Magbantala nga May Ighalangop
1 Agod may ighalangop, kinahanglan nga nahangpan naton ang mga tawo nga ginabantalaan naton. Ngaa? Bangod ang aton kadalag-an sa paglab-ot sa tagipusuon sang mga tawo nagadepende sa aton ikasarang sa pagtanyag sang mensahe sang Ginharian sa paagi nga nagaganyat sa ila. Sa bulan sang Enero, igatanyag naton ang Mankind’s Search for God nga libro, ukon ang libro nga True Peace and Security—How Can You Find It? Ang masunod nga mga panugda mahimo nga mangin mabuligon.
2 Kon nagatanyag sang libro nga “Mankind’s Search for God,” mahimo ka magsugod paagi sa pagsiling:
◼“Makawiwili nga masugilanon ang mga tawo sang lainlain nga mga relihion. Apang natalupangdan mo bala nga ang kalabanan nga mga tawo kontento na lamang sa relihion sang ila mga ginikanan sa baylo nga sila mismo ang mangita sa Dios? [Pasabta sia.] Ginausisa sining libro, Mankind’s Search for God, ang mga panudlo sang dalagkung mga relihion kag ginapaanggid ini sa Biblia. Talupangda ining lima ka pamangkot diri sa sa pahina 17, parapo 28, nga magabulig sa aton sa pag-usisa sang aton mga pagpati kon ipaanggid sa Biblia.” Basaha ang mga pamangkot sa malip-ot kag nian agdaha ang tagbalay nga kuhaon ang libro kag usisaon sing personal ining mga pamangkot. Magtanyag sa pagbalik para sa dugang pa nga paghambalanay.
3 Ukon, sa tapos mapakilala ang imo kaugalingon, mahimo ka makasiling:
◼“Bangod sang tuman kadamo nga relihion sa karon, napamangkot mo na bala kon paano kita makasiguro nga ang aton relihion ginakahamut-an sang Dios?” Sa tapos makakomento ang tagbalay, buksi ang pahina 377 sang Search for God nga libro kag ipakita ang napulo ka paagi nga sa sini makilala naton ang matuod nga relihion. Ipatalupangod ilabi na ang ikaanom nga punto, kag basaha ang Miqueas 4:2-4. Nian pamangkuta ang tagbalay kon pila ka relihion ang nagahimo sini karon. Itanyag ang libro sa iya agod mausisa niya kag maghimos sa pagbalik agod mahambalan sing dugang pa ini nga butang.
4 Nasapwan sang madamo nga ang simple nga pagbukad sa isa ka kapitulo sang Search for God nga libro nga nagahinun-anon sang relihion sang tagbalay nagabulig sa pagganyat sang iya igtalupangod. Ayhan luyag mo ini tilawan ilabi na sa mga di-Cristiano.
5 Kon ginapakamaayo mo nga itanyag ang libro nga “True Peace and Security—How Can You Find It?” mahimo nimo mapatuhuyan ang ilustrasyon sa sa pahina 4 kag magsiling:
◼ “Ginalaragway sini nga ilustrasyon kon ano ang ginatudlo sang Biblia nahanungod sa katuyuan sang Dios para sa duta. Ano sa banta mo ang dapat nga himuon nimo kag sang imo pamilya agod makapuyo sa isa ka paraiso nga duta? [Pasabta sia.] Ginapakita sang Biblia nga ang matuod nga paghidait kag kalig-unan mangin isa ka katunayan sa dili madugay sa bug-os nga duta kag nga ang Paraiso igapasag-uli. [Basaha ang Salmo 37:10, 11.] Ginapakita sini nga libro kon ano ang dapat mo himuon agod makabenepisyo gikan sa kon ano ang pagahimuon sang Dios. Luyag ko ibilin ining kopya sa imo.”
6 Ang maayo nga ighalangop magabulig sa aton sa paghantop sang mga kinahanglanon kag mga kaayuhan sang mga tawo nga masugilanon naton. Ang Hulubaton 16:23 nagapasalig sa aton, nga nagasiling: “Ang tagipusuon sang maalam nagatudlo sang iya baba sa pagpakita sing ighalangop, kag nagadugang sing tinun-an sa iya mga bibig.”