nga “mga dulot” ang paghiusa sang mga Saksi ni Jehova karon.

⁴ Ang Nobiembre 1, 1922, nga isyu sang The Watchtower nagsiling tuhoy sa tinaga nga “organisasyon”: “Ang organisasyon isa ka asosasyon sang mga tawo sa paghimo sang isa ka katuyuan.” Ginapaathag sang The Watchtower nga ang pagtawag sa mga Saksi ni Jehova nga isa ka organisasyon wala nagahimo sa ila nga “isa ka sekta suno sa kahulugan sang paggamit sa tinaga, apang nagakahulugan lamang ini nga ang mga Estudyante Sang Biblia [mga Saksi ni Jehova] nagatinguha nga himuon ang mga katuyuan sang Dios kag ginahimo ini suno sa paagi sang paghimo sang Ginuo sa tanan nga butang, sa organisado nga paagi.” (1 Corinto 14:33) Ginpakita ni apostol Pablo nga ang mga Cristiano sang iya mga adlaw naghulag man sa organisado nga paagi. Ginpaanggid niya ang paghiliupod sang hinaplas nga mga Cristiano sa tawhanon nga lawas, nga may madamo nga bahin, ang tagsa nagahimo sang iya gintangdo nga papel agod makapanghikot sing maayo ang lawas. (1 Corinto 12:12-26) Ekselente ini nga paglaragway sa isa ka organisasyon! Ngaa organisado ang mga Cristiano? Agod himuon ang “mga katuyuan sang Dios,” agod himuon ang kabubut-on ni Jehova.

5. Ano ang kitaon nga organisasyon sang Dios?

⁵ Gintagna sang Biblia nga ang matuod nga mga Cristiano karon mahiusa, tipunon sa isa ka “duta” subong isa ka “pungsod,” diin ‘magasiga sila subong mga sulo sa kalibutan.’ (Isaias 66:8; Filipos 2:15) Ining organisado nga “pungsod” nagadamo karon sing kapin sa lima ka milyon kag tunga. (Isaias 60:8-10, 22) Apang, indi ina ang kabug-usan sang organisasyon sang Dios. Nalakip man sa sini ang mga anghel.

6. Sa pinakamasangkad nga kahulugan, sin-o ang nagahuman sa organisasyon sang Dios?

⁶ Madamo sang tion diin ang mga anghel nagapanghikot upod sa tawhanon nga mga alagad sang Dios. (Genesis 28:12; Daniel 10:12-14; 12:1; Hebreo 1:13, 14; Bugna 14:14-16) Sing nagakaigo, nian, ang Mayo 15, 1925, nga guwa sang The Watchtower nagsiling: “Ang tanan balaan nga anghel bahin sang organisasyon sang Dios.” Dugang pa, ini nagsiling: “Ang ulo sang organisasyon sang Dios, nga may bug-os nga gahom kag awtoridad, amo [si] Ginuong Jesucristo.” (Mateo 28:18) Sa amo, sa bug-os nga kasangkaron, ang organisasyon sang Dios ginahuman sang tanan nga persona sa langit kag sa duta nga nagapanghikot sing nahiusa agod himuon ang kabubut-on sang Dios. (Tan-awa ang kahon.) Daw ano ka dalayawon nga pribilehiyo ang mangin bahin sini! Kag daw ano ka makalilipay ang magpaabot sang tion diin ang tanan buhi nga tinuga, langitnon kag dutan-on, maorganisar sa pagdayaw kay Jehova nga Dios sing nahiusa! (Bugna 5:13, 14) Ano, nian, ang pangamlig nga ginahatag sang organisasyon sang Dios karon?

Naamligan sa Organisasyon sang Dios—Paano?

7. Sa anong paagi ginaamligan kita sang organisasyon sang Dios?

⁷ Ang organisasyon sang Dios makabulig sa pagbantay sa aton batok kay Satanas kag sa iya mga pagsulay. (Efeso 6:11) Ginaipit, ginahingabot, kag ginasulay ni Satanas ang mga sumilimba ni Jehova sa isa lamang ka tulumuron: patalikuron sila gikan sa ‘dalanon nga dapat nila laktan.’ (Isaias 48:17; ipaanggid ang Mateo 4:1-11.) Indi naton malikawan sing bug-os ini nga mga pagsalakay sa sining sistema sang mga butang. Apang, ang aton suod nga kaangtanan sa Dios kag sa iya organisasyon nagapalig-on kag nagaamlig sa aton kag sa amo nagabulig sa aton nga makapabilin sa “dalanon.” Subong resulta, wala kita nagakadulaan sing paglaum.

