Ang Matagnaon nga Pulong sang Dios Nagahatag sing Paglaum para sa Palaabuton

BANGOD sang Pulong sang Dios, ang Balaan nga Biblia, ginatamod sang matuod nga mga Cristiano ang palaabuton nga may pagtuo, pagsalig, kag pagkamalaumon. Malig-on sa ila kaangtanan kay Jehova nga Dios, malipayon nila nga ginahulat ang palaabuton. Subong sang ginpaathag sa nagabukas nga pamulongpulong sa “Matagnaon nga Pulong Sang Dios” Distrito nga mga Kombension, ang mga Saksi ni Jehova nangin maukod nga mga estudyante sang tagna sang Biblia sa sulod sang madamong tuig. Gani, ano ang gintigana ni Jehova para sa iya katawhan sa sini nga mga kombension? Nagauyat sing mga Biblia, nakunyag ang tanan nga tumalambong nga mahibaluan ini. Ang tema sa tagsa ka adlaw sang kombension ginahatag subong isa ka subtitulo.

UNA NGA ADLAW: Paglakat sa Kapawa Sang Pulong Sang Dios

Ang pamulongpulong nga “Ang Pulong Sang Dios Nagatuytoy sa Aton” nagpaathag nga ang katawhan ni Jehova kaangay sang isa ka tawo nga naglakbay sa kagab-ihon. Samtang nagasubang ang adlaw, makita niya ang mga landong, apang kon ang adlaw nagasilak sa ibabaw na mismo sang iya ulo, makita na gid niya ang maathag. Subong sang gintagna sa Hulubaton 4:​18, nangin maathag ang dalanon sang katawhan ni Jehova sa idalom sang masanag nga kapawa sang kamatuoran gikan sa matagnaon nga pulong sang Dios. Wala sila ginpabay-an nga masandad sa espirituwal nga kadulom.

Ang keynote address, “Hatagi Sing Igtalupangod ang Matagnaon nga Pulong Sang Dios,” nagpahanumdom sa mga tagpalamati nga ang mga nagalaum kay Jehova maluwas sa kapaslawan kag kalugaw-an nga naeksperiensiahan sang mga tawo nga nagasunod sa butig nga mga mesias kag butig nga mga manalagna. Sa maathag nga kinatuhayan, tumalagsahon gid ang mga kinaiya sang matuod nga Mesias, si Jesucristo! Halimbawa, ang milagruso nga pagbaylo-dagway ni Jesus naghatag sing paglaragway sa iya subong ginpalingkod sa trono nga Hari sa Ginharian sang Dios. Kutob sang paggahom niya sa Ginharian sang 1914, si Jesus man ang “bituon sa adlaw” nga ginsambit sa 2 Pedro 1:⁠19. “Subong amo ang Mesianiko nga Bituon sa Adlaw, ginapahibalo niya ang isa ka bag-o nga adlaw, ukon dag-on, nga nagapamanagbanag para sa tanan nga matinumanon nga katawhan,” siling sang humalambal.

Nagaumpisa sang programa sa hapon, ang pamulongpulong nga “Nagasiga Subong mga Sulu” nagpasangkad sang Efeso 5:​8, diin naglaygay si apostol Pablo sa aton nga “padayon nga maglakat subong mga anak sang kapawa.” Ang mga Cristiano mga sulu, indi lamang paagi sa pagpaambit sang Pulong sang Dios sa iban kundi paagi man sa pag-aplikar sang Biblia sa ila kabuhi nga nagailog kay Jesus.

Agod mangin subong sini nga sulu, dapat kita “Magkalipay sa Pagbasa sa Pulong Sang Dios.” Ginbinagbinag ini nga topiko sa tatlo-sing-bahin nga simposium. Sa tapos mabalikwat si Abraham Lincoln, nga nagtawag sa Biblia nga “amo ang labing matahom nga regalo nga ginhatag sang Dios sa tawo,” ginpamangkot sang nahauna nga humalambal ang mga tagpalamati kon ano ang ginapakita sang ila mga batasan sa pagbasa nahanungod sa kadalumon sang ila apresasyon sa Pulong ni Jehova. Ginpalig-on ang mga tagpalamati nga basahon sing maayo ang Biblia, nagahatag sing tion nga handurawon ang mga kasaysayan sang Kasulatan kag iangot ang bag-o nga mga punto sa mga butang nga natun-an na.

