Iluga ang Daku nga Manunudlo Kon Nagagamit sing Ginatudlo sang Biblia nga Libro
1. Paano nagtudlo si Jesus?
1 Ginapaathag pirme sing simple kag maathag sang Daku nga Manunudlo nga si Jesus ang mga butang. Agod mapahulag ang hunahuna sang iya mga tagpalamati, kon kaisa ginapamangkot niya sila anay sang ila pagtamod. (Mat. 17:24-27) Ginapatuhoy niya ang ila igtalupangod sa Pulong sang Dios. (Mat. 26:31; Mar. 7:6) Naghalong gid sia nga indi magtudlo sing tuman kadamo nga impormasyon ang iya mga disipulo, kay nakahibalo sia nga dapat sila magpadayon sa pagtuon. (Juan 16:12) Interesado man si Jesus kon bala ang iya mga disipulo nagapati kag nakahangop sang iya ginatudlo sa ila. (Mat. 13:51) Gindesinyo ang Ginatudlo Sang Biblia nga libro agod buligan kita nga makatudlo sa kaanggid nga paagi.
2. Sa anong mga paagi mahimo naton gamiton ang nagabukas nga mga pamangkot sa tagsa ka kapitulo?
2 Nagabukas nga mga Pamangkot: Kon sugdan mo ang isa ka kapitulo, maayo gid nga ipatalupangod ang nagabukas nga mga pamangkot sa ubos sang tig-ulo. Ipautwas sing retoriko ang mga pamangkot agod mapukaw ang gana sang estudyante. Ukon mahimo mo sia pasabton sing malip-ot sa mga pamangkot. Indi na kinahanglan nga hinun-anunan ninyo sing detalyado ang iya mga sabat ukon tadlungon ang tagsa ka sayop niya nga sabat. Mahimo mo sia pasalamatan sa iya mga ideya kag sugdi ang paghinun-anon sa materyal. Ang iya mga sabat sa nagabukas nga mga pamangkot makabulig sa imo agod mahibaluan kon sa diin nga bahin sang leksion ang imo hatagan sing kapin pa nga igtalupangod.
3. Paano naton mahuptan nga simple ang pagtuon?
3 Mga Teksto: Dapat isentro sa Kasulatan ang pagtuon. (Heb. 4:12) Apang, indi na kinahanglan nga basahon pa ang tanan nga teksto. Ipadaku ang mga teksto nga nagapakita sing Makasulatanhon nga sadsaran sang aton mga pagpati. Ang mga teksto nga nagahatag sing impormasyon tuhoy sa kahimtangan mahimo nga indi na dapat pagbasahon. Ginapresentar sang Ginatudlo Sang Biblia nga libro ang kamatuoran sa simple nga paagi. Hupti nga simple ang pagtuon. Magpokus sa panguna nga mga punto, kag likawi ang indi kinahanglanon nga mga detalye ukon maglakip sing wala labot nga mga impormasyon.
4. Ano ang aton basihan kon bala dapat naton binagbinagon ang impormasyon sa apendise sa tion sang pagtuon?
4 Apendise: Gintuptupan sang apendise ang 14 ka topiko nga nagasakdag sa panguna nga tulun-an. Indi man gid obligado nga binagbinagon ini nga mga topiko sa tion sang pagtuon. Sa pila ka topiko, mahimo nga palig-unon mo na lang ang imo estudyante nga basahon ini nga materyal sing kinaugalingon, ilabi na kon nahangpan kag ginapatihan na niya ang mga impormasyon sa panguna nga tulun-an. Halimbawa, kon nagapati na ang estudyante nga si Jesus amo ang Mesias, mahimo nga indi na kinahanglan pa nga binagbinagon sa iya ang tig-ulo nga “Si Jesucristo—Ang Ginsaad nga Mesias” kon nagatuon sa kapitulo 4 nga may tig-ulo nga, “Sin-o si Jesucristo?” Sa iban nga kahimtangan, mahimo nga mapuslanon gid nga maghinguyang sing tion agod binagbinagon ang impormasyon sa apendise ukon ang pila ka bahin sini.
5. Kon binagbinagon naton ang impormasyon sa apendise, paano naton ini himuon?
5 Kon binagbinagon mo ang impormasyon sa apendise, mahimo ka maghanda sing mga pamangkot sing abanse kag binagbinaga ang mga parapo sa estudyante nga kaangay sang pagtuon sa panguna nga tulun-an. Ukon depende sa panginahanglan sang estudyante, sarang ka maghinguyang sing pila ka minutos sa tion sang pagtuon sa pagrepaso sang impormasyon upod sa iya. Sa amo mapat-od mo kon bala nahangpan niya ang impormasyon nga iya ginabasa sing kinaugalingon.
6. Paano magamit ang kahon sa repaso sa tagsa ka paghinakop sang pagtuon?
6 Kahon sa Repaso: Mabasa sa kahon sa katapusan sang tagsa ka kapitulo ang mga dinalan nga sa masami amo ang sabat sa nagabukas nga mga pamangkot. Mahimo mo gamiton ini nga mga dinalan sa pagrepaso sang pangunang mga punto sa kapitulo. Nasapwan sang pila ka manugbantala nga makabulig ang pagbasa sang tagsa ka dinalan kag ayhan sang mga teksto sa sini upod sa estudyante. Ginapangabay nila gilayon nga ipaathag sing malip-ot sang estudyante kon paano ginapamatud-an sang teksto ang dinalan. Sa sini mahibaluan sang mga nagatudlo kon nahangpan gid bala sang estudyante ang panguna nga mga punto sa ginatun-an kag kon paano ini ginasakdag sang Biblia kag kon bala nagapati sia sa sini. Ginahanas man sa sini ang estudyante sa paggamit sang Biblia sa pagpaathag sang kamatuoran sa iban.
7. Paano naton gamiton ang Ginatudlo Sang Biblia nga libro agod matuman ang sugo sa aton?
7 Ang labing epektibo nga paagi agod matuman naton ang sugo sa aton nga tudluan kag himuon nga disipulo ang mga tawo amo ang pag-ilog sa mga paagi sang pagpanudlo ni Jesus. (Mat. 28:19, 20) Mabuligan kita sang Ginatudlo Sang Biblia nga libro agod himuon ina. Gamita ini sing maayo agod matudluan ang iban sang kamatuoran sa maathag, simple, kag makawiwili nga paagi.