Pagduaw Liwat sa mga Interesado—San-o?
1. Ano ang nalakip sa paghimo sing mga disipulo?
1 Ang paghimo sing mga disipulo nagalakip sang pagduaw liwat sa bisan sin-o nga luyag magtuon parte sa kahimusan sang Ginharian ni Jehova. (Mat. 28:19, 20) Ang pinakamaayo nga tion sa pagduaw liwat masami nga nagadepende sa iskedyul naton kag sang interesado. Ngaa dapat kita magbalik gilayon pagkatapos sang aton una nga pagduaw?
2, 3. Ngaa dapat naton tinguhaan nga magbalik gilayon?
2 Ngaa Magbalik Gilayon? Malapit na lang matapos ang pagbantala sing “maayong balita sang ginharian,” kag subong man ang katapusan sining sistema sang mga butang. (Mat. 24:14; 1 Ped. 4:7) Busa, samtang mahimo pa matigayon sang mga interesado “ang adlaw sang kaluwasan,” dapat kita ‘mangin masako sa pagbantala,’ nga nagalakip sang pagduaw liwat gilayon agod matatap ang ginpakita nga interes.—2 Cor. 6:1, 2; 2 Tim. 4:2.
3 Luyag gid kuhaon ni Satanas ang binhi sang Ginharian nga aton gintanom sa tagipusuon sang interesado. (Mar. 4:14, 15) Ang isa nga nagpakita sing interes masami nga ginayaguta sang mga katapo sang pamilya, mga katrabaho, kag iban pa. Paagi sa pagbalik gilayon, mahimo naton mapalambo ang ginpakita nga interes antes ini paluyahon sang iban.
4. Ano ang himuon naton sa una nga pagduaw agod makahimo kita sing kahimusan sa pagduaw liwat?
4 Magkontratahanay: Mas maayo nga maghimo sing pat-od nga kahimusan sa pagduaw liwat antes ka magbiya sa imo una nga pagduaw. Magbilin sing pamangkot nga pagasabton mo sa imo pagbalik. Importante man nga maghupot ka sing maayo nga rekord. Kon ginatugot sang imo iskedyul, mahimo ka mangabay nga magbalik pagkadason nga adlaw ukon pagligad lang sang pila ka oras. Kon nasapwan ang interesado sa talipuspusan sang semana kag nagatrabaho sia halin sa Lunes tubtob Biernes, ayhan magpasugot sia nga duawon sa masunod nga talipuspusan sang semana. Kon maghimo ka sing kahimusan sa pagduaw liwat, tumana ang imo panaad.—Mat. 5:37.
5. Ngaa ang pagbalik naton gilayon makabulig sa aton nga matuman ang ginsugo ni Jesus nga maghimo sing mga disipulo?
5 Madamo gid kita sing rason agod balikan gilayon ang mga interesado. Gani, maghimo sing kahimusan kag magbalik gilayon, bangod “malip-ot na lang ang nabilin nga tion.” (1 Cor. 7:29) Kon duawon naton gilayon ang mga interesado sa mensahe sang Ginharian, mangin mabungahon gid ang aton mga panikasog.