Ginpadaku sang masunod nga bahin sang simposium ang importansia sang pagtuon, indi sang pasapayan nga pagbasa, agod matunaw naton “ang pagkaon nga matig-a.” (Hebreo 5:​13, 14) Makapabakod gid ang pagtuon, siling sang humalambal, kon aton anay ‘ihanda ang aton tagipusuon,’ subong sang ginhimo sang Israelinhon nga saserdote nga si Esdras. (Esdras 7:10) Apang ngaa importante gid ang pagtuon? Bangod may direkta ini nga kaangtanan sa aton relasyon kay Jehova. Busa, ang pagtuon sang Biblia dapat mangin hamili, makalilipay, kag makapapagsik, bisan pa nagadalahig ini sing disiplina sa hunahuna kag panikasog. Paano kita makakita sing tion para sa mapuslanon nga pagtuon? Paagi sa ‘pagbakal sang nagakaigo nga tion’ gikan sa kubos ka importante nga mga butang, siling sang katapusan nga humalambal sa simposium. (Efeso 5:16) Huo, ang yabi agod makakita sing tion amo ang labing maayo nga paggamit sang aton tion.

Ginbaton sang pamulongpulong nga “Ang Dios Nagapabaskog sa Isa nga Ginalapyo” nga madamong tawo karon ang ginalapyo. Agod matigayon naton ang “gahom nga labaw sa kinaandan” sa Cristianong ministeryo, dapat kita magsalig kay Jehova, nga “nagahatag sing gahom sa ginalapyo.” (2 Corinto 4:​7; Isaias 40:29) Ang nagapabakod nga mga bulig nagalakip sang Pulong sang Dios, pangamuyo, Cristianong kongregasyon, regular nga pagpakigbahin sa ministeryo, Cristianong mga manugtatap, kag matutom nga halimbawa sang iban. Ang tema nga “Mangin mga Manunudlo Bangod Sang Tion” nagpadaku nga ang mga Cristiano dapat mangin mga manunudlo kag mga manugbantala kag dapat magpangabudlay sing lakas sa pagpalambo sang “kalantip sa pagpanudlo.”​—⁠2 Timoteo 4:⁠2.

Ang katapusan nga pamulongpulong sini nga adlaw, “Ang mga Nagapakig-away sa Dios Indi Magadaug,” nagsambit sang sining karon lang nga sayop nga mga panikasog sa pila ka pungsod nga tawgon ang mga Saksi ni Jehova nga isa ka makatalagam nga kulto. Apang indi kita dapat mahadlok, bangod ang Isaias 54:​17 nagasiling: “ ‘Ang bisan anong hinganiban nga himuon batok sa imo indi magmadinalag-on, kag ang tagsa ka dila nga magtindog batok sa imo sa paghukom tagudilian mo. Amo ini ang panublion sang mga alagad ni Jehova, kag ang ila pagkamatarong gikan sa akon,’ siling ni Jehova.”

IKADUHA NGA ADLAW: Ang mga Butang nga Ginpahibalo Paagi sa Matagnaon nga Kasulatan

Sa tapos mabinagbinag ang teksto sa Biblia sa sina nga adlaw, nalipay ang mga nagtipon sa ikaduha nga simposium sang kombension, nga natig-uluhan “Paghimaya kay Jehova Subong mga Manugdala Sing Kapawa.” Ginpakita sang una nga pamulongpulong nga tulumuron sang isa ka Cristiano ang paghimaya kay Jehova paagi sa pagbantala bisan diin. Ginsambit sang masunod nga bahin ang kinahanglanon nga tuytuyan ang mga nagaugyon sa organisasyon sang Dios. Paano? Paagi sa paghinguyang sing lima ukon napulo ka minuto antes ukon sa tapos sang tagsa ka pagtuon sang Biblia sa puluy-an agod ipakita kon paano nagapanghikot ang organisasyon sang Dios. Ginpadaku sang ikatlo nga pamulongpulong sa sini nga simposium ang kinahanglanon nga himayaon ang Dios paagi sa maayong mga buhat.

Ang pamulongpulong nga “Higugmaa Sing Labi Gid ang mga Pahanumdom ni Jehova” nagbinagbinag sang pinili nga mga bersikulo sang Salmo 119. Sa pagkamatuod, nagakinahanglan kita sing mga pahanumdom, bangod kita tanan may huyog nga malipat. Busa, daw ano ka importante nga palambuon naton ang gugma sa mga pahanumdom ni Jehova, subong sang ginhimo sang salmista!

