Buligi ang Iban Paagi sa Paggamit sing mga Magasin

¹ Daw ano ka malipayon kita sa pagbaton sing pinakaulihi nga mga guwa sang Ang Lalantawan kag Magmata! Ginapakabahandi naton ang kahigayunan nga mabasa ini sa gilayon kon mahimo agod makabenepisyo kita gikan sa impormasyon nga ginahatag sini. Dugang sa pagpangita sa materyal nga mahimo makabulig sa aton sing personal, isa ka maayong ideya nga pangitaon ang mga punto nga sarang magamit sa pagtanyag sing mga magasin sa iban. Ayhan mahimo naton tandaan ang mga bahin nga ilabi na nga makagalanyat sa mga tawo sa teritoryo sang aton kongregasyon ukon sulatan pa gani sing mga nota ang marhin sang aton kopya agod pahanumdumon ang aton kaugalingon sang mga punto nga mahambalan kag kon paano matanyag ang artikulo sa aton lugar.

² Ang aton mga balasahon may permanente nga balor. Bisan pa mahimo naton hatagan una sing igtalupangod ang pagtanyag sa bag-ong mga magasin, indi kinahanglan nga ihaboy mo ang daan nga mga guwa, sanglit ang impormasyon wala nagalipas. Tagua ang nagligad nga mga guwa sa imo bag agod magamit mo ini kon nagapanaksi. Mapuslanon ini ilabi na kon mahibaluan mo ang espesipiko nga kinahanglanon sang tagbalay.