Ipanagtag Sing Lapnag Ang Kingdom News Num. 35
1 Ang Oktubre kag Nobiembre mangin masako nga binulan para sa aton tanan. Sa nahaunang 11 ka adlaw sang Oktubre, itanyag naton ang indibiduwal nga mga kopya sang Ang Lalantawan kag Magmata! Nian, halin sa Domingo, Oktubre 12, tubtob sa Domingo, Nobiembre 16, magabuylog kita sa bug-os kalibutan nga pagpanagtag sing Kingdom News Num. 35. Pribilehiyo naton nga dalhon ang importante nga mensahe sa tanan nga tawo sa aton lugar. Amo ini ang sabat sa pamangkot, “Magahigugmaanay Pa Ayhan ang Tanan nga Tawo?” Sa sining pinasahi nga kampanya, ipanagtag naton ang Kingdom News Num. 35 sa ordinaryo nga mga adlaw. Sa talipuspusan sang mga semana, dugang sa pagtanyag sing Kingdom News, gamiton naton ang bag-o nga mga guwa sang mga magasin.
2 Sin-o ang Mahimo nga Makigbahin? Subong sa kinaandan, ang mga gulang magapanguna sa hilikuton. Ang tanan nalipay sa pagpanagtag sing Kingdom News, kag pat-od gid nga madamong manugbantala ang magaauxiliary payunir sa isa ukon duha ka bulan sang kampanya. Luyag sang iban nga mga manugbantala nga maghinguyang sing mas madamo pa nga tion sangsa kinaandan sa ministeryo.
3 May estudyante ka bala sa Biblia nga madugay na nga nagatuon sa Ihibalo nga libro kag malapit na mangin kalipikado sa pagpakigbahin sa pag-alagad sa latagon? Ayhan mahimo sia mangin isa ka dibawtismado nga manugbantala sa ulihi agod makapakigbahin sa kampanya sa Kingdom News. Ang isa ka simple nga presentasyon amo lamang ang ginakinahanglan sa pagpakilala sa tract. Halimbawa, ang isa mahimo makasiling: “Ining mensahe tuman ka importante nga ginapanagtag ini sa bug-os nga kalibutan sini nga bulan sa 169 ka pamulong. Luyag ko nga makatigayon ka sang imo personal nga kopya.” Bisan ang magagmay nga mga kabataan makapakigbahin sing mapuslanon sa sining makakulunyag nga hilikuton.
4 Dapat palig-unon sang mga konduktor sa pagtinuon sa libro ang tagsa ka katapo sa ila grupo nga makigbahin sing bug-os sa pagpanagtag sing Kingdom News Num. 35. Mahimo nga may mga manugbantala man nga nangin diaktibo apang mahimo liwat mangin aktibo sa pag-alagad kon makabaton sila sing kinahanglanon nga pagpalig-on. Antes sang kampanya, dapat duawon sang mga gulang ang kada isa sa ila agod hibaluon kon ano ang dapat himuon agod buligan sila nga makaupod sa eksperiensiado nga mga manugbantala sa sining bahin sang ministeryo.
5 San-o Kita Magatipon Para sa Pag-alagad? Ining tanan nga hilikuton magakinahanglan sing kombeniente kag praktikal nga mga kahimusan para sa grupo nga pagpanaksi. Kon posible, dapat organisahon ang mga miting sa pag-alagad para sa tagsa ka ordinaryo nga adlaw, sa talipuspusan sang mga semana, kag sa mga gab-i. Dapat ini hiwaton sa mga oras nga mahimuslan sing bug-os sang mga manugbantala kag mga payunir ang tion sa pagpanaksi. Ayhan ang mga kahimusan sa pagtipon sa kahapunanon para sa kaayuhan sang mga estudyante sa eskwelahan, sang de-relyebo nga mga mamumugon, kag sang iban pa pagahimuon. Dapat pat-uron sang manugtatap sa pag-alagad nga may madamong teritoryo nga mapamalaybalayan kag duog sang negosyo agod ang tanan makapakigbahin sing bug-os sa hilikuton. Kon may madamo nga manugbantala sa isa ka lugar, dapat sila mangin mainandamon sa kon pila ang magapangabudlay sa gintangdo nga seksion sang teritoryo.
6 Kamusta ang mga Wala sa Balay? Luyag naton masugilanon sing personal ang madamo nga tagbalay kon mahimo agod ipaathag kon ngaa dapat nila basahon ang Kingdom News Num. 35. Gani kon sa pagduaw mo ang balay wala sing tawo, isulat ang direksion kag magduaw liwat sa tuhay nga oras sang adlaw. Kon sa katapusan nga semana sang kampanya indi gihapon madinalag-on ang imo mga panikasog nga masugilanon ining mga tagbalay, mahimo nimo mabilin ang isa ka kopya sang Kingdom News sa ganhaan sa isa ka lugar nga indi makita sang nagalabay. Sa mga pamalay, mangin alisto nga tanyagan sing Kingdom News ang mga indibiduwal nga nagalakat sa dalan. Kon nagapangabudlay sa mga uma kag sa diin mas madamo ang teritoryo sangsa sarang matuptupan sa tion sang kampanya, ang isa ka kopya sang Kingdom News mahimo mabilin sa mga balay nga wala sing tawo sa una nga pagduaw.
7 Ano ang Aton Tulumuron? Dapat panikasugan sang mga kongregasyon nga ubuson ang ila tanan nga suplay sang Kingdom News agod matuptupan ang bug-os nga teritoryo antes matapos ang kampanya sa Nobiembre 16. Kon ang asaynment nga teritoryo sang inyo kongregasyon daku kaayo kag indi peligruso ang mangabudlay sing isahanon sa baylo nga may kaupod, ayhan matukiban mo nga mapuslanon nga himuon ini. Magabulig ini sa imo nga mapalab-utan sing maayong balita ang mas madamo nga takus. (Mat. 10:11) Ayhan mapuslanon ang magdala sing pila ka tract kag Biblia sa imo bulsa ukon kahita, sa baylo nga maggamit sing briefcase. Pat-ura nga maghupot sing husto nga rekord sang mga nagpakita sing interes.
8 Handa Ka Na Bala sa Pagsugod? Dapat handaan sang mga gulang kon pila ka ekstra nga magasin ang kinahanglan sang kongregasyon kag dapat mag-order sing nagakaigo. Indi kinahanglan nga mag-order sing Kingdom News Num. 35, kay ang kada kongregasyon padalhan sini. Kon diin nga may bastante nga teritoryo, ang mga espesyal, regular, kag auxiliary payunir makatigayon sing 250 ka kopya ang tagsa agod ipanagtag, samtang ang mga manugbantala sang kongregasyon hatagan sing 50 ka kopya ang tagsa. Madamo kita sing dapat himuon. Nalangkag ka bala sa pagpakigbahin sa sining makalilipay nga hilikuton? Walay duhaduha nga nalangkag ka. Ipanagtag naton sing lapnag gid ang importante nga mensahe nga pasad sa Biblia sa Kingdom News Num. 35!