Nagsunod ang isa ka pinasahi nga bahin​—⁠ang pamulongpulong sa bawtismo nga natig-uluhan “Ang Pagpamati sa Matagnaon nga Pulong Nagadul-ong sa Bawtismo.” Ginpahanumdom ang mga kandidato sa bawtismo nga ginailog nila si Cristo indi lamang paagi sa pagpabawtismo kundi paagi man sa pagsunod sing maayo sa iya mga tikang. (1 Pedro 2:21) Isa gid ka pribilehiyo nga makigbahin ining mga bag-uhan sa katumanan sang Juan 10:​16, diin gintagna ni Jesus nga tipunon niya ang “iban nga mga karnero” agod mag-alagad kaupod sang iya hinaplas sang espiritu nga mga disipulo!

Sa pagsugod sang programa sa hapon, ang pamulongpulong nga “Magpamati sa Ginasiling Sang Espiritu” nagpaathag nga ang espiritu ni Jehova nagapakighambal sa aton paagi sa Biblia, sa “matutom kag mainandamon nga ulipon,” kag sa aton nahanas-sang-Biblia nga konsiensia. (Mateo 24:45) Busa, indi na kinahanglan nga makabati pa ang mga Cristiano sing literal nga tingog gikan sa langit agod mahibaluan kon paano pahamut-an ang Dios. Ang masunod nga pagbinagbinag, “Matutom nga Pagsakdag sa Panudlo nga Nahisuno sa Diosnon nga Debosyon,” naglaygay sa mga Cristiano nga indi pag-usisaon ang makapaluya-sing-buot nga mga ideya nga ginapalapnag sining kalibutan. Sa katunayan, ang wala sing pagpugong nga pagkamausisaon makapadayag sa aton sa makahalalit nga impormasyon gikan sa mga apostata kag sa iban pa nga mga ahente ni Satanas. Daw ano pa kaayo nga basahon naton sing regular ang Biblia kag ang tanan nga artikulo sa Ang Lalantawan kag Magmata!

Natig-uluhan sing “Padayon nga Sunda ang Huwaran Sang Makapapagros nga mga Pulong,” ginpadaku sang masunod nga pamulongpulong ang importansia nga mangin pamilyar sing maayo sa Makasulatanhon nga “huwaran,” ukon balayan, sang kamatuoran. (2 Timoteo 1:13) Ang paghangop sa sini nga huwaran amo ang yabi indi lamang sa pagtigayon sing diosnon nga debosyon kundi sa pagkilala man sang butang nga wala nahisuno sa kamatuoran.

Handurawa nga ginatamod ka ni Jehova subong kalahamut-an. Daw ano nga kadungganan! Pasad sa tagna ni Hageo, ang pamulongpulong nga “Ang ‘Kalahamut-an nga mga Butang’ Nagapuno sa Balay ni Jehova” labi gid ka makapalig-on bangod ginpasalig sini ang mga tagpalamati nga ang tagsa ka katapo sang “dakung kadam-an” kalahamut-an gid kay Jehova. (Bugna 7:9) Busa, luwason sila ni Jehova sa iya katapusan nga ‘pag-uyog’ sa mga pungsod sa tion sang nagapakari nga “dakung kapipit-an.” (Hageo 2:​7, 21, 22; Mateo 24:21) Apang, sa wala pa ina, dapat padayon nga magbantay sa espirituwal ang katawhan ni Jehova, subong sang ginpaathag sa bahin nga “Ang Matagnaon nga mga Kasulatan Nagapaalisto sa Aton nga Magbantay.” Ginkutlo sang humalambal ang pinamulong ni Jesus: “Busa, magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo.” (Mateo 24:42) Paano kita makapabilin nga nagabantay sa espirituwal? Paagi sa pagpabilin nga masako sa pag-alagad kay Jehova, padayon nga magpangamuyo, kag pirme nga nagapaabot sang daku nga adlaw ni Jehova.

Ang katapusan nga pamulongpulong sa sini nga adlaw natig-uluhan “Ang Matagnaon nga Pulong sa Tion Sang Katapusan.” Dumdumon gid ini sa mga tinuig nga maabot. Ngaa? Bangod ginpahibalo sang humalambal ang pagpaguwa sang bag-o nga libro​—⁠Binagbinaga ang Tagna ni Daniel! “Gintuptupan sining publikasyon, nga may matahom nga mga ilustrasyon kag 320 ka pahina, ang tagsa ka bahin sang tulun-an sang Daniel,” siling sang humalambal. Isa gid ka nagapabakod-pagtuo nga pamatuod nga si Jehova nagapasilak sing kapawa sa iya matagnaon nga Pulong!

