Sampol nga mga Presentasyon

Sa Pagsugod sang Pagtuon sa Biblia sa Una nga Sabado sang Nobiembre

“Nagaduaw kami sing makadali diri sa inyo lugar. Sang ginpamangkot namon ang mga tawo parte sa palaabuton, madamo sa ila ang nagalaum nga mapalangit. Amo man bala sina ang ginalauman mo? [Tuguti sia nga magsabat.] Nakapainteres sa akon ini nga artikulo. May pamangkot ini, ‘Sin-o ang mapalangit, kag ngaa?’” Dayon ipakita sa iya ang likod sang Nobiembre 1 nga Lalantawan, kag basaha ninyo ang una nga parapo kag ang ginsambit nga teksto. Kon interesado sia, binagbinaga ang ikaduha nga parapo. Itanyag ang mga magasin, kag maghimo sing kahimusan nga magbalik para binagbinagon ang masunod nga pamangkot.

Ang Lalantawan Nobiembre 1

“Sa imo opinyon, ano ang pinakadaku nga kabutigan nga ginsiling parte sa Dios? [Tuguti sia nga magsabat.] Suno sa Biblia, luyag sang Dios nga higugmaon sia kag saligan sang mga tawo. [Basaha ang Isaias 41:13.] Ginapakita sini nga magasin ang tatlo ka kinaandan nga kabutigan parte sa Dios nga nag-upang sa iban nga mangin suod sa iya.”

Magmata! Nobiembre

“Nagaduaw kami sing makadali bangod madamo ang nabalaka nga nagakadula na ang maayo nga pamatasan. Sa banta mo nagnubo gid man bala ang talaksan sang mga tawo sa moral? [Tuguti sia nga magsabat.] Gintagna sang Biblia nga magabag-o ang panimuot kag pamatasan sang mga tawo. [Basaha ang 2 Timoteo 3:1-5.] Ginabinagbinag sini nga magasin kon ngaa masaligan naton ang talaksan sa moral nga masapwan sa Biblia.”