8. Paano ginasakdag sang dikitaon nga organisasyon ni Jehova ang iya dutan-on nga mga alagad?

⁸ Paano ginaaman sang organisasyon sang Dios ini nga pangamlig? Una, padayon kita nga ginasakdag sang espiritu nga mga alagad ni Jehova. Sang si Jesus yara sa idalom sang mabaskog nga pag-ipit, gin-alagaran sia sang isa ka anghel. (Lucas 22:43) Sang yara si Pedro sa katalagman nga mapatay, milagruso nga ginluwas sia sang isa ka anghel. (Binuhatan 12:6-11) Walay sapayan nga wala na sing kasubong sina nga mga milagro karon, ang katawhan ni Jehova ginsaaran sing pagsakdag sang mga anghel sa ila pagbantala nga hilikuton. (Bugna 14:6, 7) Masami sila nga may kusog nga labaw sa kinaandan kon nagaatubang sing mabudlay nga mga kahimtangan. (2 Corinto 4:7) Dugang pa, nahibaluan nila nga “ang anghel ni Jehova nagakampo sa palibot sang mga nagakahadlok sa iya, kag ginaluwas niya sila.”—Salmo 34:7.

9, 10. Paano masiling nga “ang ngalan ni Jehova torre nga mabakod,” kag paano ini nga prinsipio naaplikar sa organisasyon sang Dios sa kabilugan?

⁹ Ang kitaon nga organisasyon ni Jehova isa man ka pangamlig. Paano? Sa Hulubaton 18:10, aton mabasa: “Ang ngalan ni Jehova torre nga mabakod. Ang matarong nagadalagan pasulod sini kag ginahatagan sing pangamlig.” Wala ini nagakahulugan nga ang pagsulitsulit lamang sa ngalan sang Dios makaamlig. Sa baylo, ang pagdangop naton sa ngalan sang Dios nagakahulugan nga nagasalig kita kay Jehova mismo. (Salmo 20:1; 122:4) Nagakahulugan ini sang pagsakdag sa iya soberanya, pagsunod sa iya mga kasuguan kag mga prinsipio, kag pagtuo sa iya mga saad. (Salmo 8:1-9; Isaias 50:10; Hebreo 11:6) Nagakahulugan ini sang paghatag kay Jehova sang eksklusibo nga debosyon. Yadtong nagasimba lamang kay Jehova sa sini nga paagi ang makasiling kaupod sang salmista: Kay [Jehova] nagakasadya ang amon tagipusuon; kay nagasalig kami sa iya balaan nga ngalan.”—Salmo 33:21; 124:8.

¹⁰ Ang tanan nga yara karon sa kitaon nga organisasyon sang Dios nagasiling kaupod ni Miqueas: “Kita, sa aton bahin, magalakat sa ngalan ni Jehova nga aton Dios tubtob sa tion nga dimapat-od, bisan sa walay katubtuban.” (Miqueas 4:5) Ang modernong-adlaw nga organisasyon gintipon sa palibot sang “Israel sang Dios,” nga ginatawag sa Biblia “ang katawhan sa iya ngalan.” (Galacia 6:16; Binuhatan 15:14; Isaias 43:6, 7; 1 Pedro 2:17) Sa amo, ang mangin bahin sang organisasyon ni Jehova nagakahulugan nga mangin bahin sang katawhan nga nagapangita, kag nagabaton, sing pangamlig sa ngalan sang Dios.

11. Sa anong espesipiko nga mga paagi ginaamligan sang organisasyon ni Jehova yadtong mga bahin sini?

¹¹ Dugang pa, ang kitaon nga organisasyon sang Dios isa ka katilingban sang pagtuo, isa ka asosasyon sang mga masigkatumuluo nga nagapabakuray kag nagapalig-unay. (Hulubaton 13:20; Roma 1:12) Isa ini ka duog diin ginaatipan sang Cristianong mga manugbantay ang mga karnero, ginapalig-on ang nagamasakit kag ginapung-awan, kag nagatinguha nga ipasag-uli ang mga nakasala. (Isaias 32:1, 2; 1 Pedro 5:2-4) “Ang matutom kag mainandamon nga ulipon” nagaaman sing “pagkaon sa nagakaigo nga tion” paagi sa organisasyon. (Mateo 24:45) Ina nga “ulipon,” nga ginahuman sang hinaplas nga mga Cristiano, nagaaman sing pinakamaayo espirituwal nga mga butang—sibu, pasad sa Biblia nga ihibalo nga makadul-ong sa kabuhi nga walay katapusan. (Juan 17:3) Bangod sa panuytoy halin sa “ulipon,” ang mga Cristiano ginabuligan nga makahupot sing mataas nga mga talaksan sa moral kag mangin “mahalungon subong sang mga man-ug apang inosente subong sang mga salampati” sa makatalagam nga palibot. (Mateo 10:16) Kag ginabuligan sila pirme nga “mangin madamo sing ginahimo sa hilikuton sang Ginuo,” nga isa man ka daku nga pangamlig.—1 Corinto 15:58.

