Bag-ong Programa Sang Pinasahi Nga Adlaw Nga Asambleya
1 Ang “Mangin mga Tawo nga Natudluan ni Jehova” amo ang tema para sa bag-ong programa sang pinasahi nga adlaw nga asambleya sugod sa Pebrero. (Juan 6:45) Ang balaan nga pagtudlo gikan kay Jehova nagabulig gid sa aton agod magkabuhi sing makaalayaw. Nagapalambo ini sa sulod naton sing hanuot nga pagpabalor sa aton espirituwal nga pinanubli. Ang aton mga panikasog nga buligan ang iban nga makabati sing maayong balita nagahimo sa aton nga mapuslanon nga mga katapo sang katilingban. Ining pinasahi nga adlaw nga asambleya nagapadaku sang mga kabulahanan nga ginaagom sang mga tawo nga natudluan ni Jehova.
2 Ipaanggid sang programa ang mga benepisyo sang balaan nga panudlo sa mga katalagman sang kalibutanon nga tinun-an. Mahangpan naton sing mas maathag kon paano nagaaman si Jehova sing pinakamataas nga porma sang edukasyon—edukasyon nga napasad sa iya Pulong, ang Biblia. Ipadaku ang tatlo ka bahin sang pagsimba diin makaagom kita sing kalipay subong mga natudluan sang Dios. Dugang pa, ang mga pamatan-on palig-unon nga ilugon ang tumalagsahon nga mga halimbawa sa Biblia subong nanday David kag Timoteo kag isentro ang ila kabuhi sa espirituwal nga mga hilikuton. Ang aton pagtuo mapabakod samtang ginapatalupangod man ang katutom sang mga may edad. Ang bag-ong mga dedikado nga kalipikado pagabawtismuhan. Antes pa mag-abot ang adlaw sang asambleya, dapat nila pahibaluon ang nagadumala nga manugtatap tuhoy sina nga handum.
3 Ang pangunang diskurso sa pinasahi nga adlaw nga asambleya ginatig-uluhan sing “Gintudluan ni Jehova sa Paghimo sang Iya Kabubut-on.” Ipadaku sini ang mga rason kon ngaa dapat kita tanan magpadayon sa pagtuon, magmalig-on sa pagtuo, kag magpadayon sa pag-uswag. Ang makapabakod nga mga eksperiensia ilakip agod ipakita kon paano nabuligan sang mga publikasyon sang Sosiedad ang madamo agod matudluan ni Jehova.
4 Maghimo sing pat-od nga mga plano sa pagtambong. Makapaabot kamo nga matudluan kamo sing madamong maayong butang sang aton Dakung Manunudlo.—Isa. 30:20.