Pagpanginpulos Gikan sa Teokratikong Eskwelahan sa Pagministro Para sa 1996—Bahin 1
1 Nabasa mo na bala ang mga instruksion nga ginhatag sa “Theocratic Ministry School Schedule for 1996”? Nakita mo bala ang pila ka pagbag-o? Halin sa Enero tubtob Abril, ang Assignment Num. 3 igapasad sa Reasoning nga libro, kag halin sa Mayo tubtob Disiembre, igapasad ini sa bag-ong ginpaguwa nga Ihibalo nga libro. Ang Assignment Num. 4 mangin isa ka pamulongpulong tuhoy sa lainlain nga karakter sa Biblia kada semana.
2 Mga Asaynment sang Estudyante: Ang Assignment Num. 3 ginahatag sa utod nga babayi. Kon napasad ini sa Reasoning nga libro, ang danyag dapat nga nagadalahig sang pamalaybalay ukon dipormal nga pagpanaksi. Kon napasad sa Ihibalo nga libro, dapat ini ipresentar subong isa ka pagduaw liwat ukon pagtuon sa Biblia sa puluy-an. Mangin mabuligon gid ini, kay ang Ihibalo nga libro pagagamiton sing maid-id sa pagdumala sing mga pagtuon sa Biblia sa puluy-an.
3 Kon ang danyag isa ka pagtuon sa Biblia sa puluy-an, ang duha ka utod nga babayi mahimo maglingkod. Sugdi dayon ang pagtuon paagi sa paghatag sing malip-ot nga panugod nga mga komento, kag nian ipakiana ang naimprinta nga pamangkot. Ang papel sang tagbalay dapat tungdan sing matuodtuod. Ang ginhinambitan nga mga kasulatan mahimo buksan kag basahon kon ginatugot sang tion. Dapat gamiton sang utod nga babayi ang arte sa pagpanudlo paagi sa pagpakomento sa tagbalay sa kalalangan sang mga pamangkot kag paagi sa pagpangatarungan sa mga kasulatan nga gingamit.
4 Ano ang dapat himuon kon mas madamo nga kasulatan ang ginhinambitan sa asaynment sangsa mapaathag sa lima ka minuto? Pilia ang yabi nga mga teksto nga nagapatalupangod sang pangunang mga punto. Kon diutay lamang ang mga kasulatan, ang pangunang mga punto sa leksion mahimo hambalan sing mas maid-id pa. Sa pulupanag-on, ang isa ka parapo ukon isa ka dinalan gikan sa libro mahimo basahon kag nian hambalan upod sa tagbalay.
5 Ang kahon nga natig-uluhan “Tilawi ang Imo Ihibalo,” nga masapwan sa katapusan sang tagsa ka kapitulo sang Ihibalo nga libro, mahimo repasuhon sing malip-ot sang manugbantala nga ang iya asaynment nagatuptop sang ulihi nga parapo sang kapitulo. Ang mga information box nga yara sa sulod sang gintangdo nga mga parapo mahimo man mahambalan kon ginatugot sang tion. Kon ang information box ginatung-an sang duha ka asayment, ang utod nga babayi nga ginhatagan sing nahaunang asaynment mahimo magabinagbinag sini. Ang mga ilustrasyon sa libro mahimo makomentuhan kon nagakabagay ini sa materyal nga ginabinagbinag.
6 Ang Assignment Num. 4 dapat nga mangin tuman ka makawiwili kag praktikal. Kada semana binagbinagon sini ang matuod nga halimbawa—isa ka karakter sa Biblia. Tun-i sing maayo kon ano ang ginasiling sang Insight, Tomo 1, tuhoy sa gintangdo nga karakter sa Biblia. Maghimo sing pamulongpulong sa palibot sang tema, kag magpili sing yabi nga mga teksto sa Biblia nga magabulig sa tumalambong sa pagkonsentrar sa karakter sa Biblia kag sa iya personalidad, lakip na ang mga kinaugali, mga kinaiya, ukon mga huyog nga luyag naton ilugon ukon sikwayon. Ang mga Kasulatan nga wala sing direkta nga labot sa karakter sa Biblia mahimo malakip kon ginapadaku sini kon paano ginatamod ni Jehova ang maayo ukon malain nga mga kinaiya ukon kon may kaangtanan ini sa tema sang pamulongpulong.
7 Kon himuslan naton sing bug-os ang paghanas nga ginaaman sa eskwelahan, ‘mawali naton sing maayo pa ang pulong’ sa paagi nga nagapasundayag sing maayong “arte sa pagpanudlo.”—2 Tim. 4:2.