Pamangkot
◼ Anong igtalupangod ang dapat ihatag sa mga kagamitan nga ginagamit naton sa pagpanaksi nga hilikuton?
1 Bisan pa nga may nahunahuna nga isa ka nagakaigo nga Makasulatanhon nga presentasyon, ang isa ka manugbantala mahimo nga indi handa may kaangtanan sa kagamitan nga ginagamit niya. Sa ganhaan, mahimo nga wala sia sing literatura nga dapat itanyag sa sina nga tion, ukon mahimo nga naukot ukon nagisi ang mga magasin, mga brosyur, kag mga tract sa iya bag sa pagpanaksi. Ayhan indi niya makita ang lapis ukon ang house-to-house record bangod indi organisado sing maayo ang iya bag.
2 Importante nga hatagan sing maayo nga igtalupangod ang imo kagamitan antes makigbahin sa pag-alagad sa latagon. Anong mga butang ang ginaunod sang isa ka nasangkapan sing maayo nga bag sa pagpanaksi? Ang Biblia kinahanglanon. Ilakip ang bastante nga mga house-to-house record. Pat-ura nga may publikasyon ikaw nga ginatanyag para sa bulan. Ang bag-ong mga guwa sang mga magasin subong man mga tract kag mga brosyur kinahanglanon man. Magdala sing isa ka kopya sang Reasoning nga libro. Ang pagdala sing bag-o nga Ang Aton Ministeryo sa Ginharian magabulig sa imo agod marepaso ang ginpanugda nga mga presentasyon antes magkadto sa ganhaan. Ang pagdala sing isa ka kopya sang isa sang aton mga publikasyon nga gindesinyo para sa mga pamatan-on makabulig sa imo nga mangin handa sa pagpakigsugilanon sa mga tin-edyer.
3 Ang tanan nga butang nga gamiton dapat nga maayo sing hitsura kag naareglo sing mahipid sa imo bag. Ang bag mismo indi kinahanglan nga bag-o, apang dapat ini matinlo kag maayo sing hitsura. Ang imo bag sa pagpanaksi bahin sang imo kagamitan nga ginagamit para sa pagbantala sang maayong balita. Hupti ini nga maayo sing kahimtangan.