Sin-o ang Bahin sang Organisasyon sang Dios?

12. Sin-o ang nakilal-an nga bahin sang langitnon nga organisasyon sang Dios?

¹² Sanglit matigayon sadtong bahin sang organisasyon sang Dios ini nga pangamlig, sin-o ang nalakip sa sini? Tuhoy sa langitnon nga organisasyon, wala na sing duhaduha pa tuhoy sa sabat sa sini nga pamangkot. Si Satanas kag ang iya mga anghel wala na sa langit. Sa pihak nga bahin, ang matutom nga mga anghel didto pa gihapon “sa pangkabilugan nga katilingban.” Nakita ni apostol Juan nga sa katapusan nga mga adlaw, “ang Kordero,” ang mga kerubin (“ang apat ka buhi nga tinuga”), kag ang “madamo nga anghel” yara nayon malapit sa trono sang Dios. Kaupod nila ang 24 ka gulang—nagatiglawas sa sadtong hinaplas nga mga Cristiano nga nakasulod na sa ila mahimayaon langitnon nga palanublion. (Hebreo 12:22, 23; Bugna 5:6, 11; 12:7-12) Ang tanan maathag nga bahin sang organisasyon sang Dios. Apang, para sa mga tawo, ang mga butang indi maathag.

13. Paano ginapakilala ni Jesus yadtong bahin kag indi bahin sang organisasyon sang Dios?

¹³ Si Jesus nagsiling tuhoy sa pila nga nagapangangkon nga nagasunod sa iya: “Madamo ang magasiling sa akon sa sina nga adlaw, ‘Ginuo, Ginuo,’ wala bala kami magpanagna sa imo ngalan, kag magsubol sing mga demonyo sa imo ngalan, kag maghimo sing madamong gamhanan nga buhat sa imo ngalan?’ Kag nian pahayagan ko sila: Wala gid ako makakilala sa inyo! Palayo kamo sa akon, kamo nga mga manughimo sang pagkamalinapason.” (Mateo 7:22, 23) Kon ang isa manughimo sang pagkamalinapason, indi gid sia bahin sang organisasyon sang Dios, bisan ano pa ang pagpangangkon niya, kag bisan diin man sia magkadto agod magsimba. Ginpakita man ni Jesus kon paano makilala ang isa nga bahin sang organisasyon sang Dios. Sia nagsiling: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang mga langit, kundi ang isa nga nagahimo sang kabubut-on sang akon Amay nga yara sa mga langit.”—Mateo 7:21.

14. Anong mga bahin sang kabubut-on sang Dios ang nakilal-an nga obligasyon sadtong bahin sang organisasyon sang Dios?

¹⁴ Sa amo, agod mangin bahin sang organisasyon sang Dios—diin ang “ginharian sang mga langit” amo ang panguna nga bahin—dapat himuon sang isa ang kabubut-on sang Dios. Ano ang iya kabubut-on? Ginpakilala ni Pablo ang isa ka importante nga bahin sini sang magsiling sia: “Ang kabubut-on [sang Dios] amo nga ang tanan nga sahi sang tawo maluwas kag makadangat sa sibu nga ihibalo sang kamatuoran.” (1 Timoteo 2:4) Kon matuod nga ginatinguhaan sang isa ka tawo nga matigayon ang sibu nga ihibalo gikan sa Biblia, agod iaplikar ini sa iya kabuhi, kag ipaambit ini sa “tanan nga sahi sang tawo,” ginahimo niya ang kabubut-on sang Dios. (Mateo 28:19, 20; Roma 10:13-15) Kabubut-on man sang Dios nga pakan-on kag tatapon ang karnero ni Jehova. (Juan 21:15-17) Ang Cristianong mga miting may importante nga bahin sa sini. Mahimo nga wala ginaapresyar sang isa ka tawo ang iya duog sa organisasyon sang Dios kon hilway sia sa pagtambong sa sina nga mga miting apang wala ginahimo ini.—Hebreo 10:23-25.

