Bugna—Yabi sa Matuod nga Kalipay
1 Sa Bugna 1:3, ginasugid ni apostol Juan sa aton kon paano masapwan ang kalipay. Sia nagsulat: “Malipayon sia nga nagabasa sing mabaskog kag yadtong nagapamati sang mga pulong sining tagna, kag nagasunod sang mga butang nga nasulat sa sini.” Ang libro nga Revelation—Its Grand Climax At Hand! nakabulig sa madamo nga makasapo sing daku nga kalipay. May maayong rason kita nga itanyag ini sa iban.
2 Mahimo ninyo sugdan ang isa ka paghambalanay paagi sini nga pamangkot:
◼ “Sa banta mo, mahimo bala mahangpan ang tulun-an nga Bugna sa Biblia, ukon pirme bala ini magapabilin nga tanhaga? [Pasabta sia.] Madamo ang nagahunahuna sing kaanggid sa imo. Talupangda kon ano ang ginasiling sang Biblia sa Bugna 1:3. [Basaha.] Gani ang Bugna mahimo mahangpan, kag ang ihibalo sa sini makahatag sa aton sing kalipay. Paano ini posible?” Repasuha ang ginasiling sang parapo 2 sa pahina 6, kag nian magsiling: “Ginahatag sining publikasyon ang bersikulo-por-bersikulo nga paghinun-anon sa tulun-an sang Bugna. Nalipay ako sa pagbilin sini nga kopya sa imo.”
3 Sanglit madamo ang nabalaka sa pag-aman sang ila materyal nga mga kinahanglanon, mahimo ini makapukaw sing interes:
◼ “Ano sa banta mo ang labing daku nga kinahanglanon naton? [Pasabta sia.] Madamo ang nagabatyag nga ang kinahanglan naton amo ang madamo pa nga materyal nga mga butang.” Buksi ang pahina 73 kag repasuha ang mga punto sa kahon nga natig-uluhan “Materialism Versus Wisdom.” Magpadayon paagi sa pagsiling: “Ginapakita sini nga ginahatag ang tuman nga pagpadaku sa materyal nga mga butang; dapat kita magkabalaka sing labi sa aton espirituwal nga mga kinahanglanon.” Basaha ang Juan 17:3, kag ipaathag kon paano ang ihibalo tuhoy sa Dios mahimo makadul-ong sa kabuhi nga walay katapusan. Itanyag ang libro kag maghimos sing isa ka pagduaw liwat.
4 Sanglit madamo ang nabalaka tuhoy sa kasisit-an sa kalibutan, mahimo nimo ini tilawan:
◼ “Ang tanan nga nasugilanon ko nabalaka sa palaabuton. Nagapati ang pila ka lider sang kalibutan nga yari na kita sa bibi sang isa ka bag-ong dag-on sang paghidait. Ano ang masiling mo tuhoy sina? [Pasabta sia.] Walay sapayan sang tanan nga panikasog sang tawo, ang kasingki kag kasisit-an nagadugang sa bug-os nga kalibutan. Ginahatag sang Biblia ang lamang mapinadayunon nga solusyon sa sining mga problema. [Basaha ang 2 Pedro 3:13. Buksi ang ilustrasyon sa pahina 302, kag ipaathag kon paano dalhon sang Ginharian sang Dios ang mapinadayunon nga paghidait kag kalig-unan sa sining duta.] Ining publikasyon magabulig sa imo sa paghibalo kon paano nimo mahimo nga maagom ang kabuhi nga walay katapusan sa idalom sang paggahom sang Ginharian sang Dios.”
5 Kon makasumalang ikaw sing isa nga masako kag dapat lamang nga magdali ikaw, mahimo nimo masiling ini:
◼ “Sanglit nagadali ikaw, luyag ko ibilin ining tract nga natig-uluhan Makalampuwas Bala Ining Kalibutan? [Buksi ang pahina 6 kag basaha ang Bugna 21:3, 4.] Ginapalig-on ko nga basahon mo ini. Sa masunod nga pagduaw ko, luyag ko mahibaluan kon ano ang panghunahuna mo tuhoy sini.”
6 Samtang ginatanyag naton ang Revelation—Its Grand Climax At Hand! sa Pebrero, walay duhaduha nga madamo ang makaagom sing kalipay paagi sa paghantop sang kahulugan sang makatilingala nga mga tagna sang Bugna.—Hulu. 3:13.