Ipakita Naton ang Apresasyon—Ang Memoryal Saulugon sa Abril 17
1. Ano nga balatyagon sang salmista ang nagakaigo sa tion sang Memoryal?
1 Bangod ginluwas sia ni Jehova kag ginpakitaan sing kaluoy, namangkot ang salmista: “Ano bala ang ihatag ko sa GINOO tungud sa tanan niya nga kaayohan?” (Sal. 116:12) Ang mga alagad sang Dios sa karon mas may rason pa gid nga magpasalamat sa iya. Pila ka siglo pagkatapos ini ginsulat, ginhatag ni Jehova sa mga tawo ang pinakahamili nga regalo—ang gawad. Samtang nagahanda kita sa pagsaulog sa kamatayon sang Cristo sa Abril 17, mas mapakita pa gid naton ang pagpasalamat.—Col. 3:15.
2. Ano ang pila ka rason kon ngaa dapat naton apresyahon ang gawad?
2 Mga Pagpakamaayo: Bangod sa gawad, nabaton naton ang “kapatawaran sang aton mga sala.” (Col. 1:13, 14) Gani, maalagad naton si Jehova nga may matinlo nga konsiensia. (Heb. 9:13, 14) May kahilwayan man kita sa paghambal kon mangamuyo kita kay Jehova. (Heb. 4:14-16) Kag ang mga nagatuo sa gawad may paglaum nga mabuhi sing walay katapusan!—Juan 3:16.
3. Paano naton mapakita kay Jehova ang aton apresasyon sa gawad?
3 Ipakita ang Apresasyon: Ang isa ka paagi nga mapakita naton ang apresasyon amo ang pagbinagbinag sang pagbasa sang Biblia sa Memoryal kada adlaw kag pagpamalandong sa sini. Ang artikulo sa Pebrero 1, 2011 nga Ang Lalantawan nga “Handa Ka Na Bala sa Pinakaimportante nga Adlaw sang Tuig?” makabulig sa aton nga mahimo ini. Mapabutyag man naton kay Jehova sa pangamuyo nga ginapabaloran gid naton ang gawad. (1 Tes. 5:17, 18) Mapakita man naton ang pagpasalamat kon magtambong kita sa Memoryal subong pagsunod sa sugo ni Jesus. (1 Cor. 11:24, 25) Dugang pa, mailog man naton ang daku nga gugma ni Jehova paagi sa pag-agda sa tanan.—Isa. 55:1-3.
4. Ano ang aton determinasyon?
4 Wala lamang ginakabig sang mainapresyahon nga mga alagad ni Jehova ang Memoryal subong ordinaryo nga miting. Amo ini ang pinakaimportante nga pagtinipon sa bilog nga tuig! Samtang nagahilapit ang Memoryal, kabay nga determinado kita nga mangin kaangay sang salmista nga nagsulat: “Dayawon ko si Jehova, Kag indi ko pagkalimtan ang tanan niya nga ginhimo.”—Sal. 103:2, NW.