Maalamon nga Nagagamit sang Importante nga mga Kagamitan
1 Samtang nagapanaksi ka sa mga ganhaan, tulumuron mo nga ang tagsa ka tagbalay magapakigbahin sa Makasulatanhon nga paghambalanay paagi sa paggamit sa Biblia kag sa iban pa importante nga mga kagamitan. (Ipaanggid ang 2 Corinto 6:1; 2 Timoteo 2:15.) Ano bala sa karon ang ginakabalak-an sang mga tawo sa inyo teritoryo? Nabalaka bala sila sa kahimtangan sang pangabuhi kag sa pag-usmod sang kalidad sang pamilya? Ang pagkomento tuhoy sini nga mga topiko sa introduksion mahimo magadul-ong sa isa ka maayong paghinun-anon sa Biblia.
2 Makasiling ka:
◼ “Sa sining makahalangkat nga mga tion, madamo nga tawo ang nabudlayan sa pangabuhi. Malubad bala sa banta mo sang tawhanon nga mga panguluhan ang aton mga problema sa pangabuhi? [Pamatii ang sabat.] Personal ko nga nasapwan ining panghunahuna nga makapalig-on gid . . . ”
3 Nian sarang mo mabasa ang Salmo 72:12-14 kag mapili man ang dugang pa nga teksto gikan sa pahina 154-5 sang Reasoning nga libro. Ukon pagkatapos mabasa ang isa ka kasulatan, sarang mo mapatuhuyan ang isa ka parapo sa tract nga Kabuhi sa Mahidaiton nga Bag-ong Kalibutan. Madamong manugbantala—lakip ang mga kabataan—ang madinalag-on nga nakasugod sing mga pagtuon sa Biblia sa mga tract paagi sa pagbasa sa isa ka parapo kag sa pagpamangkot sang opinyon sang tagbalay tuhoy sa ginbasa.
4 Sa iban nga mga komunidad ayhan pakamaayuhon mo ini nga pagpalapit:
◼ “Luyag makita sang madamo nga tawo ang pagbalik sa tradisyunal nga pagkabuhi sang pamilya. Sa banta mo dapat bala mamat-od ang kada indibiduwal kon anong mga prinsipio ang dapat sundon, ukon dapat bala nga may isa ka pagsulundan para sa tanan? [Pasabta sia.] Madamo ang nagaugyon nga kon sundon ang laygay sang Biblia, magauswag sing daku ang kalidad sang pagkabuhi sang pamilya.”
5 Sa sining punto ayhan luyag mo gamiton ang mga punto sa ubos sang subtitulo nga “Diin ang Dalan Padulong sa Kadalag-an?” sa bag-ong tract nga Magkalipay sa Pagkabuhi Subong Pamilya sa pagsugod sing isa ka pagtuon sa Biblia, ukon mahimo mo buksan ang kapitulo 29 sang Mabuhi sing Dayon nga libro kag ipakita ang mga punto sa pahina 243-6.
6 Kon nakasugod ka sing pagtuon sa nahauna nga pagduaw, maghimo sing pat-od nga mga kahimusan agod mapadayon ang paghambalanay sa ulihi nga petsa. Mahimo mo ipasad ang sadsaran para sa imo masunod nga pagduaw paagi sa pagsiling sa tagbalay nga sa imo pagbalik luyag mo sabton ang kinaandan nga pamangkot: “Ngaa ginatugutan sang Dios ang kalautan?” Ang artikulo sa ubos magapanugda kon paano pasangkaron ang tema sa masunod nga pagduaw.