Pamangkot

◼ Ngaa dapat naton gilayon ireport ang aton hinimuan sa pag-alagad sa latagon kada bulan?

Kita tanan nagabatyag sing kalipay kon makabati kita sing maayong mga butang nga nahimo sa pagbantala sing mensahe sang Ginharian. (Tan-awa ang Hulubaton 25:⁠25.) Ang Binuhatan 2:​41 nagareport nga pagkatapos sang diskurso ni Pedro sang adlaw sang Pentecostes “mga tatlo ka libo ka kalag ang gindugang.” Mga pila ka tion pagkatapos, ina nga kadamuon nagdugang sing tubtob sa “mga lima ka libo.” (Binu. 4:4) Nangin makapapagsik gid yadto nga mga report sa nahaunang-siglo nga mga Cristiano! Nalipay man kita karon nga makabati sing mga report nahanungod sa kadalag-an nga naagom sang aton mga kauturan sa pagbantala sing maayong balita sa bug-os nga kalibutan.

Sanglit madamo nga tion kag panikasog ang nadalahig sa pagtipon sa mga report, ang kooperasyon sang tagsa ka manugbantala sang Ginharian kinahanglanon. Matutom mo bala nga ginahatag ang imo report sing maaga kada bulan?

Ang mga report sang pag-uswag nagapahalipay sa aton sing daku. Dugang pa, ang mga report nagabulig sa Sosiedad nga mabantayan ang pag-uswag sang bug-os kalibutan nga hilikuton. Dapat himuon ang desisyon nahanungod sa kon diin mahimo nga kinahanglanon ang dugang nga bulig ukon ang sahi kag kadamuon sang literatura nga pagaimprintahon. Ginagamit sang mga gulang sa tagsa ka kongregasyon ang mga report sa pag-alagad sa latagon sa paghibalo kon diin ang sarang pauswagon. Ang maayong mga report makapalig-on, nagapahulag sa aton tanan nga usisaon ang aton kaugalingon nga ministeryo para sa posible nga mga pag-uswag.

Dapat batunon sang tanan nga manugbantala ang ila indibiduwal nga responsabilidad nga ihatag ang report sa pag-alagad sa latagon sing maaga kada bulan. Ang mga konduktor sa Pagtinuon sa Libro sang Kongregasyon amo ang magapahibalo sa mga manugbantala tuhoy sini nga responsabilidad. Mahimo ini ipahinumdom sa katapusan nga pagtinuon sa libro kada bulan. Kon indi mahatag ang mga report sa pag-alagad sa latagon sa Kingdom Hall, mahimo ini tipunon sang konduktor sang Pagtinuon sa Libro sang Kongregasyon kag pat-uron nga ginahatag ini sa sekretaryo sa husto nga tion agod malakip sa tayuyon nga binulan nga report sang kongregasyon sa Sosiedad.

Ang aton kakugi sa pagreport sing matutom sang aton hinimuan sa pag-alagad sa latagon sa gilayon magapamag-an sang lulan sang mga may salabton sa aton espirituwal nga kaayuhan.