Nagapadayon ang Programa sa Pagtukod sing mga Kingdom Hall
1 Sang 1983 sa “Paghiusa sa Ginharian” Distrito nga mga Kombension sa Estados Unidos, ginpahibalo nga isa ka pinasahi nga pundo ang painon agod sakdagon ang pagtukod kag pagkay-o sing mga Kingdom Hall sa bug-os nga Estados Unidos kag Canada. Wala naton mahibaluan sadto kon ano nga mga pagpakamaayo ang mangin resulta gikan sa sining diutay nga mga ginhalinan. Naeksperiensiahan naton sing bug-os ang ginasiling sang Salmo 92:4: “Kay ginpasadya mo ako, O Jehova, bangod sa imo buhat; bangod sa mga binuhatan sang imo mga kamot nagasinggit ako sa kalipay.”
2 Nalipay gid kita sa ginahimo karon. Padayon karon ang ginpadasig nga programa sa pagtukod sing mga Kingdom Hall sa bug-os nga kalibutan. Sa pila ka paagi, tanan kita may pribilehiyo nga makapakigbahin sa sini nga hilikuton. Ginahimo naton ini paagi sa paghatag sing daku ukon diutay nga mga amot nga kuwarta agod magbulig sa pagtukod sing dugang pa nga mga duog sang pagsimba sa bug-os nga kalibutan. Madamo man nga kauturan ang naggamit sang ila kagamitan subong man sang ila tion, ikasarang, kag mga kalantip para sa sining mga proyekto. Ang kadalag-an sang bug-os nga kahimusan nasandig sa panuytoy, suporta, kag bugana nga mga pagpakamaayo ni Jehova sa aton nahiusa nga mga panikasog.—Salmo 127:1.
3 Madamo nga sanga ang nagsunod sa ginsugdan nga kahimusan sa mga kongregasyon sa Estados Unidos. Sa mga Kingdom Hall sa madamo nga kadutaan, may isa ka kahon diin ginabutang sang mga manugbantala ang ila mga amot para sa Kingdom Hall Fund. Sa Estados Unidos nga edisyon sang Ang Aton Ministeryo sa Ginharian para sa Marso 1997, ginpahibalo ang isa ka pagpasibu sa sini nga programa. Ini nagasiling: “Sugod nga natukod ang Kingdom Hall Fund sang Sosiedad sang 1983, nag-amot sing maalwan ang mga kauturan, amo kon ngaa may mga napahulam para sa pagtukod sing mga Kingdom Hall. Mga 2,700 ka kongregasyon na sa sini nga pungsod ang nakabenepisyo gikan sa sini nga kahimusan. Madamo nga kongregasyon ang indi gid makatukod sing bag-o nga mga Kingdom Hall ukon makapakay-o sang dapat kay-uhon. Daku gid ang kinahanglan karon nga gamiton ining gin-amot nga mga pundo agod ipahulam sa mga kongregasyon nga yara sa imol nga mga pungsod. Ang inyo pagsakdag sini nga kahimusan ginapasalamatan gid sang Sosiedad kag sang mga kongregasyon nga nakabenepisyo gikan sa inyo mga amot.”
4 Ini nga pahibalo nangin imbitasyon nga makigbahin sa ginpadasig nga programa sa pagtukod sing mga Kingdom Hall. Ang Kingdom Hall Fund pasangkaron pa agod ilakip ang mga kinahanglanon sang aton mga kauturan sa iban nga kadutaan. Ang masunod nga artikulo sa Agosto 1997 nga isyu sang edisyon sang Ang Aton Ministeryo sa Ginharian sa Estados Unidos nagsiling: “May padayon nga kinahanglanon para sa pagtukod sing mga Kingdom Hall sa bug-os nga kalibutan. Sang nagligad lamang nga tuig sang pag-alagad, 3,288 ka bag-o nga kongregasyon ang gintukod. Madamo sini nga kongregasyon yara sa Aprika, Asia, Sentral kag Bagatnan nga Amerika, kag Nasidlangan nga Europa.”
5 Ano na ang nahimo sugod sadto? Ang 2001 Yearbook nagreport: “Sa sini nga kahimusan, sa 30 ka pungsod, 453 ka Kingdom Hall ang nahuman na, kag 727 ka tinukod ang ginapatindog pa. Ginhatagan sing pinasahi nga igtalupangod ang paghimo sing palareho nga mga plano sang Kingdom Hall nga sarang makagamit sing lokal nga mga materyales sa pagtukod kag mga metodo. Sa Kenya, kinutkot nga bato ang ginagamit; sa Togo kinaandan ang paggamit sing tisa; sa Cameroon kongkreto nga mga bloke nga ginapalitahan ang popular. Sa sini nga paagi, madali makatuon ang mga kauturan nga lalaki sing mga kalantip nga kinahanglanon sa paghimo sang importante nga mga hilikuton sa sulod sang bug-os-pungsod nga programa.”
6 Masapwan ang pamatuod sang mga pagpakamaayo ni Jehova sa sini nga programa sa daku nga kontinente sang Aprika. Samtang ginatan-aw mo ang mga retrato sang mga Kingdom Hall nga natukod, hunahunaa ang epekto sini nga pagtukod sa hilikuton sang mga Saksi ni Jehova! Matuod ini sa tatlo ka talalupangdon nga bahin—ang paghiusa sang aton bug-os kalibutan nga paghiliutod, ang epekto sa lokal nga komunidad, kag ang pagdamo sang tumalambong sa mga miting sa kongregasyon. Samtang ining suplemento nagapadaku sang gintukod nga mga Kingdom Hall sa Aprika, ang masunod nga mga guwa sang Ang Aton Ministeryo sa Ginharian magasentro sang igtalupangod kon paano nagauswag ang programa sa pagtukod sing mga Kingdom Hall sa iban nga bahin sang kalibutan.
[Retrato pahina 3]
CENTRAL AFRICAN REPUBLIC
Bimbo, Bangui
Begoua, Bangui
[Retrato sa pahina 4]
Ukonga, Tanzania
[Retrato sa pahina 4]
Accra, Ghana
[Retrato sa pahina 4]
Salala, Liberia
[Retrato sa pahina 4]
Allada, Benin—ang Kingdom Hall anay
[Retrato sa pahina 4]
Allada, Benin—bag-o nga Kingdom Hall
[Retrato sa pahina 4]
Karoi, Zimbabwe
[Retrato sa pahina 5]
Kpeme, Togo
[Retrato sa pahina 5]
Sokodé, Togo
[Retrato sa pahina 5]
Fidjrosse, Benin
[Retrato sa pahina 6]
Lyenga, Zambia—ang Kingdom Hall anay
[Retrato sa pahina 6]
Lyenga, Zambia—bag-o nga Kingdom Hall
[Retrato sa pahina 6]
Kinshasa, Congo
[Retrato sa pahina 6]
Musambira, Rwanda