Pagpakig-abyan sa Kalibutan

15. Anong paandam ang ginhatag ni Santiago sa mga kongregasyon sang iya mga adlaw?

¹⁵ Mga 30 ka tuig pagkatapos mapatay si Jesus, ginpakilala sang iya utod sa iloy nga si Santiago ang pila ka bahin nga makaguba sa duog sang isa sa organisasyon sang Dios. Sia nagsulat: “Mga makihilahion, wala bala kamo makahibalo nga ang pagpakig-abyan sa kalibutan pagpakig-away sa Dios? Busa, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Santiago 4:4) Ang kaaway sang Dios indi gid bahin sang iya organisasyon. Ano, nian, ang pagpakig-abyan sa kalibutan? Ginpaathag ini subong pagtigayon sing tuhay nga mga porma, subong sang pagpakigsuod ukon pagpakig-upod sa malain nga mga kaupdanan. Inang tanan nga pagpaathag husto suno sa prinsipio. Dugang pa, ginapatuhuyan ni Santiago ang isa ka espesipiko gid nga butang—ang sayop nga panghunahuna nga nagadul-ong sa dinagakaigo nga pagginawi.

16. Ano ang konteksto sang paandam ni Santiago nga ang pagpakig-abyan sa kalibutan pagpakig-away sa Dios?

¹⁶ Sa Santiago 4:1-3, aton mabasa: “Ano ang ginatunaan sang mga inaway kag ano ang ginatunaan sing mga pagbinangig sa tunga ninyo? Indi bala nga naghalin ini diri, nga amo, halin sa inyo mga handum sa kaayawan sang unod nga nagainaway sa inyo mga bahin? Nagahandum kamo, apang wala ninyo matigayon. Padayon kamo nga nagapamatay kag nagakaibog, apang indi kamo makatigayon. Padayon kamo nga nagabinangig kag nagapakig-away. Wala kamo makakuha bangod wala kamo nagapangayo. Nagapangayo kamo, apang wala kamo makabaton, bangod nagapangayo kamo sa malain nga katuyuan, agod nga mahinguyang ninyo ini sa inyo mga kailigbon sa lakas nga balatyagon.” Pagkatapos nga nasulat niya ining mga pinamulong sang magpaandam si Santiago batok sa pagpakig-abyan sa kalibutan.

17. Sa anong paagi may “mga pag-inaway” kag “mga pinuyas” sa Cristianong kongregasyon sang unang-siglo?

¹⁷ Mga siglo pagkatapos napatay si Santiago, ang butig nga mga Cristiano literal nga nakig-away kag nagpinatyanay. Apang, ginasulatan ni Santiago ang mga katapo sang unang-siglo nga “Israel sang Dios,” ang palaabuton nga langitnon nga ‘mga saserdote kag mga hari.’ (Bugna 20:6) Wala sila mag-inaway ukon magpinatyanay sa literal nga mga inaway. Kon amo ngaa ginhambalan ni Santiago tuhoy sining mga butang ang mga Cristiano? Ti, gintawag ni apostol Juan ang bisan sin-o nga nagadumot sang iya utod nga manugpatay-sing-tawo. Kag ginpatuhuyan ni Pablo ang binangig sa personalidad kag mga dipaghangpanay sa mga kongregasyon subong “mga inaway” kag “pinuyas.” (Tito 3:9; 2 Timoteo 2:14; 1 Juan 3:15-17) Tuhoy sa sini, mahimo nga ginahunahuna ni Santiago ang kapaslawan sa paghigugma sa mga masigka-Cristiano. Sa tunga nila, ang mga Cristiano nagagawi kaangay sa pagtamod sang mga kalibutanon sa isa kag isa.

18. Ano ang makadul-ong sa dimahigugmaon nga mga buhat kag balatyagon sa tunga sang mga Cristiano?

¹⁸ Ngaa nagakatabo ining mga butang sa Cristianong mga kongregasyon? Bangod sang sayop nga mga panimuot, subong sang paghamkon kag “kailigbon sa lakas nga balatyagon.” Ang bugal, kahisa, kag ambisyon, makaguba man sa mahigugmaon nga paghiliupod sa kongregasyon. (Santiago 3:6, 14) Ina nga mga panimuot nagahimo sa isa nga abyan sang kalibutan kag, busa, kaaway sang Dios. Wala sing isa nga nagahupot sing kaangay sina nga mga panimuot ang makapaabot nga makapabilin nga bahin sang organisasyon sang Dios.

19. (a) Sin-o ang panguna nga balasulon kon masapwan sang Cristiano nga nagapanggamot sa iya tagipusuon ang sayop nga panghunahuna? (b) Paano malandas sang isa ka Cristiano ang sayop nga panghunahuna?

