Gamita Sing Husto ang Imo Tion sa Ministeryo
1 Madamo pa gid kita sing himuon sa aton ministeryo, kag ang tion nga nabilin ginpalip-ot. (Juan 4:35; 1 Cor. 7:29) Paagi sa maayo nga pag-organisar kag abanse nga pagplano, magamit naton sing husto ang aton tion sa ministeryo.
2 Mangin Handa: Antes magkadto sa miting sa pag-alagad sa latagon, pat-ura nga may mga literatura ka nga magamit sa ministeryo kag may nahanda na nga presentasyon. Pagkatapos sang pangamuyo sa miting, magkadto gilayon sa teritoryo. Sa amo, madamo ka kag ang imo mga kaupod sing mabantalaan sa pag-alagad sa latagon.
3 Kon ikaw ang gintangdo nga magadumala sang miting sa pag-alagad sa latagon, magsugod sa eksakto nga oras. Hupti nga malip-ot ang miting—indi maglampas sing 10 tubtob 15 minutos. Antes mo palakton ang grupo, pat-ura nga nahibaluan sang tanan kon sa diin sila makadto kag kon sin-o ang ila kaupod.
4 Samtang Yara sa Ministeryo: Kon matapos na ang miting sa pag-alagad sa latagon, indi na magpabuyanbuyan pa, magkadto gilayon sa teritoryo. Kon sa banta mo kinahanglan mo magbiya sing temprano sa teritoryo, ayhan mangita ka na lang sang imo masakyan agod nga indi magsunod sa imo ang grupo. Kon nagapanghikot upod sa grupo, magpatugsiling sa iban nga ayhan nagahulat sa imo tubtob nga matapos ang inyo paghinun-anon sa tagbalay. Nagapahangop ini sang mataktikanhon nga pag-untat sang paghambalanay sa mga tawo nga mabaison ukon himuson nga balikan na lang ang mga interesado.—Mat. 10:11.
5 Kon nagaduaw liwat, malikawan mo ang di-kinahanglanon nga pagbiyahe paagi sa pagkonsentrar sa isa lang ka duog antes magsaylo sa iban nga duog. Mahimo mo man tawgan sa telepono ang tawo nga imo duawon agod mapat-od nga yara sia sa ila balay. (Hulu. 21:5) Kon sa banta mo madugayan ang imo pagbisita, mahimo mo hambalan ang imo kaupdanan nga magbantala sa kaingod nga mga balay ukon magkadto na lang sa ila iban pa nga balik-duaw.
6 Nagakabuhi kita sa tion sang dakung espirituwal nga pagpangani. (Mat. 9:37, 38) Sa indi madugay, matapos na ini nga hilikuton. Busa, dapat gid naton gamiton sing husto ang aton tion sa ministeryo.