Ang mga Binhi Dapat Bunyagan Agod Magtubo
1. Ano ang dapat bunyagan agod magtubo?
1 Ang mga binhi nga gintanom sa hardin dapat bunyagan agod magtubo. Amo man sa mga binhi sang kamatuoran nga gintanom sa tagipusuon sang mga tawo sa aton teritoryo. (1 Cor. 3:6) Dapat naton duawon liwat kag bunyagan ang malaragwayon nga mga binhi paagi sa Pulong sang Dios kon luyag naton nga manggamot sila, magtubo, kag magdaku.
2. Paano naton ihanda ang tagbalay sa aton pagduaw liwat?
2 Mamangkot: Kon nagahanda sang imo presentasyon, magpreparar man sing makapainteres nga pamangkot nga pagasabton mo sa imo pagbalik. Ipamangkot ini sa konklusion sang inyo una nga paghambalanay, kag maghimo sing kahimusan sa pagbalik. Nasapwan sang madamo nga mapuslanon ang pagpili sing pamangkot gikan sa Ginatudlo Sang Biblia nga libro agod masugdan ang pagtuon sa Biblia.
3. Ano nga mga impormasyon ang mahimo mo irekord?
3 Maghimo sing Rekord: Pagkatapos sang inyo una nga paghambalanay, maghimo sing rekord. Isulat ang ngalan kag adres sang tagbalay. Maayo man kon isulat mo ang petsa kag oras sang inyo pag-istoryahanay, ang inyo gin-istoryahan, kag ang literatura nga imo napahamtang. May relihion bala sia? May pamilya na bala sia? Ano ang iya mga interes kag ginakabalak-an? Ini nga mga impormasyon makabulig sa imo nga mahambalan sa imo pagbalik ang mga topiko nga makapainteres sa iya. Isulat man kon san-o ka mabalik kag ano nga pamangkot ang imo ginpautwas.
4. Kon nagatatap sang interes, ngaa dapat kita mangin mapinadayunon?
4 Mangin Mapinadayunon: Indi gid mag-untat si Satanas sa ‘pagkuha sang pulong’ nga natanom sa tagipusuon sang tawo. (Mar. 4:14, 15) Gani, indi mangampo kon indi mo masapwan liwat ang interesado sa iya puluy-an. Makapadala ka bala sang sulat ukon makabilin sang nota sa ila puertahan? Nasugdan sang isa ka payunir ang pagtuon sa isa ka babayi sa ganhaan apang wala niya ini masapwan liwat sa puluy-an. Gani, ginsulatan niya ini. Sang nasapwan na niya ang babayi sa puluy-an, nagsiling sia nga natandog gid sia sa personal nga interes nga ginpakita sa iya. Samtang ginabunyagan naton ang mga binhi sang kamatuoran, mabatyagan naton ang kalipay nga makita nga nagapanugdo ini, nagatubo sa pagkahamtong, kag “nagapamunga sing katluan ka pilo kag kan-uman kag isa ka gatos.”—Mar. 4:20.