IKATLO NGA ADLAW: Ang Matagnaon nga Pulong Sang Dios Wala Gid Nagakapaslawi

Ang katapusan nga adlaw sang kombension nagsugod paagi sa simposium nga “Matagnaon nga mga Pulong Para sa Gintalana nga Tion.” Gin-usisa sang tatlo ka bahin ang tatlo ka pagpahayag ni manalagna Habacuc sa mga paghukom ni Jehova. Ang nahauna batok sa batinggilan nga Juda kag ang ikaduha batok sa mapiguson nga Babilonia. Ang katapusan, nga matuman pa lang, naaplikar sa nagahilapit nga kalaglagan sang tanan malauton nga mga tawo. Nagahambal tuhoy sa Armagedon, ginpukaw sang utod sa katapusan nga bahin sang simposium ang diosnon nga kahadlok sa iya mga tagpalamati sang magsiling sia: “Sa pagkamatuod, mangin makapulunaw gid kon gamiton na ni Jehova ang bug-os nga puwersa sang iya daku nga gahom.”

“Pag-apresyar sa Aton Espirituwal nga Palanublion” ang tema sang makatalandog nga drama sa Biblia sa kombension. Ginpaanggid sining nagausisa sa kalag nga presentasyon ang mga panimuot nanday Jacob kag Esau sa espirituwal nga mga butang. Gintamay ni Esau ang iya espirituwal nga palanublion, amo nga ginhatag ini kay Jacob, nga nagpakabahandi sini. “Ano [nga espirituwal nga palanublion] ang ginhatag ni Jehova sa aton?” ang pamangkot sa mga tumalambong sa kombension. “Ang kamatuoran sang iya Pulong, ang Biblia; ang paglaum nga kabuhi nga walay katapusan; kag ang kadungganan nga itiglawas sia subong mga manugbantala sing maayong balita,” sabat sang humalambal.

Ang masunod nga bahin gintig-uluhan “Ano ang Kahulugan sa Imo Sang Aton Hamili nga Palanublion?” Ginapakita naton ang husto nga panimuot sa aton espirituwal nga palanublion paagi sa pag-una sang pag-alagad kay Jehova kag sang espirituwal nga mga pribilehiyo sangsa personal ukon materyal nga mga interes. Sa sining paagi ginatukod naton ang aton kabuhi sa aton kaangtanan kay Jehova, nga tuhay gid kanday Adan, Esau, kag sa di-matutom nga mga Israelinhon.

Ang diskurso publiko, “Paghimo sa Tanan nga Butang nga Bag-o​—⁠Subong Sang Gintagna,” nagtingob sa apat ka yabi nga tagna tuhoy sa “bag-ong mga langit” kag sa “bag-ong duta.” (Isaias 65:​17-25; 66:​22-24; 2 Pedro 3:​13; Bugna 21:​1, 3-5) Sing maathag, ginhunahuna ni Jehova ang mas daku nga katumanan sining mga tagna sangsa iya ginpasag-uli nga katawhan sang 537 B.⁠C.⁠E. Huo, ginhunahuna niya ang iya Ginharian nga panguluhan (ang “bag-ong mga langit”) kag ang mga sakop sini sa duta (ang “bag-ong duta”), nga magapuyo sa mahimayaon bug-os globo nga paraiso.

Nagahinakop sang kombension sing makakulunyag kag makapapagsik amo ang pamulongpulong nga “Ang Aton mga Ginapaabot Samtang Ginatuytuyan Kita Sang Pulong Sang Dios.” Ginpahanumdom sini ang tanan nga “ang tion nga nabilin ginpalip-ot” para sa pagtapos sang hilikuton nga pagbantala sing Ginharian. (1 Corinto 7:29) Huo, nagatindog kita sa atangan mismo sang katumanan sang paghukom ni Jehova batok kay Satanas kag sa iya bug-os malaut nga sistema. Kabay nga pareho kita sing mga balatyagon sa salmista nga nag-amba: “Ang amon kalag nagahulat kay Jehova. Sia amon kabulig kag amon taming.” (Salmo 33:20) Isa gid ka mahimayaon nga palaabuton ang yara sa unhan para sa sadtong ang ila mga ginapaabot napasad sa matagnaon nga pulong sang Dios!

[Retrato sa pahina 7]

Ginpadaku sang makatalandog nga drama ang pag-apresyar sa espirituwal nga palanublion sang mga alagad ni Jehova

[Retrato sa pahina 7]

Madamo sadtong nagtuman sa matagnaon nga pulong sang Dios ang ginbawtismuhan