¹⁹ Sin-o ang aton basulon kon masapwan naton ang sayop nga panghunahuna nga nagapanggamot sa aton tagipusuon? Si Satanas bala? Sa isa ka kasangkaron, huo. Sia ang “manugdumala sang awtoridad sang hangin” sining kalibutan, diin lapnag ina nga mga panimuot. (Efeso 2:1, 2; Tito 2:12) Apang, sa kinaandan, ang gamot sang sayop nga panghunahuna yara sa aton dihimpit nga unod. Pagkatapos magpaandam batok sa pagpakig-abyan sa kalibutan, si Santiago nagsulat: “Nagahunahuna bala kamo nga ang kasulatan nagahambal nga wala sing katuyuan: ‘Nahuyog bala sa pagkahisa amo nga ang espiritu nga nagapuyo sa sulod naton padayon nga nagahandum’?” (Santiago 4:5) Tanan kita may duna nga huyog sa paghimo sing sala. (Genesis 8:21; Roma 7:18-20) Apang, mahimo naton mabatuan ina nga huyog kon batunon naton ang aton mga kaluyahon kag magsalig sa bulig ni Jehova nga malandas ini. Si Santiago nagsiling: “Ang dibagay nga kaayo nga ginahatag sang [Dios] mas daku [sangsa aton duna nga huyog sa pagkahisa].” (Santiago 4:6) Paagi sa bulig sang balaan nga espiritu sang Dios kag sang pagsakdag sang matutom Cristianong mga kauturan, kag paagi sa gahom sang halad-gawad ni Jesus, ang matutom nga mga Cristiano wala ginadaug sang kaluyahon sang ila unod. (Roma 7:24, 25) May kalig-unan sila sa organisasyon sang Dios, mga abyan sang Dios, indi sang kalibutan.

20. Anong bugana nga mga pagpakamaayo ang matigayon sadtong bahin sang organisasyon sang Dios?

²⁰ Ang Biblia nagasaad: “Si Jehova magahatag gid sing kusog sa iya katawhan. Pakamaayuhon ni Jehova mismo ang iya katawhan sang paghidait.” (Salmo 29:11) Kon matuod nga bahin kita sang modernong-adlaw nga “pungsod” ni Jehova, ang iya kitaon nga organisasyon, makaambit kita sa kusog nga iya ginahatag kag matigayon ang paghidait nga iya ginahatag sa iya katawhan. Matuod, ang kalibutan ni Satanas daku kaayo sangsa kitaon nga organisasyon ni Jehova, kag makusog kaayo si Satanas sangsa aton. Apang si Jehova amo ang Labing Gamhanan. Ang iya aktibo nga puwersa indi madaug. Ang iya gamhanan nga mga anghel nahiusa man sa aton sa pag-alagad sa Dios. Sa amo, walay sapayan sang mga pagdumot nga aton ginaatubang, makatindog kita sing malig-on. Kaangay ni Jesus, madaug naton ang kalibutan.—Juan 16:33; 1 Juan 4:4.

Mapaathag Mo Bala?

◻ Ano ang kitaon nga organisasyon sang Dios?

◻ Sa anong mga paagi ang organisasyon sang Dios nagahatag sing pangamlig?

◻ Sin-o ang bahin sang organisasyon sang Dios?

◻ Paano naton malikawan nga mangin mga abyan sang kalibutan?

[Kahon sa pahina 9]

Ano ang Organisasyon Sang Dios?

Sa mga literatura sang mga Saksi ni Jehova, ang ekspresyon nga “organisasyon sang Dios” ginagamit sa tatlo ka paagi.

1 Langitnon, dikitaon nga organisasyon ni Jehova, nga ginatapuan sang matutom espiritu nga mga tinuga. Ginatawag ini nga “Jerusalem sa ibabaw” sa Biblia.​—Galacia 4:​26.

2 Ang tawhanon, kitaon nga organisasyon ni Jehova. Sa karon, ginahuman ini sang hinaplas nga nagkalabilin nga gin-updan sang dakung kadam-an.

3 Ang bug-os uniberso nga organisasyon ni Jehova. Sa karon, ginahuman ini sang langitnon nga organisasyon ni Jehova upod sa iya hinaplas, gin-adoptar nga mga anak sa duta nga may espirituwal nga paglaum. Sa ulihi, magalakip man ini sa himpit nga mga tawo sa duta.

[Retrato sa pahina 10]

Ang pinakamaayo nga espirituwal nga pagkaon ginaaman paagi sa organisasyon ni Jehova